ئېشەك بىلەن ئات بىر ئېغىلدا تۇرىدىكەن ، ئېشەك كۆپىنچە چاغلاردا ئات ئۆزىنىڭ گەپلىرىگە زەن سالمىغاندەك ھېس قىلىدىكەن . شۇنىڭ بىلەن ، ئېشەك ئاتنىڭ قۇلىقىنىڭ دەردى بار دەپ گۇمانلىنىپ قاپتۇ . بىر كۈنى ئېشەك بىر ياخشى ئامالنى ئويلاپ تېپىپ ، ئاتنىڭ قۇلىقىنىڭ ئېغىر ياكى ئېغىر ئەمەسلىكىنى تەكشۈرۈپ كۆرۈشنى ئويلاپتۇ…

ئۇزۇن ئۆتمەي ئېشەك ئۆزىنىڭ خىيالىنى ئەمەلگە ئاشۇرۇپتۇ . ئۇ پۇتىنىڭ ئۇچىدا مېڭىپ ، ئاتنىڭ كەينىدىن ئون مېتىرچە يېقىنلاپ :
- ھەي قېرى ئات ، مەن ساڭا گەپ قىلىۋاتىمەن ، ئاۋازىمنى ئاڭلىدىڭمۇ ؟-دەپتۇ .ئېشەك خېلى ئۇزۇنغىچە ساقلىسىمۇ ھېچقانداق ئىنكاس ئاڭلانماپتۇ . ئون مېتىر بەك يىراق بولۇپ كەتكەن ئوخشايدۇ دەپ ئويلاپ ، ئاتقا بەش مېتىرچە يېقىنلىشىپ :
- ھەي قېرى ئات ، مەن ساڭا گەپ قىلىۋاتىمەن ، ئاۋازىمنى ئاڭلىدىڭمۇ ؟ئاڭلىغان بولساڭ جاۋاپ قايتۇرغىن ، – دەپتۇ .
بىراق ، ئېشەك يەنە بىر ئاز ساقلىغان بولسىمۇ ، ئاتتىن زۇۋان چىقماپتۇ . ئاھ تەڭرىم ، ئۇنىڭ قۇلىقىدىكى چاتاق ئىنتايىن ئېغىر ئىكەن ! مەن يەنە يېقىنراق باراي ، دەپ ئويلىغان ئېشەك ئالدىغا بىر نەچچە قەدەم مېڭىپتۇ . ئاتقا ئۈچ مېتىرلا قاپتۇ . ئېشەك :
-قېرى ئات ، مەن ساڭا گەپ قىلىۋاتىمەن ، ئاۋازىمنى ئاڭلىدىڭمۇ ؟ ئاڭلىغان بولساڭ ، ماڭا جاۋاپ قايتۇر ، – دەپتۇ .
-ئاڭلىدىم ، – دەپتۇ ئات ، – بۇ ئۈچۈنجى قېتىم ساڭا جاۋاپ بېرىشىم . يەنە بار ، مەن سەندىن بەك بىزار بولدۇم ، سەن قۇلىقىڭنى داۋالاتساڭ بولغۇدەك .

ھېكمەت :

بىلەرمەن ئادەمنىڭ قۇلىقى ئېغىر بولۇپلا قالماستىن يەنە ئۇنىڭ قەلبىمۇ خىرەلىشىدۇ .
كۆپ ھاللاردا ئۆزىمىزدىن سەۋەپ ئىزدىشىمىز كېرەك ، بولمىسا خۇددى ئاشۇ دۆت ئېشەككە ئوخشاپ قالىمىز .

مەنبە : « ھاياتىڭىزغا تەسىر كۆرسىتىدىغان پەلسەپىۋى مەسىلىلەر » ناملىق كىتاپتىن ئېلىندى .