ئۇزۇن بوپتىكەن، تۇرمۇش خاراكتىدىكى بىر نېمىلەرنى يېزىپ باقمىغىلى. ئالدىنقى قېتىم، ئۆزقانى بلوگىنىڭ ئاتامانى ئۈچۈن Iphone 4Sنى سېتىۋېلىپ كەلگەن ئىدىم. ئەمەلىيەتتىغۇ Iphone 4S ئېلىش ئۇنچىۋالا يوغان ئىشمۇ ئەمەس، شۇنداقلا بۇ خاتىرىنى يېزىشتىكى مەقسىدىم قانداقتۇر بىر ئىشنى كۆز-كۆز قىلىش ئەمەس، بەلكى، مۇشۇ Iphone 4S نامىدىكى تېلىفوننى سېتىۋېلىش جەريانىدا كۆرگەن-ئويلىغانلىرىمنى ئورتاقلىشىپ ئۆتۈشتىن ئىبارەت. شۇنداق قىلىپ، ئازراق كۆپۈك چاچرىتىپ قويغاندىن كېيىن يازمامنى باشلىۋېتەي.
بىلگىنىمىزدەك، Iphone 4Sنىڭ چىققانلىقىغىمۇ خېلى بولدى ئالدىنقى كۈنلەردە تېخى بۇنىڭ تېلىگراف نۇسخىسىمۇ چىقتى. شۇنداق قىلىپ، ئۆزقانى بلوگىنىڭ ئاتامانى بولمىش ئاغام ماڭا مۇشۇ تېلىفوندىن بىرنى سېلىپ بىرىشىمنى ھاۋالە قىلغان ئىدى. كەمىنە بۇرۇن بىرقانچە دوستلىرىم ئۈچۈن تېلىفون، لەپتوپ قاتارلىقلارنى سېلىپ بېرىپ باققان، ئىككىلەنمەيلا ماقۇل بولدۇم، ئاندىن بىر شەنبە كۈنى چۈشتىن كېيىن، شەھىرىمىزگە جايلاشقان، داڭقى مەشھۇر بولغان ئېلىكترون سودا مەركىزى 华强北غا بېرىپ بازار ئەھۋالىنى ئۇقۇشۇپ كەلدىم.
华强北 بازىرى بولسا جۇڭگودىكى ئېلىكترون توپ مەھسۇلاتلىرى مەركەزلىرىنىڭ بىرى. بۇ جايدا كىچىك ئۆزەكدىن چوڭ زاپچاسلارغىچە ھەممە نەرسىنى ساتىدۇ، شېنجىندىكى ھالال كەسىپ قىلىۋاتقان ئۇيغۇرلاردىنمۇ خېلى كۆپ قىسىم كىشىلەر 华强北دىن ئېلىكترون مەھسۇلاتلىرىنى توپ ئېلىپ، يۇرتىمىزغا ئەۋەتىپ تىرىكچىلىك قىلىدۇ. بىزمۇ بىر نەرسە ئالماقچى بولساق مۇشۇ جايغا كېلىمىز ئەلۋەتتە. شېنجىننىڭ ئېلىكترون بازىرى بەك قىززىيدۇ، بۇ يەرگە دۇنيانىڭ ھەممە جايىدىن كېلىدۇ كىشىلەر، تۈركلەر بىلەن ئەرەبلەرنى، پاكىستانلىقلارنى، ھىندىلارنى كۆپرەك ئۇچرىتىپ قالىمەن. ئەلۋەتتە، ئۇيغۇرلىرىمىزمۇ كۆپرەك. ئامېرىكىلىق ئوقۇتقۇچىم ماڭا :‹‹ ۋەتەنگە قايتسام دوستلىرىم جۇڭگونىڭ نەرىدە ئىشلەيسەن دەيدۇ، شېنجىندا دېسەم گاڭگىراپ قالىدۇ. ئاندىن ئۇلارغا ئۆيۈڭلاردىكى 10 تېلىفوننىڭ توققۇزى ئىشلەنگەن جايدا دەپ جاۋاب بېرىمەن›› دېگەنىدى، دېمىسىمۇ نۇرغۇنلىغان شىركەتلەر ئوقەتلىرىنى شېنجىندا ئىشلەپ چىقىرىدۇ. مەكتىپىمىزنىڭ ئالدى تەرىپىدە Tencent، ئوڭ تەرىپىدە 中兴نىڭ بىناسى قەد كۆتۈرۈپ تۇرىدۇ، ئۇزاقتا يەنە نۇرغۇنلىغان داڭلىق شىركەتلەر…
