يەر شارى خەۋەر تورى 27-ئاپرېل خەۋىرى؛ لەگلەك تورى تەرجىمىسى: سۇرىيەدە ئۆكتىچىلەر ئىدلىبنى كونترول قىلغاندىن كېيىن ھەلەبتە «فەتىھ ئارمىيسى» گۇرۇپپىسى نامىدا بىرلەشتى. سۇرىيەلىك ئ‍ۆكتىچىلەر «فەتىھ ئارمىيسى» گۇرۇپپىسى نامىدا بىرلىشىپ ئىدلىب رايۇن مەركىزى ۋە قىشلاقلىرىنى كونترول قىلغاندىن كېيىن، ھەلەبنى كونترول قىلىش ئۈچۈن «ھەلەب فەتىھ ئارمىيسى» گۇرۇپپىسى نامىدا ھەرىكەت قىسمى قۇرغانلىقىنى بىلدۈردى. بىرلەشمە ھەرىكەت قىسمىغا قاتنشقان ئۆكتىچى گۇرۇپپىلار تەرىپىدىن ئېلان قىلىنغان يازما باياناتتا، «ھەلەبنىڭ قۇتقۇزۇلىشى ئ‍ۈچۈن كۈچنىڭ بىرلىشىشى» نىشانى بىلەن ھەلەبتە «فەتىھ ھەلەب» نىڭ قۇرۇلغانلىقى بىلدۈرۈلدى. ئىدلىب ۋە جىسر ئەش-شۇگۇر كونترول قىلىنغاندىن كېيىن قۇرۇلغان بىرلەشمە ھەرىكەت قىسىمىغا، شام فرونتى، شام ئارمىيە توپى، ئەھرارۇششام ئىسلام ھەرىكىتى، ئىسلام ئارمىيىسى قاتارلىق ئۆكتىچى گۇرۇپپىلار قاتناشتى. باياناتتا يەنە، ھەلەبتە ئۇرۇش قىلىۋاتقان باشقا ئۆكتىچى گۇرۇپپىلارغا «فەتىھ ھەلەب» بىرلەشمىسىگە قاتنىشىش ئۈچۈن چاقىرىق قىلىندى. ئەركىن سۇرىيە ئارمىيىسى ۋە باشقا ئ‍ۆكتىچى قۇراللىق گۇرۇپپىلار ھەلەب رايۇنىنىڭ يۈزدە 60% نى كونترول قىلىپ تۇرىۋاتىدۇ. ئۆكتىچىلەر يەر ئاستىدىن تونىل قېزىپ كونا ھەلەب شەھىرىدە ئەسەد قىسىملىرى كونتروللىقىدىكى ئىككى مۇھىم قارارگاھنى پارتىلاتقاندىن كېيىن، ھۆكۈمەت قىسىملىرى بىلەن ئۆكتىچىلەر ئارىىسدا قاتتىق توقۇنۇش يۈز بەردى. توقۇنۇشتا ئ‍ۆلگەن ۋە يارىلانغانلار ھەققىدە مەلۇمات بېرىلمىدى. سۇرىيەنىڭ شىمالىغا جايلاشقان دۆلەتنىڭ ئىككىنجى چوڭ شەھىرى بولغان ھەلەب شەھىرى 2 ھەپتىدىن بۇيان ھۆكۈمەت قىسىملىرىنىڭ ھاۋادىن بومباردىمان قىلىشىغا ئۇچرىماقتا. ئىدلىب رايۇنىدا «فەتىھ ئارمىيسى» نامىدا بىرلەشكەن ئۆكتىچىلەر تۈنۈگۈن ئىدلىبقا قاراشلىق كارمىد قارارگاھىنى كونترول قىلغان ۋە جىسر ئەش -شۇگۇر قىشلاقلىرىنى تامامەن كونتروللىقى ئاستىغا ئالغان.