«يەر شارى تورى خەۋىرى» نۇر تورى تەرجىمىسى:

سىنگاپور «سەھەر بىرلەشمە گېزىتى»نىڭ 23- مارتتىكى خەۋىرىگە  قارىغاندا، ئامېرىكا زۇڭتۇڭى ئوباما 22- مارت، پۈتۈن ئامېرىكىدا بايراقنى بەش كۈن يېرىم چۈشۈرۈپ تېررورلۇق ھۇجۇمىدا قازا قىلغانلار تەزىيە بىلدۈرۈشكە بۇيرۇق چۈشۈرگەن. خەۋەرگە قارىغاندا، ئوبا شۇ كۈنى ئاق سارايدا ئېلان قىلغان زۇڭتۇڭ باياناتىدا:«ئامېرىكا خەلقى بېلگىيە خەلقى بىلەن قەتئىي بىر مەيداندا تۇرىدۇ، ئامېرىكا تەرەپ بارلىق زۆرۈر تەدبىرلەرنى قوللىنىپ ۋە خەلقئارادىكى باشقا دۆلەتلەر بىلەن ھەمكارلىشىپ، تېررورلۇق ھۇجۇمىنىڭ پەردە ئارقىسىدىكى پىلانلىغۇچىسىنى قانۇن بويىچە بىر تەرەپ قىلىدۇ ھەمدە خەلقنىڭ بىخەتەرلىكىگە تەھدىت سالغان تېررورچىلارغا قاتتىق زەربە بېرىدۇ» دېگەن. ئوباما يەنە تېررورلۇق ھۇجۇمىدا قازا قىلغانلارغا تەزىيە بىلدۈرۈش ئۈچۈن، 22- مارتتىن باشلاپ، ئاق ساراي، پۈتۈن ئامېرىكىدىكى بارلىق ئاممىۋى سورۇنلار، بارلىق ھەربىي ئىشلار بازىسى، دېڭىز ئارمىيە بازىسى ۋە بارلىق فېدېراتسىيە ھەربىي كېمىلىرىنىڭ 3- ئاينىڭ 26- كۈنى كۈن ئولتۇرغانغا قەدەر بايراقنى يېرىم چۈشۈرۈشىگە بۇيرۇق چۈشۈرگەن. ئوباما يەنە، ئوخشاش ۋاقىتتا، ئامېرىكىنىڭ چەتئەلدە تۇرۇشلۇق بارلىق باش ئەلچىخانىلىرى، ئىككىنچى دەرىجىلىك ئەلچىخانىلىرى، كونسۇلخانىسى ۋە ھەربىي ئىشلار ئەسلىھەسىنى ئۆز ئىچىگە ئالغان ھەربىي كېمىلەر ھەمدە ئامېرىكىدا تۇرۇۋاتقان بارلىق چەتئەل ئەسلىھەلىرى بايراقنى يېرىم چۈشۈرۈپ، قازا قىلغۇچىلار ئۈچۈن تەزىيە بىلدۈرىدۇ،دېگەن. ئوباما شۇ كۈنى بېلگىيە باش ۋەزىرى مىشېل بىلەن تېلېفونلىشىپ، ئامېرىكىنىڭ بېلگىيە، ش ئا ئە ت ۋە ياۋروپا ئىتتىپاقىنى قوللايدىغانلىقىنى بىلدۈرگەن. خەۋەردە دېيىلىشىچە، 22- مارت بىريۇسسېلنىڭ شەھەر سىرتىدىكى زاۋېنتېم ئايرودرومىدا ۋە شەھەر ئىچىدىكى ياۋروپا ئىتتىپاقى باش ئىشتابىنىڭ يېقىن ئەتراپىدىكى مېترو بېكىتىدە زەنجىرسىمان پارتلىتىش ھۇجۇمى يۈز بېرىپ، 34 ئادەم قازا قىلىپ،187 ئادەم يارىلانغان. ئەسەبىي تەشكىلات «ئىسلام دۆلىتى» بۇ قېتىملىق ھۇجۇمغا مەسئۇل بولىدىغانلىقىنى جاكارلىغان.