پىڭپەي خەۋىرىدە ئېلان قىلىنىشىچە، 2016-يىلى 3-ئاينىڭ 14-كۈنى چۈشتىن كېيىن ئەنخۇي ئۆلكىسى خېفېي شەھىرىنىڭ چاڭفېڭ ناھىيىسىدىكى خىزمەتچى خادىملار بىلەن شۇاڭدۈن بازىرى خۈييۈەن قورۇسىدىكى ئامانلىق ساقىغۇچى خادىملارنىڭ ئۆز-ئارا ماسلىشىشى ئارقىسىدا مەزكۇر قورۇدا ئولتۇرۇشلۇق شاخلىتىپ سېتىش گۇماندارلىرىنى تەكشۈرگەن. تەكشۈرۈش جەريانىدا بۇ بىر نەچچە شاخلىتىپ سېتىش گۇماندارى خىزمەتچى خادىملارغا ياخشى ماسلاشماي قورۇنىڭ ئىشىكلىرىنى ۋە رېشاتكىلىرىنى بۇزۇۋەتكەن، ھەتتا يەنە خادىملارنى ئۇرۇپ دۇمبالىغان.

مەزكۇر قورۇدا ئولتۇرۇشلۇق لى ئەپەندىنىڭ (ئۆزگەرتىلگەن ئىسىم) مۇخبىرغا ئېيتىشىچە، «توقۇنۇش يۈز بەرگەن شۇ كۈنى كەچ سائەت 4 ئەتراپىدا قورۇنىڭ ئالدىدا ساقچىخانىنىڭ ۋە قورۇنىڭ ئامانلىقىنى ساقلايدىغان خادىملار قورۇغا كىرگەن ھەر بىر ئادەمنى تەكشۈرۈۋاتاتتى، تەكشۈرۈش نۆۋىتى بۇ بىر نەچچە شاخلىتىپ سېتىش گۇماندارىغا كەلگەندە، ئۇلار يوغانچىلىق قىلىپ خىزمەتچى خادىملارغا ۋاقىرىدى، ئۇلارنى ئۇردى، ھەتتا ئادەم توپلاپ غوۋغا كۆتۈردى» دېدى. چاڭفېڭ ناھىيىلىك جامائەت خەۋپسىزلىكى ئىدارىسى دېلو مەلۇماتىنى تاپشۇرۇپ ئالغاندىن كېيىن، دەرھال نەق مەيدانغا يېتپ بارغان.

ساقچىلار نەق مەيداننى بىر تەرەپ قىلىش جەريانىدا يەنە نۇرغۇنلىغان شاخلىتىپ سېتىش گۇماندارلىرىنىڭ توسقۇنلۇقىغا ئۇچرىغان، بۇ گۇماندارلار نۇرغۇن ئادەملەرنى توپلاشقا باشلىغان. شۇ كۈنى كەچ سائەت 7 دىن ئاشقاندا نەق مەيدانغا بارغانسېرى ئادەم كۆپيىپ، بۇ ئادەملەر ساقچىلار بىلەن توقۇنۇشقان. ئۇلارنىڭ ئىچىدىكى بىر قىسىم كىشىلەر ئۆزلىرىنى تۇتالماي ساقچى ماشىنىلىرىنى ئۇرۇپ چاققان، بۇ توقۇنۇشتا بىر خادىم بىلەن ئىككى ساقچى يارىلانغان.

كېيىن خېفېي شەھەرلىك جامائەت خەۋپسىزلىكى ئىدارىسىدىكى مۇناسىۋەتلىك خادىملار ئالاھىدە ساقچىلارنى ۋە قاتناش ساقچىلىرىنى باشلاپ نەق مەيدانغا يېتىپ كەلگەن. شۇ كۈنى كەچ سائەت 8 دە ئەتراپتىكى قاتناش تەرتىپى نورمال ھالىتىگە كەلگەن. جامائەت خەۋپسىزلىكى ئىدارىسى كېچىلەپ مەزكۇر قورۇدا تازلاش ئېلىپ بارغان، بۇ قېتىمقى تازىلاشتا جەمئىي 65 شاخلىتىپ سېتىش گۇماندارى بىلەن تەربىيەلىنىشتىن قايتقان 320 كىشى چىققان. مۇناسىۋەتلىك خادىملار ھېلىھەم تەكشۈرۈش خىزمىتىنى ئېلىپ بارماقتا.

15-چىسلا سەھەر 12 دىن 30 مىنۇت ئۆتكىچە نۇرغۇن خەلق ساقچىلىرى ۋە  قورۇنىڭ خىزمەتچى خادىملىرى قورۇدىكى ئىجارىگە ئېلىپ ئولتۇرىۋاتقان ئۆي ئىگىلىرىنى تەكشۈرۈپ شاخلىتىپ سېتىش گۇماندارلىرىنى تۇتقان. مۇخبىر ۋەقە يۈز بەرگەن قورۇنىڭ ئالدىدا نۇرغۇنلىغان ساقچىلار بىلەن ساقچى ماشىنىلىرىنىڭ تۇرغانلىقىنى كۆرگەن. قورۇغا كىرمەكچى بولغان كىشىلەر ساقچىنىڭ تەكشۈرۈشىدىن ئۆتكەندىن كېيىن ئاندىن قورۇغا كىرەلىگەن.