تېڭشۈن تورى خەۋىرى، نۇر تورى تەرجىمىسى: ئۈلۈشكۈن چۈشتىن كېيىن، ئوقۇرمەن خۇڭ ئەپەندى تېز خەۋەرلەر گېزىتىگە بايىلا تۆت ياشلىق بىر قىزچاقنىڭ خاڭجۇ شەھەرلىك 2-دوختۇرخانىغا ئېلىنىپ كېلىنگەنلىكىنى ئېيتتى. قىزچاقنىڭ ئانىسىنىڭ دېيىشىچە، 11-قەۋەتتىن چۈشۈپ كەتكەن بولسىمۇ، لېكىن بۇ قىزچاق قارىماققا ھېچنىمە بولمىغاندەك كۆرۈنىدىكەن. تۈنۈگۈن چۈشتە، مۇخبىرلار شەھەرلىك 2-دوختۇرخانا بالنېستىنىڭ ئۆپكە كېسەللىكلىرى بۆلۈمىدە ليۇ ليۇ ئىسىملىك بۇ قىزچاقنى كۆردى. تۆت ياشلىق ليۇ ليۇنىڭ بويى بىر مېتىر ئەتراپىدا بولۇپ، چوڭ كۆزلىرى چاقناپ تۇرىدۇ. قاپقارا كالتە چاچلىق بۇ قىزچاقنىڭ ئۆمچەيگەن ئاغزى، قىزارغان ئىشىشىغان كۆزلىرىدىن ئۇنىڭ بايىلا يىغلىغانلىقى كۆرۈنۈپ تۇرىدىكەن. ئۇنىڭ كېسەل تارىخى دەپتىرىگە «بىمار ئېگىزدىن چۈشۈپ كېتىپ سول كۆكرەك ئۈچ سائەت ئەتراپىدا ئاغرىش سەۋەبىدىن دوختۇرخانىغا كىرگەن، ئۈچ سائەت ئاۋۋال بالكوندا ئويناۋاتقاندا ئېھتىياتسىزلىقتىن 11-قەۋەتتىن يەرگە چۈشۈپ كەتكەچكە يىغلاپ توختىمىغان. نەپەس ئېلىشى قىيىن، سول تەرەپ كۆكرەك قىسمى بىرئاز بىئارامسىزلىنىۋاتىدۇ. روشەن قان چىقىش ئەھۋالى يوق، ئازراق ئارام ئالغاندىن كېيىن يىغلاشتىن توختىدى. ئەينى ۋاقىتتا ھۇشسىزلىنىش، قۇسۇش ئالامىتى يوق. بىمارنىڭ ئاتا-ئانىسى يەنىمۇ ئىلگىرىلەپ تـەكـشـۈرۈش ھەمـدە داۋالاش ئۈچۈن دوختۇرخانىغا ئەكەلگەن، ئەس-ھوشى جايىدا، بەزىدە يىغلاۋاتىدۇ ...» دەپ خاتىرىلەنگەن. مۇخبىرنىڭ شۇ ھويلىكى مومايلاردىن ئىگىلىشىچە، ليۇ ليۇ 11-قەۋەتتىن چۈشۈپ كېتىۋاتقاندا بىر دەرەخكە ئىلىنىپ قالغانلىق سەۋەبىدىن، چۈشۈش سۈرئىتى ئازراق ئاستىلىغان، ئەڭ ئاخىرىدا ئوت-چۆپلەر ئارىسىدا چۈشۈپ، ئۆزى ئۆمىلەپ قوپۇپ يىغلاپ كەتكەن. ئۇنىڭ 11-قەۋەتتىن چۈشۈپ كېتىپ ھايات قېلىشى پۈتۈنلەي مۆجىزە ھىسابلىنىدىكەن. لېكىن شۇنى ئەسكەرتىمىزكى، مۆجىزە دائىم يۈز بېرىۋەرمەيدۇ، بۇنداق ساۋاقلارنى ئېسىمىزدە چىڭ ساقلىشىمىز كېرەك.