ئامېرىكا The Next Web تور بېتىنىڭ 18-مارتتىكى خەۋىرى، باغداش تورىدىن ئەكبەر تەرجىمىسى:

ئىسرائىلىيە يۇمشاق دېتال تەتقىقات شىركىتى NorthBit بۈگۈن دوكلات ئېلان قىلىپ، Android سىستېمسىنىڭ مېدىيە مۇلازىمېتىرى ۋە مېدىيە ئامبىرى Stagefrightدا بىخەتەرلىك يوچۇقى بولغانلىقى ئۈچۈن، يۈز مىليوندىن ئارتۇق Android ئەسلىھەسى خاككېرنىڭ ھۇجۇمىغا ئۇچرىشى مۇمكىنلىكىنى ئېيتتى.

بۇ Stagefrightدا تۇنجى قېتىم بىخەتەرلىك يوچۇقىنىڭ بايقىلىشى ئەمەس، 2015-يىلى 10-ئايدا بەزى مېدىيەلەر خەۋەر قىلىپ، 1 مىلياردتىن ئارتۇق Android ئەسلىھەسىنىڭ Stagefrightتىكى بىخەتەرلىك يوچۇقى سەۋەبلىك ھۇجۇمغا ئۇچرىشى مۇمكىنلىكىنى ئېيتقان ئىدى.

شۇنىڭدىن كېيىن، گۇگول ئارقا-ئارقىدىن كۆپلىگەن ياماقلارنى ئېلان قىلدى، ئەمما Stagefrightنىڭ بىخەتەرلىك مەسىلىسى باشتىن-ئاخىر ھەل قىلىنمىدى.

NorthBitنىڭ دېيىشىچە، 2.2 دىن 4.0 نەشرىگىچە بولغان Android سىستېمىسى ھەمدە 5.0 ۋە 5.1 نەشردىكى Android سىستېمىسى ئىجرا بولىدىغان ئەسلىھەلەر بۇ يېڭى بايقالغان يوچۇقنىڭ تەسىرىگە ئۇچرىشى مۇمكىن ئىكەن.

NorthBit يۇقىرىدا دېيىلگەن نەشرىدىكى Android سىستېمىسى ئىجرا بولىدىغان ئەسلىھەنىڭ تەخمىنەن 275 مىليون بولۇشى مۇمكىنلىكىنى پەرەز قىلدى، ئەمما زادى قانچىلىك ئەسلىھەنىڭ تەسىرگە ئۇچرىشى مۇمكىنلىكىنى ئېنىق دېيىش ناھايىتى تەس.

NorthBitنىڭ دېيىشىچە، مۇنتىزم ROM ئىجرا بولىدىغان Nexus 5 ئەسلىھەسىنىڭ ھۇجۇمغا ئۇچراش مۇمكىنلىكى ئەڭ يۇقىرى ئىكەن، شىركەت ئوڭۇشلۇق ھالدا ھۇجۇم قىلىپ كىرگەن باشقا يانفونلار يەنە HTC One، LG G3 ۋە سامسۇڭ S5 بار ئىكەن.

تەلەيگە يارىشا، خاككېرلارنىڭ بۇ يوچۇقتىن پايدىلىنىپ ھۇجۇم قوزغىشى ئاسان ئىش ئەمەس. NorthBitنىڭ دېيىشىچە،Stagefrightدىكى بۇ يېڭى يوچۇقتىن پايدىلىنىپ ھۇجۇم قوزغاشتا بەلگىلىك سەۋىيەدىكى ئىجتىمائىي ئېنژىنېرلىق تېخنىكىسى ھازىرلىشى كېرەك بولۇپ، شۇڭا خاككېر ئاسانلىقچە مۇۋەپپەقىيەت قازىنالمايدىكەن.