8–دېكابىر مۇخبىرنىڭ ئۈرۈمچى شەھەرلىك جامائەت خەۋپسىزلىكى ئىدارىسىدىن ئىگىلىشىچە ، ئۈرۈمچى شەھەرلىك جامائەت خەۋپسىزلىكى ئورگىنى 2014–يىل 10–دېكابىردىن 25–دېكابىرغىچە نوپۇس ۋە ئاھالىلەر كىملىكى كەسپىنى بېجىرىشنى توختىتىدىكەن .

ئۈرۈمچى شەھەرلىك جامائەت خەۋپسىزلىكى ئىدارىسىنىڭ ئالاقىدار مەسئۇلىنىڭ تونۇشتۇرۇشىچە ، ئاپتونوم رايونلۇق جامائەت خەۋپسىزلىكى نازارىتىنىڭ بەلگىلىمىسىگە ئاساسەن ، نوپۇس ۋە كىملىك بېجىرىش كەسپى ۋاقىتلىق توختىتىلىدىغان بولۇپ ، بۇنىڭدىكى مەقسەت ئۈرۈمچى شەھىرىنىڭ يىل ئاخىرىدىكى نوپۇس ئىستاتىستىكا خىزمىتىنى ئوڭۇشلۇق ئېلىپ بېرىش ئۈچۈن ئىكەن .

بېجىرىشنى توختىتىشتىكى كونكرېت ۋاقىت : 2014–يىل 10–دېكابىر سائەت 24:00 تىن 25–دېكابىر سائەت 24:00 گىچە بولۇپ ، شەھەر بويىچە ھەر دەرىجىلىك جامائەت خەۋپسىزلىكى ئورگانلىرى ھەممىسى نوپۇس ۋە ئاھالىلەر كىملىكى بېجىرىشنى توختىتىدىكەن . نوپۇس ۋە ئاھالىلەر كىملىكىنى بېجىرىش كەسپى 26–دېكابىردىن باشلاپ ئەسلىگە كەلتۈرۈلىدىكەن .