ئۈرۈمچىدىكى ئولتۇرۇشلاردىن ئىقتىباس

(ئابدۇللاھ تىمەن [ فورموسا ]

دوستلار توپلاندى ۋە خۇشلۇق ئۈنلىرى چىقتى ھەرياندىن،
تەبەسسۇم ئەيلىگەن لەبلەر تۇرالماي قالدى لەرزاندىن.
غەنىمەتمىش مۇشەررەف بولماقلىغ ئاغا – ئىنىلەرگە،
بۇ ئاخشام پايلاشايلى، ھەق بۇيرىغان بىزگە ئېھساندىن.
يېمەك مىللى، شاراب مىللى، گەپ – سۆز، چاخچاق، كۈلۈش مىللى،
مۇزىكا – ساز، ئۇسسۇل – ناخشا، مۇھەببەت قاينىمى جاندىن.
شۇ ياشلار باغچاسىدا، ياش – گۆدەك كۈنلەرنى بىر ئەسلەش،
كېلۇر ئۈستۈن بىلەرمەنگە شاھىنشاھى دەستۇرخاندىن.
شىۋىر – شىۋىر يىلىق كەلمەكتە كى، ئوجماخ دىن ئەسكەن يەل،
ھۇزۇرىلە قەلبىڭ قۇۋانسۇن! ھاۋايى سۆيگۈ ئىخۋاندىن.
ھاۋانىڭ لەززەتىنى دوست بولۇشنى بىلمىگەن بىلمەس،
چۇنانچە توغرى يولدا قانچە مۇنكىر چىقدى كەرۋاندىن.
بۇ كۈلسەم دىل كەبى سىزگە قەدەھ تۇتقان قولۇم بىرلەن،
چىقارمەنمۇ يېرىم يۈز يىل سېغىنغان دەردۇ – ئەرماندىن.
ئايرىلىش تەس كېلۇر دوستلۇق ھاۋاسىدىن توساتتىنلا،
مېنىڭ دەردىم، مېنىڭ ئىشقىم، ھەسرەتىم چۈن سېغىنغاندىن.
ئەزىزىم، دوستلارىم قەلبىم تېگىدە ئىزلەرىڭ ئۆچمەس،
چىقارمۇ ئۇشبۇ ھەيرانلىق مېنىڭدەك باشقا ئىنساندىن.
غۇرۇرۇم شەۋقىمنى ئايدىنلىققا قات – قات تىزەر ئەردىم،
دەقىقەلەرنى ئەسىرگە ئۇزارتماق بولسا ئىمكاندىن.
قەدەھ ئىچرە بەسى تولقۇن تەرەننۇم ئەيلەسە – تاشسا،
دېمەككى زادى قىزغاندى شىرە تولغان شادىماندىن.
يىتەرمۇ مەدھىيە ھەرگىز ئېچىلغان غۇنچىدەك سىزنىڭ-
لەتافەت سوفراسىدىن بال كەبى كەلگەن كامىراندىن.
گەپنى قىسقا قىلىش تاتلىق دېگەندەك فەلسەفە ئەھلى،
تىمەن ناباب بولسامۇ لافلارىڭ چىقتى ئېچىلغاندىن.
ئېھتىرامىم ھەم سالامىم ھەمدە سۆيگۈم قوبۇل بولغاي،
ئەجەب كۆڭلىمگە توشۇپتۇ شادىمانلىق ھەر زامانىمدىن.

ئۈرۈمچى ئاۋغۇست، 1996-يىل