تۇرمۇشتا مۇنداق ئەھۋال كۆزگە چېلىقىپ تۇرىدۇ. بەزىلەر تەقدىرلەنسە گۈلقەقەلىرى ئېچىلىپ، تەنقىدلەنسە چىچاڭشىيدۇ. بۇنداق بولۇشىنىڭ سەۋەبلىرىمۇ كۆپ. ئۆزىنىڭ ئىچ – باغرىنى ئۆزى يېرىشنى راۋا كۆرمەسلىك بۇنىڭ مۇھىم سەۋەبى. ئۆزىنىڭ ئىچ باغرىنى ئۆزى يېرىش، ئەمەلىيەتتە ئۆزىنى ئۆزى دەڭسەش، تارازىغا سېلىپ بېقىشتۇر. ئۆزىنى ئادىللىق بىلەن دەڭسىيەلەيدىغان ئادەم ياخشى ئادەم، ئاقىل ئادەمدۇر. دەرۋەقە، ئۆزىنى دەڭسەش باشقىلارنى دەڭسەشتىن كۆپ قىيىن، ئۆزىنى دەڭسەش بەلگىلىك جۈرئەت تەلەپ قىلىدۇ. ئۆزىنىڭ ئىچ – باغرىنى دادىللىق بىلەن يېرىپ كۆرسىتىشكە جۈرئەت قىلالمايدىغان ئادەمنىڭ ئاجىزلىق ۋە كەمچىلىكلىرىنى تۈزىتىشى، ئۆزىنى كامال تاپقۇزۇشى تېخىمۇ مۇمكىن ئەمەس.

       قەدىمدىن ھازىرغىچە بەزى ئىجابىي شەخسلەرنىڭ ئوبرازى كىشىلەر قەلبىدە مەڭگۈلۈك ساقلىنىپ كېلىۋاتىدۇ. بۇنىڭدىكى ئورتاق قانۇنىيەت شۇكى، ئۇلار ئۆزىگە قاتتىق تەلەپ قويغان، ئۆزىنىڭ ئېسىل – پەزىلەتلىرى ئارقىلىق كىشىلەر قەلبىدىكى ئوبرازىنى نۇرلاندۇرغان. ئۆزىنىڭ ئاجىزلىق ھەم كەمچىلىكلىرىنى دائىم دەڭسەپ تۇرغاندىلا، ئۇنى ۋاقتىدا سېزىۋالغىلى، تۈزەتكىلى بولىدۇ. ھەر قانداق ئادەمنىڭ بىرەر ۋاقىتتا بىرەر ئىشتا ئۆزىنى دەڭسىيەلىشى ئاسان، ئەمما ئۇنى قەتئىي داۋاملاشتۇرۇپ، ئۆزىنى ھەممە ئىشتا ئىزچىل دەڭسەپ تۇرالىشى ئۇنچىۋالا ئاسان ئەمەس. شۇڭا ئۆزىنى دەڭسەش كىشىلىك ھاياتتىكى مەڭگۈلۈك قىيىن تېمىلارنىڭ بىرى. كىشىلىك ھاياتنىڭ يولى ئېقىنغا ئوخشاش ئەگرى – توقاي، تاغ يولىدەك ئېگىز – پەس بولىدۇ. كىشىلىك ھايات يولىدا مۇۋەپپەقىيەت ۋە غەلىبە قازانغانلارنىڭ قالدۇرغان ئىزىدا مۇنداق بىر يىمىرىلمەس ھەقىقەت ئىپادىلەنگەن: ئۇلار تىرىشىش، ئېلىشىش، ئىنتىلىش داۋامىدا ھامان ئىزچىل، ئەستايىدىل دەڭسەپ، بۇ ئارقىلىق ھامان ئاجىزلىقلىرىنى يېڭىپ، ئۆزىنى مۇكەممەللەشتۈرۈپ، ھاياتىدا كۈنسېرى سىلجىيالىغان. ئۆزىنى دەڭسەش پىكىر قىلىشنى خالىمايدىغان، قاراقورساقلار بىر مۇئەمما. پەقەت ئۆز – ئۆزىگە ‹‹سوئال›› قويالايدىغان، ئۆزىگە تەلەپ قويالايدىغان ‹‹ئۆزىنى – ئۆزى ئەيىبلەپ›› تۇرۇشنى بىلگەنلەرلا ئۆزىنى ھەقىقىي دەڭسىيەلەيدۇ.