ئىيۇلدىن باشلاپ ئۈرۈمچىنىڭ مەركىزىي شەھەر رايونلىرىدا ئاپتوموبىللار سىگنال بەرسە ۋە قاتناش بەلگە چىرىغىنى بۆسۈپ ئۆتسە، بەلگىلىمىگە خىلاپ توختىتىلسا، ئوخشاشلا جەرىمانە قويۇلىدۇ.
ئۈرۈمچى شەھەرلىك خەلق ھۆكۈمىتى 24- ئىيۇن «ئۈرۈمچى شەھىرىنىڭ بىر قىسىم رايونلىرى (يول بۆلەكلىرى) دا موتورلۇق قاتناش ۋاسىتىلىرىنىڭ سىگنال بېرىشىنى مەنئى قىلىشقا مۇناسىۋەتلىك ئۇقتۇرۇشى» نى تارقاتتى. بۇ ئارقىلىق شەھەر رايونلىرىدىكى قاتناشنىڭ شاۋقۇنىنى ئۈنۈملۈك تىزگىنلەپ ۋە تۆۋەنلىتىپ، قاتناش شاۋقۇنىنى دۆلەتنىڭ مۇھىت ئاسراش دائىرىسىدىكى شەھەر ئۆلچىمىگە يەتكۈزۈشكە كاپالەتلىك قىلغىلى، شەھەر ئاھالىسىگە ياخشى قاتناش مۇھىتى يارىتىپ بەرگىلى بولىدىكەن، ئۈرۈمچى شەھەرلىك خەلق ھۆكۈمىتى 2015- يىلى 1- ئىيۇلدىن باشلاپ موتورلۇق قاتناش ۋاسىتىلىرىنىڭ بىر قىسىم رايون (يول بۆلەكلىرى) لاردا سىگنال بېرىشىنى مەنئى قىلىشنى قارار قىلغان.
‹‹ئۇقتۇرۇش» قا ئاساسەن، تاشقى ئايلانما يولىنى چۆرىدىگەن رايون (تاشقى ئايلانما قەۋەت يولىنىڭ ئاستىدىكى يوللارنى ئۆز ئىچىگە ئالىدۇ) ۋە سىگنال بېرىشنى مەنئى قىلىش بەلگىسى ئورنىتىلغان يول بۆلەكلىرىدە سىگنال بېرىش مەنئى قىلىنىدىكەن؛ 2015- يىلى 1- ئىيۇلدىن 14- ئىيۇلغىچە تەشۋىق - تەربىيە مەزگىلى ئىكەن، 15- ئىيۇلدىن باشلاپ خىلاپلىق قىلغانلار قانۇن بويىچە جازالىنىدىكەن.