لەۋلەر ساماسى(نەسرلەر)
ئەنۋەر تاشتۆمۈر
ئەنۋەر تاشتۆمۈر
1
ئىپادىلىرىڭدە قەلبىڭنىڭ جۇلاسىنى كۆردۈم، بىر ئوتلۇق سەھەرسەن رەڭلەر جىلۋىسىدە يالقۇنجايدىغان!
ھېسلار ئەۋجىلەنمەكتە، كۆزلەرنىڭ ئىختىيار تىزگىنى ئۈزۈلدى، خىيال قۇشلىرى كۆڭۈل قەپىسىدىن ئۇچۇپ چىقتى، كېچىلەرنىڭ تاقىر دالاسىنى سۆيگۈ ئىستەكلىرى يورۇتتى، ياپيېشىل چىمەنلەرنىڭ رىتىملىق دولقۇنىدا ئىلاھىي نەپەسنىڭ شىددىتى ئەكس ئەتتى، بىر پۈتۈن يارقىنلىق ئىچىدە بارچىگە ئايلاندىڭ.
بارچە خۇددى يىلاندەك قاسراق تاشلاپ ئۆز چىنلىقىغا قايتتى، دۇنيانىڭ سۈزۈك چېھرىدە سەن ۋە سېنىڭ خۇش تەبەسسۇملىرىڭ جىلۋە ئەيلىدى، ھەممىنى ئۇنتۇش بەدىلىدە سېنى كۆرۈشلىرىمنىڭ خاسىيىتى لەۋلىرىمنى قىزدۇردى . ساڭا قاراپ ئىپتىخارلاندىم، ۇاشاش بەختى تۇنجى تىنىقنىڭ بەھرىدەك ۋۇجۇدۇمدىن شىددەتلىك تاشتى.
لەۋلەر يېلىنجايدۇ، ئارىدىكى ئاتەش بوشلۇق لەۋلەر ساماسىغا ئايلاندى، ھەر نەپەستە سۆيۈش－سۆيۈلۈش پەرھىزى جانلارنىڭ ئۇدۇمىغا قېتىلدى . سېنى سۆيۈپ كۆيۈشلىرىمنىڭ بەھرىدە نۇردەك پاكلاندىم، قەلبىم تەخىرسىز بىر ھالدا ئىسمىڭغا كۈي قاتتى، كۈيلىرىم بىلەن قەلبىڭنىڭ ئىشىكىنى چېكىپ ئاداققى باھارنى چاقىردىم، بارچە ئالەم ئاشۇ باھاردا يېپيېڭى ھۆسن تۈزدى.
2
سۈكۈت ئىچىدىكى شاۋقۇن، شاۋقۇن ئىچىدىكى سۈكۈتتە ھازىربىز.
سۈكۈت－كۈتۈش ئەۋجىدىكى شاۋقۇن، شاۋقۇن－ھەرىكەت ئەۋجىدىكى سۈكۈت . ئۇلارنىڭ پاسىلى كۆڭۈل زوقىغا تىرەلگەن . شۇڭا ئۇلار كۆڭۈل زوقىغا ئەگىشىپ ئالمىشىش ۋە تەكرارلىنىش ئارقىلىق بىر پۈتۈن چىنلىقتا قوشۇلۇپ مۆجىزە تۈزىدۇ.
ئەتراپىڭغا باققىنە، جىمىكى نەرسە سېنى قورشاپ، ئۆز－ئۆزىدە جىلۋە ئەيلەپ زوقىڭغا ئىمكان تۇغدۇرۇپ تۇرىدۇ . كۆكلىرىڭدە، ئۆزۈڭدىن ھالقىغان ئاشۇ ساماۋى بوشلۇقلاردا بولسا، تەقەززالىقنىڭ سەرسان كۈيلىرى سېنى ھاياتىي پەرۋازلارغا ئۈندەيدۇ.
بەخت — ئەسلى بارلىق، ئۇ ئۆزۈڭنىڭ ئىچكى چەكسىزلىكىدە، چىنلىقلىرىڭنىڭ سۈزۈك قاتلىمىدا، تەشنالىقىڭدىن تاشقان گۈزەل ئىستەكلىرىڭنىڭ ئەۋجىدىكى پارلاق نۇرلاردا.
