ياپونىيە ھاكىمىيەت يۈرگۈزۈش ئىتتىپاقى كونتروللۇقىدىكى پارلامېنت ئاۋام پالاتاسى ئومۇمىي يىغىنى 16-ئىيۇل مەجبۇرىي ئاۋاز بېرىش ئارقىلىق ئابى شىنزو ھۆكۈمىتى تاپشۇرغان بىخەتەرلىك كاپالىتى قانۇن لايىھەسىنى ماقۇللىدى.
ئاۋاز بېرىش باشلىنىشتىن بۇرۇن، دېموكراتلار پارتىيەسى، يېڭىلىققا كۆچۈش پارتىيەسى، ياپونىيە كومپارتىيەسى، سوتسىيال دېموكراتلار پارتىيەسى، تۇرمۇش پارتىيەسى قاتارلىق ئاساسلىق ئۆكتىچى پارتىيەلەرنىڭ ئەزالىرى كەينى كەينىدىن مەيداندىن چىقىپ كېتىپ، ئاۋاز بېرىشكە قاتنىشىشنى رەت قىلىش شەكلى ئارقىلىق نارازىلىق بىلدۈردى.
ئابى شىنزو ھۆكۈمىتىنىڭ بىخەتەرلىك كاپالىتى قانۇن لايىھەسىنى مەجبۇرىي ماقۇللىشى ئاساسلىق ئەلرايىنىڭ كۈچلۈك قارشىلىقىغا ئۇچرىدى. ياپونىيە تاراتقۇلىرىنىڭ نۇرغۇن ئەلرايى تەكشۈرۈشلىرىدىن ئايان بولۇشىچە، 60 پىرسەنتكە يېقىن ياپونىيە ئاممىسى ئابى شىنزونىڭ بىخەتەرلىك كاپالىتى قانۇن لايىھەسىگە قارشى تۇرغان. ياپونىيەدىكى كۆپ سانلىق قانۇنشۇناسلار مۇنداق دەپ كۆرسەتتى: ھازىرقى ئاساسىي قانۇن ماددىسىغا تۈزىتىش كىرگۈزمىگەن ئەھۋالدا كوللېكتىپ قوغدىنىش ھوقۇقىنى چەكلەش بۇيرۇقىنى بىكار قىلىش، قوغدىنىش ئارمىيەسىنىڭ چەتئەللەردىكى ھەربىي ھەرىكىتىنى كېڭەيتىش ئاساسىي قانۇنغا خىلاپ، بۇ قوغدىنىش قىسمىنىڭ ئۇرۇشقا قاتنىشىش خەتىرىنى زور دەرىجىدە ئاشۇرۇۋېتىدۇ.