ئەردوغان تۈركىيەنىڭ مىسىر سىياسىتىنى تەنقىد قىلغانلارغا «بىزگە، دۇنيانىڭ قەيىرىدە ۋە كىمگە قارشى بولسا بولسۇن ھەربىيلەر قوزغىغان سىياسىي ئۆزگىرىشلەرگە قارشى تۇرۇش يارىشىدۇ» دەپ جاۋاب بەردى.
تۈركىيە باش مىنىستىر رەجەپ تاييىپ ئەردوغان تۈركىيەنىڭ مىسىر سىياسىتىنى تەنقىد قىلغانلارغا «بىزگە، دۇنيانىڭ قەيىرىدە ۋە كىمگە قارشى بولسا بولسۇن ھەربىيلەر قوزغىغان سىياسىي ئۆزگىرىشلەرگە قارشى تۇرۇش يارىشىدۇ» دەپ جاۋاب بەردى.
تۈركىيە باش مىنىستىر ئەردوغان، مەمۇرلار ئۇيۇشمىسى كونفېدېراتسىيەسىگە قاراشلىق ياش مەمۇرلار ئۇيۇشمىسىنىڭ ئىپتار زىياپىتىگە قاتناشتى ۋە ئۇ يەردە قىلغان سۆزى ئەسناسىدا، مىسىردىكى ھەربىيلەر قوزغىغان سىياسىي ئۆزگىرىش ئۈستىدە توختالدى.
مىسىردا يۈز بەرگەن ئىشنىڭ ھەربىيلەر قوزغىغان سىياسىي ئۆزگىرىش ئىكەنلىكىنى ئەسكەرتكەن ئەردوغان، «بۇنى ئۇلار قوبۇل قىلمايۋاتىدۇ. سىلەر قانداقمۇ ساندۇق ئارقىلىق ھاكىمىيەت بېشىغا كەلگەن بىر ھاكىمىيەتنى يەنە ساندۇق ئارقىلىق ئەمەس، تانكا – مىلتىق بىلەن، سىياسىي بولمىغان ئۇسۇللار بىلەن ھاكىمىيەتتىن چۈشۈرۈۋەتكەن تۇرۇپ، بۇنى قوبۇل قىلمايسىلەر؟! تانكىلار، مىلتىقلار بىلەن پۇقرالارغا قارشى ھەرىكەت قىلىسىلەر ۋە بۇ ھەربىيلەر قوزغىغان سىياسىي ئۆزگىرىش ئەمەس، دەيسىلەر؟!...» دېدى.
تۈركىيە باش مىنىستىر ئەردوغان، خەلقئارا جەمئىيەتنىڭ ھەربىيلەر قوزغىغان سىياسىي ئۆزگىرىشكە سۈكۈت قىلىپ تۇرۇشىنى يەنە بىر قېتىم تەنقىد قىلدى.
ھېچبىر دۆلەتنىڭ دېموكراتىيە كۈرىشىگە ئىگىدارچىلىق قىلىۋالمىغانلىقىنى ئەسكەرتكەن ئەردوغان، مىسىردا ‹مېنىڭ ئاۋازىم قەيەردە؟› دەپ سورىغانلارنى قەتلىئام قىلغۇچىلارنى دۇنيانىڭ ھازىرغىچە نەزەرگە ئالمىغانلىقىنى، شارائىتنى باھانە قىلىپ سۈكۈت قىلغانلىقىنى تەكىتلىدى.
تۈركىيە باش مىنىستىر ئەردوغان، مىسىردا سىياسىي ئۆزگىرىش قوزغىغانلار، ئۇنى قوللىغانلار ياكى سۈكۈت قىلغانلارنىڭ ھاياتلا بولىدىكەن، بۇنىڭدىن خېجىللىق ھېس قىلىدىغانلىقىنى ئېيتتى.
