فرانسىيە ئاخبارات ئاگېنتلىقىنىڭ خەۋىرىگە قارىغاندا، تۈركىيە ھۆكۈمىتى 8-ئاينىڭ 5-كۈنى زۇڭلى ئەردوغاننى ئۆز ئىچىگە ئالغان يۇقىرى دەرىجىلىك ھۆكۈمەت ئەمەلدارلىرىنىڭ تېلېفونىنى قانۇنسىز ھالدا ئوغرىلىقچە ئاڭلىغان 33 نەپەر ساقچى ئەمەلدارىنى قولغا ئالغان.
NTV تېلېۋىزىيە ئىستانسىسىنىڭ خەۋىرىگە قارىغاندا، شۇ كۈنى ئەتىگەندىلا باشلانغان بۇ ھەرىكەت زۇڭلى ئەردوغاننىڭ 10-چېسلا كۈنى تۈركىيىدە ئۆتكۈزۈلىدىغان زۇڭتۇڭنى بىۋاستە سايلاش سايلىمىدىن بۇرۇن ئۆز سىياسىي رەقىبلىرىنى باستۇرۇش ھەرىكىتى بولۇپ، بۇ قېتىمقى ھەرىكەتتە تۈركىيىدىكى 14 ئۆلكىدىن 33 نەپەر ساقچى ئەمەلدارى قولغا ئېلىنغان.
خەۋەردە ئېيتىلىشىچە، بۇ تۈركىيەنىڭ ھازىرقى زۇڭلىسى ئەردوغاننىڭ ئۆزىنىڭ سابىق سىياسىي ئىتتىپاقدىشى- فەتھۇللا گۈلەن كۈچلىرىنى تازىلاش ھەركىتى بولۇپ، ئۆتكەن يىلى ئاشكارىلانغان چىرىكلىك زۇڭلى ئەردوغان شۇنداقلا ئۇنىڭ يادرولۇق گۇرۇھىغا چېتىلىپ قالغانلىقى ئۈچۈن، كەينىدىنلا ئېلىپ بېرىلغان سىياسىي تازىلاش ھەركىتى پۈتۈن تۈركىيىگە تارقالغانىدى.
خەۋەر قىلىنىشىچە، ئۆتكەن ھەپتە تۈركىيە دائىرىلىرى جىنايەت گۇرۇھى تەشكىللەش جىنايىتى، ئىشپىيونلۇق جىنايىتى، قانۇنسىز ھالدا ئوغرىلىقچە تىڭشاش جىنايىتى، ساختىنى ئويدۇرۇپ چىقىش جىنايىتى قاتارلىق جىنايەتلەر بىلەن 31 نەپەر ساقچى ئەمەلدارىنى قولغا ئالغان.
خەۋەر قىلىنىشىچە، ئەردوغان ئىزچىل ھالدا ئۆزىنىڭ ئىتتىپاقدىشى بولغان گۈلەننىڭ قوغدىغۇچىلىرىنىڭ ساقچى ساھەسى شۇنداقلا ئەدلىيە ساھەسىدىكى زور تەسىر كۈچى ئارقىلىق ئۆزىنىڭ ھوقۇقىغا دەخلى قىلىۋاتقانلىقىنى ئەيىبلەپ كەلگەن بولۇپ، مۇشۇ يىلنىڭ بېشىدا ئەردوغان نۇرغۇن ساقچى ئەمەلدارىنى ۋەزىپىسىدىن ئېلىپ تاشلىغان.
2014-يىلى 8-ئاينىڭ 9-كۈنى، تۈركىيە پايتەختى ئەنقەرە، ئىككى نەپەر قىز قول تۇتۇشقان ھالدا ئىسلام ھەمكارلىق تەشكىلاتىنىڭ سابىق باش كاتىپى، زۇڭتۇڭ سايلىمى نامزاتى-ئەكمەلەددىن ئېھسانئوغلىنىڭ تەشۋىقات رەسىمى ئاستىدىن ئۆتمەكتە.
تۈركىيە تارىخىدىكى تۇنجى نۆۋەتلىك زۇڭتۇڭنى بىۋاستە سايلاش سايلىمى 10-چېسلا ئېلىپ بېرىلىدىغان بولۇپ، 2007-يىلى 10-ئايدا، پۈتۈن تۈركىيە خەلقى ئاۋازغا قويۇپ ئاساسىي قانۇنغا تۈزىتىش كىرگۈزۈش لايىھىسىنى ماقۇللىغان، بۇ قېتىملىق ئاساسىي قانۇنغا تۈزىتىش كىرگۈزۈش لايىھىسىدە دۆلەت زۇڭتۇڭىنى پارلامېنت ئاۋاز بېرىپ سايلاش تۈزۈمى ئەمەلدىن قالدۇرۇلۇپ، زۇڭتۇڭنى پۈتۈن خەلق بېلەت تاشلاش ئارقىلىق سايلايدىغانلىقى، زۇڭتۇڭنىڭ ۋەزىپە ئۆتەش مۇددىتىنىڭ ئەسلىدىكى يەتتە يىلدىن بەش يىلغا قىسقارتىلىدىغانلىقى، زۇڭتۇڭنىڭ بىر نۆۋەت ئۇلاپ ۋەزىپە ئۆتەش ھوقۇقى بولىدىغانلىقى بەلگىلەنگەن.
