قالۇرسەن

مۇھەممەتجان راشىدىن

نان ئىلغىساڭ نانسىز قالۇرسەن،
نام قوغلاشساڭ نامسىز قالۇرسەن.
رىزقىڭ بىلەن ياشا كەپتىرىم،
دان ئىلغىساڭ دانسىز قالۇرسەن.

كۆكلەتمەيدۇ ھېچكىمنى كېبىر،
تاغ بولساڭمۇ دەپ يۈرگىن ئىدىر،
ئادەمدۇرسەن ئەمەسسەن خىزىر،
يار ئىلغىساڭ يارسىز قالۇرسەن.

شاھ تاجىدىن ئۇلۇغدۇر سېخى،
سېخى قوللا ھەر گىياھ شېخى،
بۇنى بىلمەس بىخىللار تېخى،
بىخىل بولساڭ ھالسىز قالۇرسەن.

ياشاپ ئۆتسەڭ بىر ئۆزۈڭ ئۈچۈن،
پارچە نېنىڭ بولمايدۇ پۈتۈن.
تۇرخۇنىڭدىن چىقسىمۇ تۈتۈن،
كۈن ياتقاندا شامسىز قالۇرسەن.