بەخت — ئىككى تەقەززالىق ئارىلىقىدىكى سەرگەردان، ئۇ ئۆزۈڭنىڭ لەۋلەر ساماسىدا، كۆيگەن ھېسلىرىڭنىڭ ئۇچقۇر قاناتلىرى ۋە ئاققان ھېسلىرىڭنىڭ شىددەتلىك ئۆركەشلىرىدە.
بەختمەن، شۇڭا سانسىز جانلارغا ئوخشاش يوسۇنلار پەرەنجىسى ئىچىدە سۈكۈتلۈك يەلپۈنۈپ ئۆز－ئۆزۈمگە ھازا ئېچىشقا رايىم يوق.
بەختمەن، شۇڭا خۇددى پەسىلنى كۆرۈپ مۇقەددەس كۈلۈمسىرىگەن رەڭدار چېچەكلەرگە ئوخشاش قەلبىمنىڭ ھەربىر ئاتەش ھېسلىرىدا ئۇلۇغۋار چاقناشقا ھەم پارلاشقا ئىنتىزارمەن!
ھاياتنىڭ كېچىلەردە نۇرغا موھتاجلىقى ئۇنىڭ نۇرسىزلىقىدىن ئەمەس . نۇر قەلبىڭدە، ھېسلىرىڭنىڭ ھەربىر ئىمكانى بوشلۇقلىرىدا پىنھان تۇرىدۇ . ئۇنى يوشۇرغىنى ئاسىيلىق دەھشىتى، دىتسىزلىق سۈكۈتى، غەپلەت زۇلمىتىدۇر . ھايات نۇر تاشقىنى، ئۇنى باغرىڭغا تېڭىپ تۇرۇپ باغرىڭنى يورۇتۇشنى، ئۇنى يەلكەڭدە كۆتۈرۈپ تۇرۇپ مۇقەددەس پارلاشنى بىلمىسەڭ، سېنىڭ ئۆلۈك موردىدىن، جانسىز كۆلەڭگىلەردىن نېمە پەرقىڭ، ئاقىۋەت!؟
3
ھېسلار چاقنىشى سائادەت گۈلشەنلىرىنى بېزەيدۇ، ئۇنىڭ قەلبىڭگە تاشلىغان بىر دەقىق شولىسىدىمۇ ئاشۇ گۈلشەنلەرنىڭ رەڭدار سۈرىتى ئەكس ئېتىدۇ.
مەن تەنھا ئۆزۈمدە لەۋلەر سىماسىغا تىۋىنىپ ھېسلىرىمنى چاقنىتىمەن ۋە ئۇنىڭ نۇر يامغۇرى بىلەن سائادەت گۈلشەنلىرىنى پەرۋىش ئېتىمەن.
ۋاقىت بىمەھەل بوران－چاپقۇنغا ئوخشاش ئارىدا سېنى ھەم سېنىڭ بارلىق شەكىللىرىڭنى يوقىتىش ئىشتىھاسىدا قۇترايدۇ...
4
ياشاش قەرز ئەمەس، پەرھىز.
ياشاش باقىي ئەمەس، پانىي.
ياشاش تۈن ئەمەس، سەھەر — گويا نۇر نۇرغا، رەڭ رەڭگە ئۇرۇلۇپ رەڭدار يارقىنلىق ئىلكىدە كەڭ قۇچاق ئاچىدىغان خاسىيەتلىك سەھەر.
نىگاھ ئەركىگە بوي بەر، زۇلمەتتىكى ھېسلار چېقىلسۇن!
ھېسلار ئەركىگە بوي بەر، قەپەستىكى قۇشلار سايرىسۇن!
سۆيگۈ ئەركىگە بوي بەر، جەزىرىدىكى سائادەت چىمەنلىرى ياشنىسۇن!
سۆيگۈ ھېسلارنى ئويغىتىدۇ، ھېسلار قاراڭغۇ خىلۋەتلەرنى يورۇتىدۇ، بىر پۈتۈن يارقىنلىق ئىلكىدىكى سۆيۈملۈك ھېسلار ئەۋجىدە ۋۇجۇد ئوت ئالىدۇ، ئوت ئىچىدە پورەكلەپ ئېچىلغان قىپقىزىل لەۋلەردىن بال تامىدۇ، خۇش ھىد تارايدۇ.
قارشىڭدا ساڭا ئوخشاشلا بىر سەۋەبمەن . مىڭ دانە بولۇپ چېچىلغان جېنىمنىڭ ھەر بىرىدە سېنىڭ سەۋەبىڭگە مەنسۇپ ئاتەش ھېسلار چاراقلايدۇ . سەۋەبلىرىم تۈرتكەن ۋجۇدۇڭغا ئويناق ھېسلارنى چۇلغاپ لەۋلىرىڭنى قىزدۇرغىن، ئۈستۈڭدىكى سۆرۈن بوشلۇق لەۋلەر ساماسىغا ئايلانسۇن!
