ئەنگلىيە پارلامېنتى ئەنگلىيە ھاۋا ئارمىيەسىگە «شام ئىسلام دۆلىتى»گە ھاۋادىن  زەربە بېرىش ھوقۇقى بەردى

   جۇڭگو ئاخبارات ئاگېنتلىقى، لوندون، 2-دېكابىر تېلېگراممىسى: ئەنگلىيە  پارلامېنتى ئاۋام پالاتاسى 2-دېكابىر كەچ بېلەت تاشلاش ئارقىلىق بىر تۈرلۈك تەكلىپ  لايىھەسىنى ماقۇللاپ، ئەنگلىيە ھاۋا ئارمىيەسىگە سۈرىيەدىكى «شام ئىسلام دۆلىتى»  قوراللىقلىرىغا ھاۋادىن ھۇجۇم قىلىش ھوقۇقى بەردى.

   10 سائەتكە سوزۇلغان مۇنازىرىدىن كېيىن، ئەنگلىيە  پارلامېنتى ئاۋام پالاتاسى 397 قوللاش بېلىتى، 223 قارشى بېلەت بىلەن بۇ تەكلىپ  لايىھەسىنى ماقۇللىدى.

   ئەنگلىيە باش ۋەزىرى كامېرون مۇنداق دېدى: توختىماي تېررورلۇق  ھۇجۇمى قوزغاۋاتقان «شام ئىسلام دۆلىتى»گە ھاۋادىن ھۇجۇم قىلىش قانۇنلۇق، شۇنداقلا  ئەنگلىيەنىڭ دۆلەت بىخەتەرلىكىگە پايدىلىق. ئەنگلىيە فىرانسىيە ۋە باشقا  ئىتتىپاقداش دۆلەتلەر بىلەن بىرگە سۈرىيەدە ھاۋا ھۇجۇمى ئېلىپ بېرىپ،  تېررورىزمغا بىرلىكتە تاقابىل تۇرۇپ، «شام ئىسلام دۆلىتى»دىن غالىب كېلىشى كېرەك.

   بۇلتۇر سېنتەبىردە ئەنگلىيە پارلامېنتى ئەنگلىيە ھاۋا  ئارمىيەسىگە ئىراقتىكى «شام ئىسلام دۆلىتى» قوراللىقلىرىغا ھاۋا ھۇجۇمى ئېلىپ بېرىش  ھوقۇقى بېرىشكە قارىتا بېلەت تاشلاپ ئىپادە بىلدۈرگەن، بىراق، بۇ ھاۋا ھۇجۇمىنىڭ  سۈرىيەگە كېڭىيىشىنى قوللىمىغان. پارىژدا يۈز بەرگەن تېررورلۇق ھۇجۇمىدىن كېيىن  ئەنگلىيە سىياسىي سەھنىسى ھۆكۈمەتنىڭ سۈرىيەدىكى «شام ئىسلام دۆلىتى»  قوراللىقلىرىغا ھاۋا ھۇجۇمى ئېلىپ بېرىشىنى قوللىغان.

   ئەنگلىيە دىپلوماتىيە ۋەزىرىنىڭ ئېيتىشىچە، ئەنگلىيە  ھاۋا ئارمىيەسىنىڭ سەككىز بومباردىمانچى ئايروپىلانى نۆۋەتتە سىپروستىكى ھاۋا  ئارمىيە بازىسىدا بۇيرۇق كۈتۈۋاتقان بولۇپ، ئەڭ بالدۇر بولغاندا ئۈچ كۈن ئىچىدە  جەڭگە ئاتلانسا بولىدىكەن.