گىپىمىزگە كەلسەك، شۇنداق قىلىپ ئاۋۋال تاۋباۋدىكى بىر قانچە دۇكانلارنىڭ مۇقىم دۇكىنى(实体店)غا كەلمەكچى بولدۇم، نېمە دېگەن بىلەن پالانى پۇللۇق نەرسە بولغاندىكىن، بىخەتەر ۋە ئىشەنچىلىك جايدىن ئالاي دەپ كەلدىمدە. تاۋباۋنى ئېچىپ، ئاشۇ دۇكانلارنىڭ ئادرېسىنى ۋە تېلىفون نومۇرلىرىنى يېزىۋالدىم، شۇنداقلا سۈرۈشتۈرۈپ يۈرۈپ شۇ دۇكانلار جايلاشقان بىنانىڭ ئالدىغا كەلدىم، بىنالار 华强北 بازىرىنىڭ تۆۋىنىگەرەك جايلاشقان ئىكەن، بىنانىڭ ئالدىغا كېلىپ تېلىفون قىلدىم، بىرىنچىسى ئالمىدى؛ ئىككىنچىسى ئالدى، ئەمما ‹‹دۇكانغا كىرسەڭ توردىكى باھادىن 100 يۈئەن ئارتۇق خەجلەيسەن››دېدى، ئۈچۈنچىسىنىڭ تېلىفون نومۇرى يالغان چىقتى. قېنى، كەلگەندىكىن ئىچىگە كىرىپ كۆرۈپ باقاي دەپ ئىچىگە كىردىم. بىرىنچى قەۋىتى تاغتۇرا تېلىفونلار بىلەن توشۇقلۇق ئىكەن، ئىككىنچى قەۋەتكە دىققەت قىلمايلا، ئۈچۈنچى قەۋەتكە چىقتىم، يېزىۋالغان ئادرىس بۇيىچە تاۋباۋدىكى دۇكانلارنىڭ مۇقىم دۇكانلىرىنى تاپتىم، قىززىق، ئۇلارنىڭ ئالدىدا نە Iphone يوق، نە خېرىدار يوق، ھەممىسى AliWangwang بىلەن ئالدىراش، بەزى مۇلازىمەتچى قىزلار تۇرۇپ ئاستىغا يۈگۈرۈپ چۈشۈپ كېتەتتى، بىردەم تۇرۇپ قايتىپ چىقاتتى. خىيالىمدا يوق، باياتىن تېلىفوننى ئالغان ئىككىنچى سودىگەرگە قايتا تېلىفۇن قىلدىم، تېلىفوننى بېسىۋەتتى.
بولدىلا دېدىم، باشقا يەرنى كۆرۈپ باقاي دەپ چۈشۈپ كىتىشكە تەمشىلىپ ئىككىنچى قەۋەتكە چۈشتۈم، ھىم، باياتىن كۆرگەن تاۋباۋدىكى بىر دۇكاننىڭ مۇقىم دۇكىنىدا كۆرگەن بىر قىز يۈرەتتى، ئەمدى مونۇ قەۋەتتە پوچتىكەشلەرگە بىر نىمېلەرنى بىرىۋاتىدۇ، قارىسام شۇ يەردىن ئايفون سېلىۋاتىدۇ، ۋۇي دېدىم، قەدىمىمنى ئىككىنچى قەۋەتكە توختىتىپ، بۇ يەرنى ئارىلاپ باقتىم، ھەممە دۇكاننىڭ ئالدىدا ئايفون، HTC قاتارلىق ماركىلىق تېلىفونلارنىڭ شۇ كۈنلۈك باھا جەدۋىلى توشۇپ كېتىپتۇ، ئادەممۇ يامان كۆپ، مەنمۇ ئايفون ئالىدىغان بولغانكى شۇلاردىن بىرسىدىن سورىدىم، سودىگەرلەر تاۋباۋدىنمۇ ئەرزان باھانى دېدى، سۇغۇرتىسىنى سورىسام يوق دەيدۇ، بۇلارنىڭ ھەممىسى قاچاق ماللار(خەنچە 水货)كەن، يەنى خوڭكوڭ(شاڭگاڭ) تامۇژنىسىدىن ئوغۇرلۇقچە ئەكەلگەن ماللار ئىكەن، شۇڭا سۇغۇرتىسى يوقكەن، شۇڭلاشقا باھاسىمۇ 1000 سوملارچە ئەرزان بولىدىكەن(بۇ يەردىكى باھا Iphone 4s 32g 港版نى مەخسۇس دۇكانلاردىكى باھا سېلىشتۇرمىسى)، قاپلىرى ئېچىلغانلىرى تېخىمۇ ئەرزان ئىكەن. قارىسام، باياقى تاۋباۋ دۇكىنىنىڭ خادىمى مالنى مۇشۇ يەردىن سېلىۋاتىدۇ…
