ئىسرائىلىيە زۇڭلىسى نېتانياخۇ 9-ئىيۇل بايانات ئېلان قىلىپ مۇنداق دېگەن : ئىسرائىلىيە ئارمىيەسىنىڭ «تىغ قوغداش ھەرىكىتى (چېگرانى قوغداش)» پەلەستىن ئىسلام قارشىلىق ھەرىكىتى ( خاماس ) ۋە ئۇنىڭ غەززە رايونىدىكى قوراللىق كۈچلىرىگە داۋاملىق زەربە بېرىدۇ، خاماس ئىسرائىلىيەگە ئاتقان نەچچە يۈز راكېتا بومبىسى ئۈچۈن « ئېغىر بەدەل تۆلەيدۇ».

9-ئىيۇل، ئىسرائىلىيە ئارمىيەسىنىڭ «تىغ قوغداش ھەرىكىتى (چېگرانى قوغداش)» 2-كۈنىگە قەدەم قويدى. نېتانياخۇ بىلەن دۆلەت مۇداپىئە مىنىستىرى يائالون، ئىسرائىلىيە دۆلەت مۇداپىئە ئارمىيەسى باش ئىشتاب باشلىقى گەنزى بىرشېۋا شەھىرىدە بىخەتەرلىك يىغىنى ئېچىپ، بايانات ئېلان قىلغان. يىغىندا نېتانياخۇ يەنە مۇنداق دېگەن : ئىسرائىلىيە دۆلەت مۇداپىئە ئارمىيەسى يۈز بېرىش ئېھتىماللىقى بولغان ھەر قانداق جەڭ ئۈچۈن پۇختا تەييارلىق كۆرۈپ بولدى. ئانالىزچىلار : بۇ، ئىسرائىلىيە ئارمىيەسىنىڭ يەر يۈزى ھۇجۇمى قوزغايدىغانلىقىدىن بېشارەت بېرىدۇ، دەپ قارىغان. يائالون شۇ كۈنى، بۇ نۆۋەتلىك زەربە بېرىشنىڭ قىسقا ۋاقىت ئىچىدە ئاياغلاشمايدىغانلىقىنى بىلدۈرگەن.

ئىسرائىلىيە دۆلەت مۇداپىئە ئارمىيەسى بايانات ئېلان قىلىپ : 8-ئىيۇل سەھەردىن 9–ئىيۇلغىچە، 300 دىن ئارتۇق راكېتا بومبا غەززە رايونىدىن ئىسرائىلىيە چېگرىسىغا ئېتىلدى، بۇنىڭ ئىچىدىكى 53 ى «تۆمۈر گۈمبەز» ناملىق باشقۇرۇلىدىغان بومبا توسۇش سىستېمىسى تەرىپىدىن ئوڭۇشلۇق ھالدا توسۇۋېلىندى. ئىسرائىلىيەنىڭ شىمالىدىكى شەھەر خەيفا ئەتراپىدىكى غەززە رايونىغا تەخمىنەن 120 كىلومېتىر كېلىدىغان رايون ئېغىر دەرىجىدە راكېتا بومبىنىڭ تەھدىتىگە ئۇچرىدى. بۇ، خاماسنىڭ ھازىرغا ئەڭ يىراق ئارىلىقتىن قوزغىغان بىر قېتىملىق راكېتا بومبا ھۇجۇمى ھېسابلىنىدۇ، دېگەن.

بۇنىڭدىن باشقا، خاماس 9–ئىيۇل يەنە ئىسرائىلىيەنىڭ جەنۇبىدىكى دىمونا شەھىرىگە بىر نەچچە راكېتا بومبا ئاتقان. يەرلىك تاراتقۇلارنىڭ خەۋەر قىلىشىچە، دىمونا شەھىرىدە ئىسرائىلىيەنىڭ يادرو رېئاكسىيە قازىنى بار بولۇپ، دۆلەت ئىچىدىكى ئەڭ سەزگۈر رايونلارنىڭ بىرى ئىكەن. بۇ، بۇ رايوننىڭ تۇنجى قېتىم راكېتا بومبىنىڭ ھۇجۇمىغا ئۇچرىشى ئىكەن.

ئىسرائىلىيە ئارمىيەسى 8–ئىيۇلدىن 9–ئىيۇلغىچە بولغان ھەرىكىتىدە، غەززە رايونىدىكى تەخمىنەن 600 گە يېقىن نىشانغا زەربە بەرگەن، بۇنىڭ ئىچىدە 9–ئىيۇل كەچتىلا 100 دىن ئارتۇق نىشاننى ۋەيران قىلغان، بۇلار ئاساسلىقى خاماسنىڭ ھەربىي ئىشلار قوماندانلىق ئورنى، قورال ئەتكەسچىلىكى ئېلىپ بارىدىغان تونېل ۋە راكېتا بومبا قويۇپ بېرىش ئاپپاراتى قاتارلىقلارنى ئۆز ئىچىگە ئالىدىغان بولۇپ، ھاۋا ھۇجۇمىدا 40 دىن ئارتۇق پەلەستىنلىك قازا قىلغان.

پەلەستىن تاراتقۇلىرىنىڭ خەۋەر قىلىشىچە، پەلەستىن زۇڭتۇڭى ئابباس رامئاللاھتا جىددى يىغىن ئېچىپ : ئىسرائىلىيە ئارمىيەسىنىڭ پەلەستىن زېمىنىدا ھەربىي ھەرىكەت قوللىنىشى پەلەستىن ئىسلام قارشىلىق ھەرىكىتىگە جەڭ ئېلان قىلغانلىق، شۇنداقلا پەلەستىن خەلقىگە جەڭ ئېلان قىلغانلىق، دېگەن.