«ئادەم بەختكە، دەرەخ كۆكلەشكە ئىنتىلىدۇ». قايسى بىر يىگىت بەختكە ئىنتىلمەيدۇ؟ قايسى بىر يىگىت گۈزەل مۇھەببەتكە تەلپۈنمەيدۇ؟ كىشىلەرنىڭ بەختكە بولغان چۈشىنىشى ئوخشاش بولمىغانلىقتىن، مۇھەببەتكە ئىنتىلىش ئۆز ئىچىگە ئالغان مەزمۇنىمۇ ئوخشاش بولمايدۇ. بەزى يىگىتلەر چىرايلىق قىزغا ئېرىشىشنى بەخت دەپ بىلىدۇ، ئۇلار قىزنىڭ قەلبىگە قارىماستىن ھەدېسىلا قىزنىڭ تاشقى كۆرۈنۈشنى قوغلىشىدۇ، گۈزەل چىراي ئۇلارنىڭ مۇھەببەت ئاساسى بولۇپ قالىدۇ.

      بەزى يىگىتلەر مۇھەببەتنى جىنسىي ھەۋەس دەپ قارايدۇ، ئۇلارنىڭ مۇھەببەتكە ئىنتىلىشى ھەۋىسىنى قاندۇرۇش ئۈچۈن، قىز دوستىغا ئىپادىلىگەن قىزغىنلىقى ۋە كۆيۈنۈشى قىز دوستىنى ئىگىلىۋېلىپ، ئۆزىنىڭ جىنسىي تەلىپىنى قاندۇرۇش ئۈچۈندۇر. شۇڭا قىز دوستى تېنى بىلەن ئۇنىڭغا ماقۇللۇق بېرىپ، ئۆزىنىڭ ئىپپەت-نومۇسنى تەقدىم قىلسا، بۇ ئۇنىڭ ئۈچۈن بەخت ھېسابلىنىدۇ.

    بەزى يىگىتلەر قىز دوستىنىڭ ئاتا-ئانىسىنىڭ ھوقۇقى، ئورنى ئىنتايىن مۇھىم دەپ بىلىپ، ئۇنى يۇقىرىغا ئۆرلەشنىڭ شوتىسى، ئىستىقبالىنىڭ نۇرلۇق چىرىقى دەپ قارايدۇ. بەختنى قىز دوستىنىڭ مۇھەببىتىدىن ئەمەس، بەلكى قىز دوستىنىڭ ئاتا-ئانىسىدىن كۈتىدۇ.

         بەزى يىگىتلەر بىر كۆرۈپلا ئاشىق بولۇپ قېلىشنى ئەتىۋارلايدۇ. بۇنداق مۇھەببەتنى ئەڭ رومانتىك، ئەڭ بەختلىك ھېس قىلىدۇ. شۇنىڭ ئۈچۈن چۈشەنمەي، كۆزەتمەي، ئەخلاق-پەزىلىتى، ئىستىلىنى سۈرۈشتۈرمەي تۇرۇپلا تۇنجى تەسىرگە قاراپ، ھېسسىياتىدىكى بىردەملىك قوزغىلىشىنىڭ كەينىگە كىرىدۇ-دە، مۇھەببەت ئالمىسىنى خالىغانچە ئېتىپ، بەخت گۈلىنىڭ ئۆزىگە قاراپ ئېچىلىشىنى كۈتىدۇ. 

      بىراق، گۈزەل قىزنىڭ قەلبىنىڭ گۈزەل بولۇشى ناتايىن، ئىشقى ھەۋەسنى قوغلىشىش ھەقىقى مۇھەببەتنى ئىزدىگەنلىك بولمايدۇ، بىر كۆرۈپلا ئاشىق بولۇش كۆپ ھاللاردا ئىشەنچلىك بولمايدۇ، ھوقۇق، نوپۇز  دېيىلگەنلەر بەختلىك نىكاھنىڭ ئورنىغا دەسسىيەلمەيدۇ. ئۇنداقتا كىشىلىك دۇنيادىكى ئەڭ گۈزەل مۇھەببەت قەيەردە؟ يىگىتلىرىمىز ئۆزىنىڭ «بەخت بىناسى»نى قانداق قۇرۇپ چىقىشى كېرەك؟

     يىگىت-قىز ئىككى تەرەپنىڭ بىر-بىرىنى ياخشى كۆرۈشى، ياقتۇرۇشى ھەممىدىن ئۈستۈن تۇرىدىغان مۇھەببەت ئاساسىغا ئايلىنىدۇ. بىر جۈپ ئاشىق-مەشۇقلارنى ئۆزئارا تۇتاشتۇرۇپ تۇرىدىغان ئامىللار ھەقىقەتەنمۇ خېلى كۆپ، بىراق ئەڭ پۇختا، ئەڭ ئۇزاققىچە تۇتۇپ تۇرالايدىغىنى يەنىلا ئىككى يۈرەكنى باغلاپ تۇرىدىغان مۇھەببەت رىشتىسىدۇر. ئۆز ئارا ياخشى كۆرۈشۈش پاك ھەم گۈزەل ھېسسىياتنى يېتىلدۈرىدۇ، ئۆز ئارا ياخشى كۆرۈشۈش بەختنىڭ قۇرۇماس بۇلىقىدۇر.

     يىگىت-قىز ئىككى تەرەپ ئورتاق غايە ئۈچۈن بىر-بىرىنى ياخشى كۆرۈشۈپ بىللە بولۇشسا، مۇھەببەت كېمىسىنى بەخت قارارگاھىغا ئوڭۇشلۇق ھالدا يەتكۈزگىلى بولىدۇ. پىداكارلىق، سادىقلىق مۇھەببەتنىڭ ئەڭ قىممەتلىك بايلىقىدۇر، يىگىت-قىز ئىككى تەرەپ مۇھەببەتكە سادىق بولسا، ئەڭ زور بەختكە ئېرىشكەن بولىدۇ.

     مۇھەببەتلەشكەن ئىككى تەرەپنىڭ ئۆز ئارا كۆيۈنۈشى، ئورتاق ئارزۇ-ئىستىكى ۋە مۇھەببەتكە بولغان پىداكارلىقى، سادىقلىقى بەختلىك مۇھەببەتتىنىڭ ئۈچ ئاساسىي ئامىلىنى شەكىللەندۈرىدۇ. مۇھەببەتنىڭ قولۋىقى بۇ لىنىيەدىن چەتنىگەن ھامان، كىشى ئازاب دېڭىزىغا كىرىپ قېلىشى، مۇھەببەت داتلىشىپ قالغان زەنجىرگە ئايلىنىپ، بىر-بىرىنى ئازابلىشى مۇمكىن. بۇنىڭدا بەختتىن سۆز ئېچىش ھەرگىز مۇمكىن ئەمەس.