5
نىگارا، دەپ نىدا قىلسام ۋۇجۇد قەپەسلىرىم چېقىلىدۇ، روھىمنىڭ ئاتەش باغرىدىن قىپقىزىل قان گۈلى بولۇپ تۆكۈلىسەن.
ئىسسىق قان، ئىسسىق تۇپراق بىر يارالمىش ئەسناسىدۇر . مانا، تاڭ لالىسى كۆزۈمدە چوغدەك جىلۋە ئەيلىدى، ئۆزۈمدىن ساڭا ئۇزىراپ ئىپتىخارلاندىم.
ئاخىرقى كېچە تۇزانلار ئىچىدە نەپەستىن قالدى، بىر سىقىم تۇپراق بىر تەنھا جاننىڭ ئەسلى ۋە ئەزەلىي سۈرىتىنى بارچە ئالەمگە نامايىش قىلدى، تىنىق بوشلۇق پىنھان نىقاب－پەردىلىرىنى قايرىپ چەكسىزلىكنى راۋان قىلدى.
6
سېنى سۆيگىنىم ئەپسانە ئەمەس . سەن تۇيغۇمنىڭ ئۆزىدە، پەرۋازىدا ۋە مەنزىللىرىدە كۈلۈمسىرەيسەن . كۈلۈمسىرەشلىرىڭگە مەغرۇر ئەمەسمەن، چۈنكى ئىنسان روھ مەستلىكىدە ئازىيىدۇ.
سېنى سۆيدۈرگىنىم ئەپسانە ئەمەس . سەن كوچىلىرىمنىڭ تارچۇقلىرىدا، دىمىق ھاۋاسىدا ۋە مۇئەممالىق دوقمۇشلىرىدا ياشلىنىسەن، كۆز ياشلىرىڭغا ھەيران ئەمەسمەن، چۈنكى ئىنسان روھ يامغۇرى بىلەن كۆكلەيدۇ.
7
تەنھالىقىمدىن غۇلاچ كىرىپ كېڭىيىپ بارچە ئالەم پىنھانىنى ئىلكىمگە ئالىمەن . سەندە سوئاللىرىم ئەمەس، بەلكى كاككۇك ئۈنىدەك سىرلىق بېشارەتلىرىم، بۇلبۇل ناۋاسىدەك مەنىدار ئىمالىرىم خاتىرە قالىدۇ . قاراڭغۇ كېچىلەردە يۇلتۇزلارغا بېقىپ تەلۋىلىكىڭ تۇتقاندا قاقاقلاپ كۈلىمەن، كۈلكىلىرىمدە ئىشقىمنىڭ ھەقىقىي جۇلىلىنىدۇ.
ئىشقنىڭ ئەۋجى مەڭگۈلۈك مەندە ھەم مەڭگۈلۈك سەندە شىددەت سېلىپ تەن بىلەن روھ ئارىسىدىن، قىزىغان لەۋلەر ساماسىدىن شېرىن سادا بېرىدۇ.
8
روھىڭنىڭ چۆللىرىنى كېزىپ يۈرگىنىمگە نەۋاخ!
تىرەنلىك ئىچىدىكى تىرەنلىك ئاڭنىڭ قەپەسلىرىنى چېقىۋەتتى، كۆز ئالدىڭدا ھەم كۆز ئالدىمدا نۇر تېزلىكىدىكى تۇيغۇلارنىڭ چەكسىز كەڭ گىرىمسەن ئالىمى . ئېھتىمال ئۇندا بىر مەھەل ئۆرلىگەن چاڭ－توزان مىسال تۈزۈپ غايىب بولارمىز ۋە ياكى ئۆزئارا چېقىلىپ ھاسىل قىلغان نۇر چەمبىرىكى بىلەن كەڭلىكتىكى خىرە ئالەمنى يورۇتارمىز.
خۇپىيانە پەرۋازىڭغا زوقلانغۇچى ناخشىسىمان ئادەم ئۆزىدە ۋە ئۆزىدىن يىراق بىر جايدا لەۋلەر ساماسى تۈزىدۇ.
