جاڭگال غەزەللىرى -5

تۇرسۇنجان ھەبىبۇللا

17

 قارا يەر تەكتىدە مىڭ يىل تېنىم تولغاندى ئاچچىقتا،

روھىم قان سەيلىسى قىلدى ئاڭا يەڭلىغ خارابلىقتا.

 

ھوقۇشلار پەنج ئۇرۇپ چەكسىز ماكان تۇتتى بېغىمنى زەپ،

بوغۇلغان چۈشلىرىم بىرلەن ئامالسىزمەن ساياقلىقتا.

 

بۇ قىسمەت جىلۋىسى تاشقا ئۇرۇپ سۇندۇردى مەنزىلنى،

شېھىتلىك زەۋقىنى تارتماس نېچۈن ئويغاق ھاياتلىقتا.

 

نەۋائىيمۇ فەنا بولغان چېقىپ غەم تاغىنى چۇل-چۇل،

پەقەت ھەقلا خاقان ئەردى زاھىتچۈن غەمگۇزارلىقتا.

 

يۈرەكنى تىترىتۇر ھەر چاغ تۇتۇش رۇمىي راۋابىنى،

ئېغىزغا سالغىنىم چوغدۇر كۆيەرمەن خارۇ-زارلىقتا.

 

ھەۋەس يوقتۇر بۇ كۈنلەردە ئارف ئەھمەد يەسەۋىيگە،

جىھات قىلسام ئۆزۈمگە يەك ئەرك سولسا خاتالىقتا.

 

تۇغۇلماق ئىستىدىم شۇ دەم، سېغىندىم ئولكى مەشرەبنى،

قۇلۇڭنى خارلىما تەڭرىم، يۈرەلمەسمەن مالايلىقتا.

 

18

(مەرھۇم بوۋام تۇنىياز قۇرباننىيازغا مەرسىيە)

 

جان بېرەردە بىر كۆڭۈل تاپتى ئۆزىنى ياتسىراپ،

كۆزلىرىدە ئېھتىمال تۇتتى غەزەپ جەڭگاھسىراپ.

 

ئوتتا كۆيگەن قولىنى لەۋلەرگە سۈرتۈر بۇ جاھان،

روھى ئۇ ئۆرلەر ئەرىشكە جەننەتى رىزۋانسىراپ.

 

كۆرسىتىپ تۇپراقنى جىم ئاخىرقى بىر نەپسى قەدەر،

باغرىغا تىرناق سېلىپ زار يىغلىدى ئىمكانسىراپ.

 

تامچىغان كۈللى يېشىدىن گۈل ئۈنۈر، ئارمان ئۈنۈر،

يەر بىلەن يەكسان بولۇر ئەغيار ھامان ئەفغانسىراپ.

 

مەيلى تاغدا، مەيلى باغدا ھەقنى كىم ياد ئەيلىدى،

ئولكى بۇلبۇل قانسىراپتۇ، مەن يەنە ئەشئارسىراپ.

 

19

(مەرھۇم چوڭ ئانام بۇزەينەپ ئىمىنگە مەرسىيە)

 

دېدىم: «ئەلھۈكمىلىللاھ»نى بۇ تەقدىر چاقمىقى چاقسا،

كۆتۈردۈم قولنى تەڭرىمگە مۇسىبەت گەر سىناق ئالسا.

 

يۈرەكىمدە تىتىلغايمۇ سۈكۈتلەر ئۆرتىنىپ رەت-رەت،

زېمىننىڭ باغرىدا تىترەك، تېنى تۇپراق ئارا ياتسا.

 

ماڭا كۆز ياشلىرىم سۆزلەر: «رىزالىق بەر، رىزالىق بەر،

روھىڭنى ئويغىتىشچۈن ئول ئۆلۈمنى جانغا تەڭ چاتسا»

 

غېرىب كۈلبەمنى قان ئەتمىش جاراھەتلەرگە مەلھەم يوق ،

بېشىمغا تەگسە مەھرۇملۇقكى، مەھكۇملۇق كىشەن سالسا.

 

كۆڭۈلنىڭ تەكتىدە مىڭ دەرد بۇزەينەپ چوڭ ئانامچۈن زەپ،

 قۇلۇپلانغان ۋىسال ئۈزرە جۇدالىق تاشلىرى قالسا.

 

20

 كېچىلەر زەردابىدا قىينار ئۆزىنى جان نېچۈن؟

سىرتمىقى لەۋلەر مىسال تارتار ئۆلۈمگە قان نېچۈن؟

 

تەن بىلەن روھ ياتلىشىپ، سۇنسا ئىشىقنىڭ  تامغىسى،

تۈن ئارا رەسۋايى ئالەم بولمىغاي جانان نېچۇن؟

 

بۇ يۈرەكنى ئويلىدىم ئىنسان ئۈچۈن بىر بارىگاھ،

بارچە شامدانلار يورۇقتۇر، ئۆچتى ئۇ ئارمان نېچۈن؟

 

يىغلىسا ئەشئار يېزىپ رەستىلەر قاسناقىدا،

كەلمىگەي مەردنى سىنار، دەردنى سىنار دەۋران نېچۈن؟

 

مەي ئىچىش تەسكەن ئەجەب ئەلشىر نەۋائىي جامىدا،

تەلپۈنۈپ تۇرسا ۋىسال ھەر لەھزە مىڭ ۋەيران نېچۈن؟

 

 

مەنبە: ئاپتۇر

(ئاپتۇرنىڭ رۇخسىتى بىلەن ئەزىزتۈرك بلوگىمىزدا ئېلان قىلىندى)