ئۈرۈمچىدە بۈگۈن (27-ئاپرېل) سەھەردىن باشلاپ چاڭ-توزانلىق ھاۋارايى كۆرۈلۈپ، كۆرۈش ئارىلىقى ناھايىتى تۆۋەن بولدى. جۇڭگو مۇھىت ئۆلچەپ تەكشۈرۈش باش پونكىتىنىڭ بېكىتىشىگە قارىغاندا، ئەتىگەن سائەت 9:00 دا ئۈرۈمچىدە ھاۋا سۈپىتىنىڭ بۇلغىنىش كۆرسەتكۈچى 212 گە يېتىپ، ھاۋا ئېغىر بۇلغىنىپ، PM10 (سۈمۈرۈلىدىغان ماددىلار)نىڭ قويۇقلۇقى 998 مىكروگىرام/كۇب مېتىرغا يەتكەن. ئۈرۈمچى شەھەرلىك مېتېئورولوگىيە ئىستانسىسىنىڭ ئالدىن مەلۇماتىغا قارىغاندا، بۈگۈن سۇس يامغۇر ياغىدىكەن، ئەڭ يۇقىرى تېمپېراتۇرا ℃17، ئەڭ تۆۋەن تېمپېراتۇرا ℃10بولىدىكەن.
ئەسكەرتمە: چاڭ-توزانلىق ھاۋارايىدا دىققەت قىلىشقا تېگىشلىك ئىشلار:
1) ئېلان تاختىسى ياكى قېرى دەرەخلەرنىڭ ئاستىدا پاناھلانماڭ. پۇختا ئورنىتىلمىغان ئېلان تاختىسى ياكى يىلتىزى بوشاپ قالغان قېرى دەرەخلەر ئاسانلا ئۆرۈلۈپ چۈشۈپ ھاياتىڭىزغا خەۋپ ئېلىپ كېلىدۇ.
2) دېرىزىلەرنى چىڭ تاقاڭ، تالا-تۈزگە ئامال بار چىقماڭ، بولۇپمۇ ياشانغانلار ۋە بالىلار تالاغا چىقمىغىنى ياخشى. ناۋادا تالا-تۈزگە چىقىدىغان زۆرۈر ئىش بولۇپ قالسا ماسكا تاقاپ ياكى ھۆل لۆڭگە، داكا قاتارلىقلار بىلەن كۆز، ئېغىز، بۇرۇنلارنى توسۇپ مېڭىڭ.
3) ھاۋا قۇرغاق بولغاچقا كۆپرەك سۇ ئىچىپ، بەدىنىڭىزگە ئېھتىياجلىق سۇنى تولۇقلاڭ، بۇنداق بولغاندا مېتابولىزمنىڭ ئايلىنىشى ياخشى بولۇپ، سالامەتلىكىڭىزگە ۋە تېرىڭىزگىمۇ پايدىلىق.
4) مىجەزىڭىز يوقتەك ھېس قىلسىڭىز، دەرھال ۋاقتىدا دوختۇرغا بېرىڭ.
5) بۇنداق ھاۋادا ۋېلىسپىت مىنمەڭ، ھەم ئېغىز-بۇرنىڭىزدىن توپا-چاڭ كىرىدۇ، ھەم بىخەتەرلىكىڭىزگە خەۋپ يېتىدۇ.