ئېھتىماللىق تەقەززالىقتا يورۇيدۇ، تەقەززالىق ئېھتىماللىقتا چېچەك ئاچىدۇ . سېنىڭ بىلەن مېنىڭ سۆيگۈ مېۋىلىرىم ئارىدىكى تەبىئىي ھاللارنىڭ بەرىكىتىدىن رەڭ ھەم تەم ئالىدۇ.
9
سەن ئاخىرقى ھېسابتا يەنىلا ماڭا ئوخشاش تۈن ئوغرىسى، غەپلەتتىكى دۇنيانىڭ قوينىدا سەرسانە يۈرىدىغان!
تۈن ئوغرىسىنىڭ قەلبىدىن ئۆزگە چىرىغى يوق، شۇڭا كىشىلەر ئۇنى كۆرۈشكە قادىر ئەمەس.
تۈن ئوغرىسىنىڭ قەلبىدىن ئۆزگە زۇۋانى يوق، شۇڭا كىشىلەر ئۇنى تىڭشاشقا قادىر ئەمەس . ئۇ دۇنيانى قەلبى بىلەن يېتىلەپ، قەلبى بىلەن چاقىرىپ شەكىللەر سىرتىدىكى پارلاق ئالەمگە يۈرۈش قىلىدۇ.
ھەربىر ئۆتكۈنچى يۈرۈشىدە ئۆزىنىڭ، ئۆزگىنىڭ ۋە تۈن－كېچىنىڭ ھەسرىتىنى پىنھان ئېلىپ تاڭ ئىشىكىنى چېكىدۇ ھەمدە تاڭ نۇرىغا پۈتۈنسۈرۈك سىڭىپ كېتىدۇ . ئويغانغان دۇنيا ئاخىرقى چۈشلەرنىڭ ئاپئاق چېچەكلىرىنى ئۇنىڭ تۇنجى تەبەسسۇمىغا چاپقۇ قىلىدۇ.
تۈن ئوغرىسى بىر پۈتۈن ئاقلىق ئىچىدە دۇنيانىڭ چىنلىقىغا قايتىپ ۋىسال تاپىدۇ ھەمدە ئىككى ئالەم ساۋابىغا ۋەزمىن كۈي قاتىدۇ.
10
سەن رېئالنىڭ نېپىز پەردىسى كەينىگە مۆككەن شېرىن خىيال . ئەمما ئىككى ئارىنىڭ چەكسىزلىكىدە قەدەملەر ھالسىرايدۇ، قەسەملەر يىگىلەيدۇ، دەردۇ－ئاھانەتلەر گۈرۈلدەيدۇ.
ئېھتىمال، مەن ساڭا تىنىقىمدىن تارىغان بىر نەپەس ئوتلۇق شامال بەخش ئەتكىنىمدە، نۇردەك پاكىز يالىڭاچ سىياقىڭ بارچە رېئاللىقنى نومۇستا قويىدۇ . ئۆزۈڭ تۈپەيلى ئۆزۈڭگە تارتىلىپ ئەنجۈر يوپۇرمىقىنى ئۈزىسەن، كۆزۈمدە روھىمدىن ئاققان تۇنجى تامچە قاننىڭ ئالەمگە پەۋەس نۇرى پارلايدۇ.
سېنىڭ بىلەن مېنىڭ ئارام مەۋجۇت ئەمەس، بىر يېگانە گەۋدە ئالەمگە قۇياشتەك ئوتلۇق، ھارارەتلىك نىگاھ تاشلايدۇ . نىگاھلار پايانىدا سائادەت مەنزىللىرى بېھىش－جەننەت مىسال خۇش تەبەسسۇم ئەيلەيدۇ.
گاھى خىيالەن ئىز بېسىپ پەرھىزىڭنى مازاق ئەتسەم، ئۆز－ئۆزۈڭگە تىقىلىپ ۋىلىقلاپ كۈلىسەن، بۇلاقلار ۋە شوخ قۇش بالىلىرىنىڭ سىماسى كۆزۈمدىن ئەگىيدۇ.
قايناش — قان ۋىجدانى! ئوندىن ئارتۇق تەسۋىرى مۇقامدىن مۇڭ ۋە پىغانىم تۈتۈن مىسالى ئۆرلەيدۇ.
كۆرگىنكى، ئۆلۈك جانلار كۆلىدە لەيلەپ يۈرگەن لەش－كۆپۈكلەردە ھاياتنىڭ سۈزۈك، ئىلھامدار ئۆركىشى ئەبەدىي چېلىقمايدۇ.
