يەر شارى خەۋەر تورى 26-ئاپرېل خەۋىرى؛ لەگلەك تورى تەرجىمىسى: ئىران تاشقى ئىشلار مىنىستىرى مۇھەممەد جەۋاد زەرىف باشچىلىقىدىكى ئىران يادرو مۇزاكىرە ھەيئىتىنىڭ بۈگۈن ئەتتىگەن يىغىنغا قاتنىشىش ئۈچۈن نىيو يوركقا بېرىشقا تەييارلانغانلىقى بىلدۈرۈلدى. ئىران رەسمى خەۋەر ئاگېنتلىقى «ئىرنا» نىڭ خەۋىرىگە ئاساسلانغاندا، جەۋاد زەرىف باشچىلىقىدىكى ئىران يادرو مۇزاكىرە ھەيئىتى، يادرو قۇراللىرىنىڭ كېڭىيىشىنىڭ ئالدىنى ئېلىش كېلىشىمىنى كۆزدىن كەچۈرۈش يىغىنىغا قاتنىشىش ئۈچۈن بۈگۈن سەھەر نىيو يوركقا بېرىپ، ئامېرىكا تاشقى ئىشلار مىنىستىرى جون كېررىي، ياۋرۇپا ئىتتىپاقى تاشقى مۇناسىۋەتلەر بىخەتەرلىك سىياسىتى ئالى ۋەكىلى Federica Mogherini ۋە 5+1 گۇرۇپپىسى تاشقى ئىشلار مىنىستىرلىرى بىلەن ئ‍ۇچرىشىدۇ.
ئىران بىلەن بىرلەشكەن دۆلەتلەر تەشكىلاتى بىخەتەرلىك كومىتىتىنىڭ دائىمى ئەزالىرى ئامېرىكا، روسىيە، جۇڭگو، ئەنگىلىيە ۋە فرانسيە بىلەن گېرمانىيەدىن تەشكىللەنگەن 5+1 گۇرۇپپىسى ئارىسىدا ئۆتكۈزۈلگەن يادرو مۇزاكىرىسىدە 2-ئاپرېل يارىشىش ھاسىل بولغان ئىدى. ھەر قايسى تەرەپلەر 30-ئىيۇنغا قەدەر ئەڭ ئاخىرقى كېلىشىمنى ئىمزالاشنى نىشان قىلىۋاتىدۇ.
شىۋىتسارىيەنىڭ لوزان شەھىرىدە 2-ئاپرېلدا ھاسىل بولغان رامكا كېلىشىمىدىن كېيىن ھەل قىلغۇچ كېلىىشمنىڭ تېكىستىنى تەييارلاش ئۈچۈن چارشەنبە كۈنى تاشقى ئىشلار مىنىستىرلىرى ياردەمچىلىرى ئارىسىدا ئاۋىسترالىيە پايتەختى ۋىيانادا ئۇچرىشىش بولغان ئىدى، ھەر قايسى تەرەپلەر ھەل قىلغۇچ كېلىشىم تېكىستىنىڭ يېزىلىشىغا باشلانغانلىقىنى ئېلان قىلغان ئىدى. نىيۇ يوركتا تاشقى ئ‍شىلار مىنىستىرلىرى ياردەمچىلىرى ۋە مۇتەخەسسىسلەر ئارىسىدىكى سۆھبەتكە قاتنىشىدىغان مۇزاكىرىچى تەرەپلەرنىڭ ھەل قىلغۇچ كېلىشىم تېكىستىنى تەييارلاشنى داۋاملاشتۇردىغانلىقى بىلدۈرۈلدى. تاشقى ئ‍شىلار مىنىستىرى جەۋاد زەرىف ۋە ئامېرىكا تاشقى ئىشلار مىنىستىرى جون كېررىينىڭ دۈشەنبە كۈنى نىيو يوركتا ئۇچرىشىپ سۆھبەتتە بولىدىغانلىقى بىلدۈرۈلدى.