ئىككىنچى قەۋەتتىكى بىر سودىگەرنىڭ دىيىشىچە، بۇلارنىڭ ئۈچۈنچى قەۋەتتىكى نۇرغۇن دۇكانلار بىلەن مۇناسىۋىتى باركەن، يەنى، تاۋباۋدىكى ئاشۇ دۇكانلار مۇشۇ جايدىن قاچاق ماللاردىن ئېلىپ ساتىدىكەن، گەرچە ئۇلار سۇغۇرتىسى بار دېسىمۇ، نورمالدا Iphoneنىڭ قاتتىق دىتالىدا كاشىلا چىقىش نىسپىتى ناھايىتى تۆۋەن بولغاچقا، قورقماي تۇرۇپ ساتىدىكەن(ئاخشىمى ياتاققا قايتىپ تاۋباۋدىكى باشقا 10 نەچچە دۇكان بىلەن پاراڭلاشقان ئىدىم، بەزىلىرىنىڭ مۇقىم دۇكىنى يوقمىش، بارلىرىنىڭ ئورنىمۇ مۇشۇنداق جايدا بولىدىكەن). دېمەك، بۇلارنىڭ ھەممىسىنىڭ تىلى بىركەن. تاۋباۋدىكى دۇكانلار تېخى ‹‹ تۈرمىدىن قاچۇرۇش ئۈچۈن قاپنى ئېچىشقا مەجبۇر بولىمىز›› دېگەن بىلەن ئاللىقاچان قېپىنى ئېچىپ بولغان ئايفوننى تېخىمۇ ئەرزان باھادا ئالىدىكەن…
بۇ يەردىن يالتىيىپ، ئۆزقانى ئاغامغا تېلىفون قىلىپ شېنجىندا ئەنگە ئالدۇرۇپ، تەرەققىي قىلىۋاتقان، مۇلازىمەت دائىرىسى ئۆلكە ئىچىگىچە كەڭرى يېيىتىلغان بىر مەخسۇس ئايفون سېتىش-مۇلازىمەت مەركىزىدىن بىر يىللىق قاتتىق دىتال سۇغۇرتىسى بولغان بىر ئايفوننى شۇ كۈنلۈك ئېتىبار باھاسىدا ئېلىپ ئەتىسىلا قەشقەرگە سېلىۋەتتىم.
گەپ بۇنىڭ بىلەن تۈگىمىدى، مەن ئايفون دۇكانلىرىنى ئىزدەپ داۋامىدا قايتا قاپلانغان تېلىفون(翻新)ئىشلەپ چىقىرىدىغان بىر ‹‹بازا››غا ئۇقۇشماي كىرىپ قالدىم. پاھ…قايتا قاپلانغان تېلىفونلارنىڭ قانداقلىقىنى دېمىسەممۇ بىلىسىلەر، بۇ دەل مۇشۇنداق تېلىفونلارنى ياساش بازىسى ئىكەن، كىچىك-كىچىك پوكەيلەردە ئالدىراش قوللار، قاراپ تۇرسام مېنىڭ بۇرۇن ئىشلەتكەن تېلىفونۇم نوكىيا 6300نىمۇ قايتا ياساۋاتىدۇ، تاۋباۋدىكى دۇكانلاردا ئىشلەپ چىقىرىشنى توختاتقىلى مانچە يىل بولغان تېلىفونلارنىڭ ‹‹يېڭىسى››نى كۆرگەن ئىدىم، ئەسلى ئاشۇ ئاتالمىش ‹‹يېڭى››تېلىفونلار دەل مۇشۇنداق جايلاردىن چىقىدىكەن، ھەي…
خوش، مەن بۇ تاقا-تۇققا يازمامدا نېمە دېمەكچى، يازغانسىرى ئۇزىراپ كېتىۋاتىدۇ، قىسقارتىپ مانچە بۆلەككە بۆلۈپ باقاي ھە :
1. توردىن مال سېتىۋالغاندا، بولۇپمۇ تېلىفون قاتارلىقلارنى سېتىۋالغاندا مال قاچاق مال(水货)مۇ ياكى جىڭ مال(行货)مۇ ئايدىڭلاشتۇرۇۋېلىڭ، قاچاق مال بولسا چاتاق چىقسا ئىگە بۇلىدىغان ئادەم تاپالمايسىز. ئەرزانراق تېلىفون بولۇپ قالسا ئۆزىڭىز تۇرۇشلۇق جايدىن ئالسىڭىزمۇ بولىدۇ. ئەڭ ياخشىسى، ئۆزىڭىز تۇرۇشلۇق جايدىن ئېلىڭ، چاتاق چىقسا بېرىپلا ياقىسىغا ئېسىلسىڭىز بولىدۇ.
