ئامېرىكا «ۋاشىنگىتون كۈندىلىك پوچتا گېزىتى» نىڭ 1-چېسلا خەۋەر قىلىشىچە، زىكا ۋىرۇسى (Zika virus) ئامېرىكا قىتئەسىدە داۋاملىق يامراپ كېتىۋاتىدۇ. يېقىندا كولۇمبىيە سەھىيە مىنىستىرلىقىنىڭ ئاشكارلىشىچە، ھازىر مەزكۇر دۆلەتتە تەخمىنەن 20 مىڭ ئادەم زىكا ۋىرۇسى بىلەن يۇقۇملانغان، بۇنىڭ ئىچىدە 2100 ى ھامىلدار ئىكەن.

         يەرلىك تاراتقۇلارنىڭ خەۋەر قىلىشىچە، كولۇمبىيەدە ھازىر 20 مىڭ 297 ئادەمنىڭ زىكا ۋىرۇسى بىلەن يۇقۇملانغانلىقىغا دىئاگىنوز قويۇلغان، بۇنىڭ ئىچىدە 2116 سى ھامىلدار ئايال ئىكەن. بىراق ھازىرغىچە ئادەم ئۆلۈش ئەھۋالى ياكى يېڭى تۇغۇلغان بوۋاقنىڭ بېشى كىچىك بولۇپ قېلىش ئەھۋالى كۆرۈلمىگەن. بۇندىن بۇرۇن دۇنيا سەھىيە تەشكىلاتى مۇنۇلارنى بىلدۈرگەن، زىكا ۋىرۇسىنىڭ پەيدا بولۇشى بىر قىسىم رايونلاردىكى يېڭى تۇغۇلغان بوۋاقلارنىڭ بېشى كىچىك بولۇپ قېلىشى (كىچىك باش كېسەللىكى) (Microcephaly) ۋە گۇيلايىن باررې ئۇنۋېرسال كېسەللىكى (Guillain - Barre syndrome disease) نىڭ كۆپىيىپ كېتىشى بىلەن مۇناسىۋەتلىك ئىكەن.

خەۋەردە دېيىلىشىچە، زىكا ۋىرۇسى بىلەن يۇقۇملانغان ھامىلدار ئاياللارنىڭ ئىچىدە %37.2 ى كولۇمبىيە ۋە ۋېنسۇئېلا كىسىشىدىغان شىمالى سانتاندېر (Norte de Santander) ئۆلكىسىدە ئىكەن. كولۇمبىيە سەھىيە مىنىستىرلىقىنىڭ پەرەز قىلىشىچە، مەزكۇر دۆلەتتە ھازىر 700 مىڭ ئادەم زىكا ۋىروسى بىلەن يۇقۇملانغان بولۇش ئىھتىمالى بار بولۇپ، شۇڭلاشقا ئاياللارنىڭ ھامىلدار بولۇشتىن ساقلىنىشقا چاقىردى.

دۇنيا سەھىيە تەشكىلاتىنىڭ سىتاستىكا قىلىشىچە، ئامېرىكا قىتئەسى، ئافرىقا قىتئەسى قاتارلىق رايونلاردىكى 30 نەچچە دۆلەت ۋە رايوندا زىكا ۋىرۇسى تارقالغانلىقى ئېنىقلانغان. يۇقۇملىنىش ئەھۋالى ئەڭ ئېغىر بولغىنى بىرازىلىيە، كولۇمبىيە قاتارلىق ئامېرىكا قىتئەسى دۆلەتلىرى ئىكەن. ياۋروپا قىتئەسىدىكى بىر قىسىم دۆلەتلەردە تېخى زىكا ۋىرۇسى بىلەن يۇقۇملىنىش ئەھۋالى توغرىسىدا خەۋەر بولمىسىمۇ، بىراق دۇنيا سەھىيە تەشكىلاتىنىڭ بىلدۈرىشىچە، ياۋروپا قىتئەسى رايونىدا قىشتا زىكا ۋىرۇسىنىڭ تارقىلىش نىسبىتى تۆۋەن بولىدىكەن.

كۆپىنچە ئەھۋاللاردا زىكا ۋىرۇسىنى ئىسسىق بەلباغ ۋە مۆتىدىل بەلباغ رايونلىرىدىكى ئىدىس پاشىسى تارقىتىدىكەن، بۇ پاشا دېنگې قىززىتمىسى (dengue)، چىكۇنگۇنيا قىزىتمىسى (Chikungunya) ۋە سېرىق قىزىتما تارقىتىدىغان پاشىلارغا ئوخشىشىپ كېتىدىكەن. بىراق دۇنيا سەھىيە تەشكىلاتىنىڭ بىلدۈرىشىچە، زىكا ۋىرۇسى خەتەرلىك ۋىرۇس ئەمەس بولۇپ، ۋىرۇس مەنبەسىنى تازلاش، ئىدىس پاشىسىنىڭ چېقىۋېلىشىنىڭ ئالدىنى ئېلىش مۇھىم ئىكەن.

2-ئاينىڭ 1-كۈنى، دۇنيا سەھىيە تەشكىلاتى زىكا ۋىرۇسى توغرىسىدا جىددىي كومىتېت يىغىنى چاقىرىپ، زىكا ۋىرۇسىنىڭ تارقىلىشى «خەلقئارا مۇناسىۋىتىدە تۇيۇقسىز يۈز بېرىدىغان سەھىيە ۋەقەسى كەلتۈرۈپ چىقىرامدۇ-يوق» دېگەن مەسىلە ئۈستىدە سۆھبەتلەشتى.