ئاياللار كېسەللىرى دېگىنىمىز ئاياللارنىڭ كۆپىيىش ئەزالىرىدا كۆرۈلىدىغان سىرتقى جىنسىي ئەزا ياللۇغى، جىنسىي يول ياللۇغى، بالىياتقۇ بوينى ياللۇغى ۋە داس بوشلۇقى ياللۇغى قاتارلىق كېسەللەرنى كۆرسىتىدۇ. بۇ كېسەللەر ئاياللارنىڭ روھىي ۋە جىسمانىي ساغلاملىقىغا ئېغىر تەسىر كۆرسىتىدۇ، مەسىلەن: ۋاقتىدا داۋالىنالماي كېسەل ئەھۋالى ئېغىرلىشىپ كەتسە، تۇغماسلىقنى كەلتۈرۈپ چىقىرىشى مۇمكىن. شۇڭا ئاياللار سالامەتلىكىنى چوقۇم قەرەللىك ھالدا تەكشۈرتۈپ تۇرۇش، كېسەل بايقالغان ھامان داۋالىتىش كېرەك.

ئاياللار كېسەللىرىنى قانداق ۋاقىتتا تەكشۈرتسە ئەڭ مۇۋاپىق بولىدۇ؟

تەكشۈرتۈش ھەيز مەزگىلىگە توغرا كېلىپ قالماسلىقى كېرەك

ئەڭ ياخشىسى ھەيزدىن پاكىزلىنىپ ئۈچ كۈندىن يەتتە كۈنگىچە بولغان ئارىلىقتا تەكشۈرتۈش كېرەك، چۈنكى بۇ چاغدا كونا بالىياتقۇ ئىچكى پەردىسى پاكىز چۈشۈپ كېتىپ، يېڭى بالىياتقۇ ئىچكى پەردىسى ئەمدىلا ئۆسۈشكە باشلىغان بولغاچقا، بالىياتقۇ ئىچكى پەردىسىنىڭ قېلىنلىقى مۇۋاپىق بولىدۇ، تەكشۈرگەن چاغدا بالىياتقۇ ئىچكى پەردىسىنىڭ زەخىملىنىشى سەۋەبىدىن كۆپ مىقداردا قاناپ كېتىشىدىن ساقلانغىلى بولىدۇ.

بالىياتقۇ ئىچكى پەردىسى تىرىك توقۇلمىلىرىنى تەكشۈرتۈش

ئەگەر تۇغماسلىق كېسىلى ئاغرىقلىرى بولسا، تۇخۇمدان سېرىق تەنچىسىنىڭ ئىقتىدارىنى بىلىشكە ۋە بالىياتقۇ ئىچكى پەردىسى تۇبېركۇليۇزىنى ئېلىۋېتىشكە توغرا كېلىدۇ. ئەگەر تەكشۈرتۈش دەۋرى قاتتىق بولغان ھامىلىدارلىقتىن ساقلانغۇچىلار بولسا، ھەيز كۆرۈشتىن ئىككى – ئۈچ كۈن بۇرۇن ئېلىۋېتىش كېرەك. ئادەتتە نورمال ھەيزنىڭ يۇقىرى پەللىسى كەلگەن بىرىنچى كۈنى 12 سائەت ئىچىدە قىرىپ ئېلىۋەتسىمۇ بولىدۇ.

تۇرۇبا يولىنىڭ راۋانلىقىنى تەكشۈرتۈش

بەزى ئاياللار كېسەللىرى ئوپېراتسىيەسى ياكى بەزى ئاياللار كېسىلى مەشغۇلاتلىرى، مەسىلەن: تۇغۇت چەكلەش ئۈزىكىنى ئېلىش ۋە سېلىش، بالىياتقۇ بوينىنى داۋالاش، بالىياتقۇ ئەينىكىدە تەكشۈرۈش ۋە بالىياتقۇنى سايىلەندۈرۈش قاتارلىقلار ھەيز پاكىزلىنىپ ئۈچ كۈندىن يەتتە كۈنگىچە بولغان ۋاقىتتا ئېلىپ بېرىلىدۇ، شۇنىڭغا ئالاھىدە دىققەت قىلىش كېرەككى، ھەيز توختاپ تەكشۈرۈش ئارىلىقىدا يۇقۇملىنىپ قېلىشتىن ساقلىنىش ئۈچۈن ھەرگىز جىنسىي مۇناسىۋەت ئۆتكۈزۈشكە بولمايدۇ.

