شىنخۇا ئاگېنتلىقى، بېيجىڭ، 27-يانۋار تېلېگراممىسى: دۆلەت رەئىسى شى جىنپىڭ 27-يانۋار ‹‹خەلق›› سارىيىدا ئامېرىكا دۆلەت ئىشلىرى كاتىپى كېررى بىلەن كۆرۈشتى.

    شى جىنپىڭ مۇنداق كۆرسەتتى: ئۆتكەنكى بىر يىلدا، ئىككى تەرەپنىڭ ئورتاق تىرىشچانلىقىدا، جۇڭگو-ئامېرىكا مۇناسىۋىتىدا مۇھىم ئىلگىرىلەشلەر قولغا كەلتۈرۈلدى. مەن زۇڭتۇڭ ئوبامانىڭ تەكلىپىگە بىنائەن ئامېرىكىدا مۇۋەپپەقىيەتلىك دۆلەت ئىشلىرى زىيارىتىدە بولدۇم، ئىككى تەرەپ جۇڭگو بىلەن ئامېرىكىنىڭ يېڭىچە چوڭ دۆلەتلەر مۇناسىۋىتى بەرپا قىلىشقا يەنىمۇ تۈرتكە بولۇشتا يېڭى، ئورتاق تونۇش ھاسىل قىلدۇق. ئومۇمەن قارىغاندا، مەيلى ئىقتىساد، سودا، ئىككى ئارمىيە، ئادىمىيەت، تور بىخەتەرلىكى قاتارلىق ساھەلەردە بولسۇن، مەيلى كىلىمات ئۆزگىرىشى، ئىران يادرو مەسىلىسى قاتارلىق خەلقئارا، رايون ۋە يەرشارى خاراكتېرلىك مەسىلىلەردە بولسۇن، جۇڭگو بىلەن ئامېرىكىنىڭ ماسلىشىشى ۋە ھەمكارلىقى ئىنتايىن ئۈنۈملۈك بولدى.

   شى جىنپىڭ مۇنداق تەكىتلىدى: جۇڭگو-ئامېرىكا ئىككى دۆلەت مۇناسىۋىتىنى ساغلام، مۇقىم تەرەققىي قىلدۇرۇش جۇڭگو-ئامېرىكا ئىككى تەرەپنىڭ مەنپەئەتىگە ئۇيغۇن، شۇنداقلا خەلقئارا جەمئىيەتنىڭ ئورتاق ئارزۇسى، ئىككى تەرەپ بۇنى ئورتاق قوغدىشى كېرەك. مەن زۇڭتۇڭ ئوباما بىلەن ئورتاق كۆڭۈل بۆلىدىغان زور مەسىلىلەردە داۋاملىق يېقىندىن ماسىلىشىش ۋە چۈشىنىشنى ساقلاشنى خالايمەن. ئىككى تەرەپ ئورتاق تىرىشىپ، بېكىتىلگەن ھەمكارلىق قارالمىلىرىنى داۋاملىق ئىلگىرى سۈرۈپ، مۇھىم خەلقئارا، رايون ۋە يەرشارى خاراكتېرلىك مەسىلىلەردە چۈشىنىش ۋە ماسلىشىشنى ساقلاپ، تېخىمۇ كۆپ مەسىلىلەرنى مۇۋاپىق بىرتەرەپ قىلىشقا تۈرتكە بولۇش كېرەك.

  شى جىنپىڭ مۇنداق دەپ كۆرسەتتى: مەن كۆپ قېتىم ئېيتقان، جۇڭگو بىلەن ئامېرىكىنىڭ ھەمكارلىقنى كۈچەيتىشى دۇنياغا پايدىلىق چوڭ ئىش. ئىككى تەرەپ ئىككى دۆلەت رەھبەرلىرى ھاسىل قىلغان ئورتاق تونۇشنى ئوبدان ئەمەلىيلەشتۈرۈپ، توقۇنۇشماسلىق، قارشىلاسماسلىق، ئۆزئارا ھۆرمەتلىشىپ، ھەمكارلىشىپ ئورتاق بېيىدىغان پىرىنسىپتا چىڭ تۇرۇپ، ئىككى تەرەپ، رايون ۋە يەرشارىنىڭ ھەرقايسى ساھەلىرىدىكى ھەمكارلىقنى قانات يايدۇرۇپ، جۇڭگو-ئامېرىكا مۇناسىۋىتىدە تېخىمۇ زور يېڭى نەتىجىلەرنى قولغا كەلتۈرۈشىگە تۈرتكە بولۇشى كېرەك.

  كېررى مۇنۇلارنى بىلدۈردى: ئامېرىكا-جۇڭگو مۇناسىۋىتى ئىنتايىن مۇھىم. ئىككى تەرەپ ئۈنۈملۈك ماسلىشىپ ۋە چۈشىنىشىپ، كىلىمات ئۆزگىرىشى ‹‹پارىژ كېلىشىمى›› ۋە ئىران يادرو مەسىلىسى ئومۇمىي كېلىشىمى قاتارلىقلاردا مۇھىم رولىنى جارى قىلدۇردى. زۇڭتۇڭ ئوباما رەئىس ئەپەندىم بىلەن يېقىن مۇناسىۋەتنى ساقلاپ، ئامېرىكا-جۇڭگو ئىككى تەرەپنىڭ مۇناسىۋىتىگە يەنىمۇ تۈرتكە بولۇپ، ئىككى تەرەپنىڭ خەلقئارا ئىشلاردىكى ھەمكارلىقىنى كۈچەيتىشنى ئۈمىد قىلىدۇ.