تەشنا تېخنىكا كۇلۇبى

ئارمانلار خۇددى ئورمانلىقتىكى يۇپۇرماقلاردەك ساناقسىز ئىدى. «يازغۇچى بولىمەن» دېدىم كىچىكلىكىمدە، لېكىن...ھامان بىركۈنى يۈرەك كىسىلى ياكى زىخقا كىسىلى بىلەن ئەجەلسىز كېتىپ قالىدىغىنىمنى قىسقىسى ھەقىقەتنىڭ شۇئارىنى ياڭرىتالماي، بۈدۈنە يەكى سېغىزخان بولۇپ ئۆتىدىغىنىمنى ھېس قىلدىم؛ «سىياسىيون بولىمەن» دېدىم، سىياسىي سەھنىكىگە ھەقىقەت بايرىقىنى كۆتۈرۈپ كىرىپ كەلمەكنىڭ كىچىك ۋاقىتلىرىمدا دوستلىرىم بىلەن سۇلالە - پادىشاھلىق بولۇپ ئوينىغاندەك ئاددىي ئەمەسلىكىنى، مېنى «قوماندان» قىلىدىغان «خەلقىم» نىڭ تولىمۇ ئامالسىزلىقىنى تونۇپ يەتتىم؛ « دوختۇر بولىمەن» دېدىم، بەلكىم پەرىشتە سۈپەت بىر ئىنسان بولۇشنى ئىزلىگەن بولغىيتتىم، ئەمما راستىنلا دوختۇر بولغۇم يوق ئىدى، چۈنكى ئىسپىرىت پۇرىقىنى ئەڭ ئۆچ كۆرەتتىم؛ مەن ئەسلى ئالىم بولاتتىم، چۈنكى ئىسمىممۇ ئالىم ئىدى....ھا ھا!
شۇنداق ئاخىرى مەن دەل موشۇ ساھەگە كىرىپ قالدىم. دىن، سىياسەت، مەدەنىيەت... چەكلىمىلىكىدىن خالىي، ئاللاھقا شېرىك كەلتۈرمەيدىغان، دەۋرىمىزنىڭ سىمۋولى بولىۋاتقان كومپىيوتېر تېخنىكىلىرى. شۇنداق بىر خىل ھېرىسمەنلىك بىلەن ئۈگىنىدىغان بولۇپ كەتتىم. ھەربىر ئىجادىي ئەسىرىم يېڭىدىن ئىشەنچ ۋە ئۈمۈد بېغىشلاۋاتىدۇ، ئوڭۇشلۇق ئىجرا بولغان ھەربىر پروگراممام قەلبىمدە ھاياجان چۇقانلىرىنى ياڭرىتىۋاتىدۇ. مەن ئۆگىنىۋاتىمەن، ئىزدىنىۋاتىمەن. يېڭىچە تەپەككۇر بىلەن كەلگۈسىگە يۈزلىنىۋاتىمەن. ئەڭ جەلىپكار تېخنىكىلارنى ئۇيغۇر ئۈچۈن خىزمەت قىلدۇرۇش، بايراقدار تېخنىكا ساھەلىرىدە ئۇيغۇرنىڭ نامىنى نوپۇزغا ئىگە قىلىش ئۈچۈن تىرىشىۋاتىمەن، مەنلا ئەمەس بىر يولدىكى بارلىق قېرىنداشلىرىم بىرلىكتە كۈرەش قىلىۋاتىمىز.
زامانىمىزدا ھەرقايسى داڭلىق تېخنىكا شىركەتلىرىنىڭ ئۆز ئالدىغا مەۋھۇم بىر دۇنيادا ئىمپىراتورلۇق تالىشىۋاتقانلىقىنى كۆرۈۋاتىمىز. بۇ قارىماققا ئاددى بىر ئىشتەك قىلسىمۇ، ماھىيەتتە ئۇرۇش قىلىپ، قان تۆكۈپ ئىنسانلار ھۆكۈمرانلىقىنى تالىشىش بىلەن چوڭ پەرقى يوق. چۈنكى بۇ خىل مەۋھۇم ئىمراتورلۇق ئارقىلىق تالاي ئىنسانلارنىڭ مەنىۋېيىتى، تور دۇنياسىدىن ئىبارەت تەقلىدىي دۇنيادىكى بارلىق پائالىيەتلىرى دەل ئەشۇ ئىمپىراتورلارنىڭ ھامىيلىقىدا بولىدۇ، تالايلىغان «خەلق» ئەنە شۇ ئىپىراتورلار ئۈچۈن تالاي قىممەت يارىتىدۇ. دېمەك بۇ ئاجايىپ قالتىس بىر ساھە - IT ساھەسى!
مەندىن ھوقۇق تەما قىلىدىغان بارلىق كىشىلەرنى ئۈمىدسىزلەندۈرۈپ قويىدىغان بولدۇم. ئەمما مەندىن بايلىق(ماددىي ۋە مەنىۋېي) كۈتىدىغانلار ئۈچۈن ئاللاھ خالىسا بىر جاۋاب تەييار قىلىمەن. ھامان بىر كۈنى كىرىمنى سېكۇنت بىرلىكىدە ھىساپلايدىغان ئەشۇ كىشىلەر قاتارىدىن ئورۇن ئالىمەن(زەي سالماي ئاتقان پو). چوقۇم.... مەن پۇلنى ياخشى كۆرىمەن، سىياسىيدىن قانچە يىرگەنگەنسىرىم ئىقتىسادنى شۇنچە ياقتۇرۇپ قىلىۋاتىمەن. شۇنداق، مەن نۇرغۇن پۇل تېپىشىم، نامراتلىق، نادانلىق ئاسارىتىدە قىينىلىۋاتقان قېرىنداشلىرىم، موھتاج كىشىلەر ئۈچۈن نۇرغۇن ئىشلارنى قىلىشىم كېرەك. ھوقۇقىنى قالايمىقان يۈرگۈزۈپ زومىگەرلىك قىلىۋاتقان نائەھلىلەرنى سىتىۋېلىپ، پۇلۇمغا قۇل قىلىشىم كېرەك(چاقچاق).
مەن بىلەن ئوخشاش مەقسەت - نىشاندىكى دوستلىرىم، سىلەرنى كۈتىمەن!