تۇخۇم توشۇش نەيچىسىدىن سۇيۇقلۇق ماڭدۇرۇش ياكى سايىلەندۈرۈش

بۇنداق تەكشۈرۈشنى چوقۇم تۇخۇم چىقىرىش مەزگىلىدىن بۇرۇن قىلىش كېرەك. ئەگەر بەك بۇرۇن بولۇپ قالسا، بالىياتقۇ بوشلۇقىدىكى جاراھەت يۈزلىرى تولۇق ساقىيىپ كەتمىگەنلىكى ياكى قېپقالغان بالىياتقۇ ئىچكى پەردىسى پارچىلىرىنىڭ سەۋەبىدىن، ئاسانلا سايىلەندۈرۈش دورىسى سىرتقا ئېقىپ كېتىش ياكى بالىياتقۇ ئىچكى پەردىسى يۆتكىلىپ كېتىش ئەھۋاللىرى كۆرۈلىدۇ؛ ئەگەر بەك كېچىكىپ كەتسە بالىياتقۇ ئىچكى پەردىسى قېلىنلىشىپ ، تۇخۇم توشۇش نەيچىسىنىڭ ئارىلىق توقۇلمىسى قىسمى توسۇلۇپ قالغاندەك ساختا كۆرۈنۈش پەيدا بولۇپ قېلىشى مۇمكىن.

ئاياللار كېسىلىنىڭ پەيدا بولۇش سەۋەبلىرى:

جىنسىي يولنى بەك كۆپ يۇيۇش: جىنسىي يولنى يۇيۇپ تۇرۇش بىر خىل ياخشى ئادەت، بىراق بەك كۆپ يۇيۇشقا بولمايدۇ. چۈنكى جىنسىي يولدا نۇرغۇن پايدىلىق باكتېرىيە توپلىرى ياشايدۇ، بەك كۆپ يۇيۇپ تازىلاپ تۇرغاندا جىنسىي يولنىڭ كىسلاتالىق مۇھىتى بۇزغۇنچىلىققا ئۇچراپ، پايدىلىق باكتېرىيە توپلىرى ئازىيىپ، جىنسىي يولنىڭ باكتېرىيەلىنىش خەتېرى ئېشىپ كېتىدۇ.

تازىلاش سۇيۇقلۇقلىرىنى كۆپ ئىشلىتىش: ئاياللار جىنسىي يولىنى دېزىنفېكسىيەلەش ئۈچۈن دائىم تازىلاش سۇيۇقلۇقلىرى بىلەن جىنسىي يولىنى يۇيۇپ تۇرىدۇ. ئەمما ئۇلار بۇ تازىلاش سۇيۇقلۇقلىرىنىڭ جىنسىي يولىنى غىدىقلاشتەك ئەكس تەسىرىىڭ بارلىقىغا سەل قارايدۇ، تاشقى جىنسىي يولنىڭ تېرىسى ناھايىتى نازۇك بولغاچقا، بۇ غىدىقلاشلار تاشقى جىنسىي يولنى ئاسانلا يۇقۇملاندۇرۇپ، تاشقى جىنسىي يول ياللۇغىنى پەيدا قىلىدۇ.

قوغداش سېلىنچىسىنى بەك كۆپ ئىشلىتىش: ھازىر نۇرغۇن ئايال قوغداش سېلىنچىسىنى كۆپ ئىشلىتىپ كالتە ئىشتاننى ھەر كۈنى يۆتكەشكە سەل قارايدۇ. قارىماققا بۇ ئىشتا ھېچقانداق مەسىلە يوقتەك كۆرۈنىدۇ، بىراق بەزى مىكرو ئورگانىزملار كالتە ئىشتاندا ئۇزاق ۋاقىت تۇرۇپ قالسا، ئاسانلا جىنسىي يول ئارقىلىق كۆپىيىش ئەزالىرىغا كىرىپ، تۈرلۈك ئاياللار كېسەللىرىنى پەيدا قىلىدۇ.

جىنسىي تۇرمۇش پاكىز بولماسلىق:

جىنسىي تۇرمۇش يۇقۇملۇق كېسەل باكتېرىيەلىرىنى ئەڭ ئاسان تارقىتىدىغان بىر خىل ۋاسىتە بولۇپ، نۇرغۇن كېسەل باكتېرىيەلىرى جىنسىي تۇرمۇش ۋاقتىدا ئۆزئارا يۇقۇملاندۇرۇشنى كەلتۈرۈپ چىقىرىدۇ. جىنسىي تۇرمۇشتا پاكىزلىققا ئەھمىيەت بەرگەندە، باكتېرىيەلىك يۇقۇملىنىشنى زور دەرىجىدە تۆۋەنلەتكىلى بولىدۇ. شۇڭا جىنسىي تۇرمۇشنىڭ ئالدى – كەينىدىكى تازىلىققا ئەھمىيەت بېرىش كېرەك. 