2.توردىن ئايفون، لەپتوپ قاتارلىق قىممەترەك ماللارنى ئالماقچى بولسىڭىز ئەڭ ياخشىسى تاۋباۋدىكى دۇكانلاردىن ئالماڭ، Tmall ياكى جىڭ دوڭ(京东) قاتارلىق بېكەتلەردىن ئېلىڭ، ساختا-ناچار ماللار تاۋباۋغا قارىغاندا ئاز.
3. ناۋادا زادى تاۋباۋدىن ئالماقچى بولۇپ قالسىڭىز، پۇل تۆلەشتىن بۇرۇن سىزدىن بۇرۇن سېتىۋالغانلارنىڭ ئىنكاسىغا دىققەت قىلىڭ، ئەلۋەتتە، ئاشۇ دۇكاننىڭ ئىشەنچ كۆرسەتكۈچىسىگە ھەم قارايسىز.
4.ئاتالمىش ‹‹يېڭى›› كونا زاماندىكى تېلىفونلارنىڭ بارلىقىغا ئىشەنمەڭ، بولۇپمۇ باتارىيىسىنى چىقارغىلى بولىدىغان تېلىفونلارنىڭ.
5. مانچە كۈن ئىچىدە مالنى شەرتسىز قايتۇرىپ بېرىمىز دېگەن گەپكە ئالدىراپ ئىشەنمەڭ، بەزىلىرى ياندۇرۇپ بېرىدۇ، بەزىلىرىنىڭكىنى چوقۇم ‹‹ پوسۇلكا ئېچىلمىغان بولۇشى››كېرەك، يەنى، سىز ئالغان مەھسۇلاتنىڭ پىچىتى بۇزۇلمىغان بولۇشى كېرەك.
6. ئايفون 4 ۋە ئايفون 4S قاتارلىقلارنىڭ ‹‹يېڭى››سىنى توردىن ئالغان بولسىڭىز دۇكانداردىن مەزكۇر تېلىفوننى ‹‹ئاكتىپلىغان››مۇ يوق سوراپ بېقىڭ، ئاكتىپلىغان بولسا تېلىفونىڭىز ‹‹يېڭى›› ئەمەس، گەرچە ھازىر نىمكەش ئايفونلارنىمۇ ‹‹ئاكتىپلانمىغان››ھالەتكە ئۆتكۈزۈش ناھايىتى ئوڭاي بولسىمۇ…
7. ئايفون ئالسىڭىز ئامال بار مەخسۇس دۇكانلاردىن ئېلىڭ، شارائىتىڭىز يار بەرسە بىرلەشمە خەۋەرلىشىشدىن ياكى تېلىگراف قاتارلىقلاردىن ئالسىڭىزمۇ بولىدۇ، كۆچمە خەۋەرلىشىشمۇ ئايفون بازىرى ئېچىشنىڭ پىلانىنى قىلىۋاتىدۇ، بەلكىم بۇلارمۇ بىر كۈنى ئېچىپ قالار…
توختاڭ، تۆۋەندىكى يازمىلارغىمۇ ئىشتىھايىڭىز بولۇشى مۇمكىن
- تۇرايىمىزنىڭ ئۇسلۇبىنى يېڭىلىغان، خاتالىق تېپىشىپ بەرسىڭىز چوڭ-چوڭ مۇكاپات… (50)
- [ كۆچۈرۈلمە ] ئاVنىڭ غەيرىي رەسىمىي تەرجىمھالى (9)
- ئۇيغۇرچىلاشتۇرغان قىستۇرما: Recent Comments with Avatars (10)
- js ئارقىلىق بلوگ ئۈستىگە ئۇچۇر(ئېلان) چىقىرىش (2)
- ئەلكۈيىدە يېزىشقان خەتلەر-1 (5)
- «120 كىشىنىڭ جېڭى» ۋە بىر ۋەتەننىڭ تىراگىدىيىسى (2)
- [ تىلەكنامە ]سالام قۇتلۇق 2011-يىلى…
- SEO ئوينايدىغان بلوگگېر كېلىڭ، SEO قىستۇرمىسىنىڭ ھاجىم دادىسىنى تونۇشتۇرۇپ قوياي… (19)
- WordPressنىڭ يازما تەھرىرلىگۈچىنى قىستۇرمىسىز ئىقتىدار كېڭەيتىش تەدبىرى (7)
- wordpress سېستىمىسىدا jquery ئۈنۈمىدىكى بلوگ لىفىتى ئىقتىدارىنىڭ يېڭى تەدبىرى (5)
- WordPress سۇپىسىدا يازمىلارغا كود قىستۇرۇشنىڭ بىر نەچچە تەدبىرى (2) (13)
- پرېستان نەگە كەتتى؟ (11)
Wordpress تېخنىكىسى
Wordpress ئۇسلۇبلىرى
بلوگشۇناسلىق تەتقىقاتى
Wordpress قىستۇرمىسى
بىز كۆرگەن فىلىملەر
تۇرا يېڭىلىقلىرى