بىر لەۋزە سۆز، بىر تىنىق نەپەستەك ئۇچۇپ، كۆيۈپ، لەيلەپ ئۆچىمىز، ئەمما ئۇنىڭدا بارلىق خىسلەت ۋە خاسىيەتنىڭ ئۇلۇغۋار ئىلھامى بار . ئاشۇ ئىلھام ئوتىدا كۆيمىگەن جاننىڭ ئىلكىدە ھايات پەيزىنىڭ جۇش ۋە شىددىتى نېمە قىلسۇن!
ئۆلۈك جانلار — ئاسىي جانلار، ئۆلۈك جانلار — قەرزدار جانلار، ئۆلۈك جانلار — ئازابلىق جانلار...
11
كېلىش－كېتىشلەردە تەنھادۇرمىز، شۇڭا ئارىدىكى مۇساپىلەردە تەنھالىق تەشۋىشىدىن ئىمكانلار ئارا پارە－پارە بولۇپ چېچىلىمىز.
قوشۇلۇش ئىشتىياقى ئاخىرقى چەك، ئاخىرقى پەللە ۋە ئاخىرقى نەپەسلەرگىچە ۋۇجۇدىمىزدا لاۋۇلدايدۇ.
جان جاننىڭ ئىلھامىغا ئېرىشىپ، ئۇنىڭ ماھىيىتىدە جۇش ئۇرۇپ تۇرغان ئەسلى چىنلىق خاسىيىتىنى كۆرەلىگەن ھەمدە ئۇنىڭ بىلەن بىمالال قوشۇلۇپ سامالاردا پەرۋاز ئېتەلىگەن چاغدا ئەزەلىي بىرلىك سائادىتى كەڭ قۇچاق ئاچىدۇ.
سەۋەبلىك ئالەمدە ياشاش رىزقىدىن كۈلگەنبىز.
قېنى، سەۋەبلىرىڭنى قايرىپ ئۆزۈڭگە تىكىلگىنە ئەي ئىنسان، تەنھالىقتىن بۆلەك نېمە بار ھەر جاننىڭ ئىلكىدە ئاخىر!؟
سەۋەبلەر باھارىغا شۈكرى، پەرۋازى خىسلەتلىرىڭگە ئاپىرىن!
ئۇچۇش — تەنھالىقنىڭ نىجادىيىتى، ئۇچماسلىق ئۇنى تەمىن ئەتكۈچى سائادەتتۇر . مەن سائادەت ئىچىدە سۈرەتلىنىمەن . نىجادىيەت ئىچىدە غايىب بولىمەن . كۆرۈنگەن مەن بىلەن كۆرۈنمىگەن مەن ئارىسىدا بىر ئاقىلانە رىشتە بار . مەن ئاشۇ رىشتىنىڭ دائىما بەرىكىتىدىن سەھەردەك تۈن ئاتلاپ نۇر بېرىمەن، چېچەكتەك رەڭ ئاتلاپ مېۋە بېرىمەن.
ئەسكەرتىش:
ئوكيان تورىدىكى بارلىق ئەسەرلەرنىڭ نەشىر ھوقۇقى ئوكيان تورىغا مەنسۈپ. قالايمىقان كۆچۈرۈپ ئىشلىتىشكە، قانۇنسىز نەشىر قىلىشقا، ھەرقانداق مېدىيا ۋاستىلىرىدا ئېلان قىلىشقا بولمايدۇ. خىلاپلىق قىلغانلارنىڭ قانۇنى جاۋابكارلىقى سۈرۈشتە قىلىنىدۇ. قالايمىقان كۆچۈرۈپ تارقاتقان تور بىكەتلەر ئاشكارە ئېلان قىلىنىدۇ.
ئوكيان تورىدىكى بارلىق ئەسەرلەرنىڭ نەشىر ھوقۇقى ئوكيان تورىغا مەنسۈپ. قالايمىقان كۆچۈرۈپ ئىشلىتىشكە، قانۇنسىز نەشىر قىلىشقا، ھەرقانداق مېدىيا ۋاستىلىرىدا ئېلان قىلىشقا بولمايدۇ. خىلاپلىق قىلغانلارنىڭ قانۇنى جاۋابكارلىقى سۈرۈشتە قىلىنىدۇ. قالايمىقان كۆچۈرۈپ تارقاتقان تور بىكەتلەر ئاشكارە ئېلان قىلىنىدۇ.