10 – نۆۋەتلىك رۇسىيە ئۆسمۈرلەر خەلقئارا پۇتبول لەۋھە تالىشىش مۇسابىقىسى 28 – مايدىن 30 – مايغىچە رۇسىيەنىڭ سوچى شەھىرىدە ئۆتكۈزۈلدى. مۇسابىقىدە جۇڭگو ئاتۇش ئۆسمۈرلەر پۇتبول كوماندىسى 15 ياشلىقلار گۇرۇپپىسى بويىچە چېمپىيون بولۇپ، 31 – ماي كەچتە زەپەر قۇچۇپ ئۈرۈمچىگە قايتىپ كەلدى.
ئۇقۇشىمىزچە، رۇسىيە مەكتەپ پۇتبول مۇسابىقىسىگە دەسلەپتە رۇسىيە تەۋەلىكىدىكى ئۆسمۈرلەر پۇتبول كوماندىلىرى قاتناشقان بولۇپ، كۆپ قېتىملىق تاللاش مۇسابىقىسىدىن كېيىن سەككىز كۈچلۈك كوماندا تاللىنىپ چىققان. رۇسىيە مائارىپ مىنىستىرلىقى ئاخىرقى باسقۇچتىكى مۇسابىقە سەۋىيەسىنى ئۆستۈرۈش ئۈچۈن، مۇسابىقىنى خەلقئارالىق تەكلىپ مۇسابىقىسىگە ئۆزگەرتكەن. شۇنىڭ بىلەن، 15 ياشلىقلار گۇرۇپپىسى بىلەن 13 ياشلىقلار گۇرۇپپىسىغا چەت ئەلدىن كوماندا تەكلىپ قىلغان.
بۇ مۇسابىقىگە ئاپتونوم رايونىمىزدىن ئىككى كوماندا قاتناشقان، جۇڭگو شىنجاڭدىن تەشكىللەنگەن 14 – 15 ياشلىقلار پۇتبول كوماندىسى، ئاساسلىقى، ئاتۇشتىكى ئوتتۇرا مەكتەپ ئوقۇغۇچىلىرى بىلەن قارامايلىق بىر ئوقۇغۇچىدىن تەركىب تاپقان بولۇپ، جۇڭگو ئاتۇش كوماندىسى، دەپ ئاتالغان. 15 ياشلىقلارنىڭ گۇرۇپپا مۇسابىقىسىدە جۇڭگو ئاتۇش كوماندىسى 1:0 نەتىجە بىلەن كاباردىنو – بالكار كوماندىسىنى، 11:1 نەتىجە بىلەن يېڭى سىبىرىيە كوماندىسىنى، 14:0 نەتىجە بىلەن ئارخانگېرك كوماندىسىنى يېڭىپ، ئاخىرقى مەيداندا 3:3 نەتىجە بىلەن ئالانلار كوماندىسى بىلەن تەڭلىشىپ، گۇرۇپپىدا 1 – لىكنى قولغا كەلتۈرگەن، چارەك ھەل قىلغۇچ مۇسابىقىدە قارشى تەرەپ كوماندىسىنى 6:0 نەتىجە بىلەن يەڭگەن، يېرىم ھەل قىلغۇچ مۇسابىقىدە موسكۋا كوماندىسى بىلەن 3:3 نەتىجە بىلەن تەڭلىشىپ قېلىپ، نۇقتا توپ جېڭىدە 5:4 نەتىجە بىلەن بۇ كوماندىنى يېڭىپ، ھەل قىلغۇچ مۇسابىقە باسقۇچىغا كىرگەن. ھەل قىلغۇچ مۇسابىقىدە جۇڭگو ئاتۇش كوماندىسى ئىلگىرى گۇرۇپپا مۇسابىقىسىدە ئۇچرىشىپ تەڭلەشكەن ئالانلار كوماندىسى بىلەن مۇسابىقىلىشىپ، 3:2 نەتىجە بىلەن بۇ كوماندىنى يېڭىپ چېمپىيونلۇققا ئېرىشكەن.
جۇڭگو شىنجاڭنىڭ 13 ياشلىقلار گۇرۇپپىسىدىكى پۇتبول كوماندىسى جۇڭگو قاراماي كوماندىسى، دەپ ئاتالغان. بۇ كوماندا تۇنجى مەيدان گۇرۇپپا مۇسابىقىسىدە بېلورۇسكى كوماندىسىنى 8:3 نەتىجە بىلەن، كىراسنويارىسكىي كوماندىسىنى 7:1 نەتىجە بىلەن، ئادىگېي كوماندىسىنى 3:0 نەتىجە بىلەن، سانتپېتىربۇرگ كوماندىسىنى 6:0 نەتىجە بىلەن يېڭىپ، گۇرۇپپا مۇسابىقىسىدە 1 – بولغان، لېكىن چارەك ھەل قىلغۇچ مۇسابىقىدە ئىنتېر – 7 كوماندىسى بىلەن تەڭلىشىپ، نۇقتا توپ جېڭىدە يېڭىلىپ قالغان.