ئالدىنقى قېتىم «يا ئوقى ئارقىلىق باشقىلارنى ئۆلۈم ئاغزىدىن قۇتقۇزۇش» ناملىق كىچىك Flash ئويۇننى يوللىغاندىن كېيىن، خېلى كۆپ تورداشلارنىڭ ئالقىشىغا ئېرىشتى، ھەتتا كۆپچىلىك ئاساسەن بۇ ئويۇننى ئويناپ تۈگىتىپمۇ بولدى. بۈگۈن يەنە تورداشلارنىڭ خۇمارىنى بېسىش ئۈچۈن، يەنە بىر كىچىك Flash ئويۇن – تاشقى پلانېت ئوغرىلىرى(Alien Thief) ناملىق ئويۇننى ئالغاچ كەلدىم، ئويۇننىڭ جىددىلىك دەرىجىسى گەرچە ئالدىنقىسىدەك بولمىسىمۇ، بىراق قىززىقتۇرۇش دەرىجىسى ھەرگىزمۇ ئالدىنقىسىدىن تۆۋەن ئەمەس.

ئاڭلاشلارغا قارىغاندا تاشقى پلانېتتا يېڭى تۇغۇلغان بىر بوۋاق، ئىنسانلار ئىچىدىغان كالا سۈتىنى ئىنتايىن ياخشى كۆرىدىكەن، تاشقى پلانېت كالىلىرىنىڭ سۈتى بولسا، بۇ بوۋاقنىڭ ئىشتىھاسىنى پەقەتلا ئاچالماپتۇ، شۇ ۋەجىدىن تاشقى پلانېت كىشىلى يەر شارىغا چۈشۈپ ئىنسانلارنىڭ سېغىن كالىلىرىنى ئوغرىلاشقا بەل باغلاپتۇ ۋە بىر ئۇچار تەخسىنى يەرشارىغا ئەۋەتىپتۇ…

ئويۇندا بىر دانە ئۇچار تەخسىنى كونترول قىلىمىز ۋە ئاخىرقى نىشان بولغان كالىنى سۈمۈرۈپ ئېلىپ، ئۆزىمىزنىڭ بازىسىغا قويساق شۇ ئۆتكەل ئاخىرلىشىدۇ. پۈتكۈل ئويۇن قىزىقارلىق ۋە ئوبرازلىق ئىپادىلەنگەن ئۆتكەللەر بىلەن چوقۇم تورداشلارنى ئۆزىگە جەلپ قىلالايدۇ دەپ ئويلايمەن.

مەشغۇلات ئۇسۇلى:

ئويۇننى كۇنۇپكا تاختىسى ۋە مائۇس ئارقىلىق ئايرىم كونترول قىلغىلى بولىدۇ، ھەر بىر ئۆتكەل باشلانغاندا قايسى ئۇسۇل بويىچە كونترول قىلىشنى بىزدىن سورايدۇ. كۆپچىلىككە كۇنۇپكا تاختىسى ئارقىلىق كونترول قىلىشنى تەۋسىيە قىلىمەن، بۇنداق بولغاندا باشقا جىسىملارغا ئاسان سوقۇلۇپ كېتىپ ئۇچار تەخسە(UFO) پارتىلاپ كېتىدىغان ئەھۋاللارنىڭ ئالدىنى ئېلىشقا بولىدۇ.

[مائۇستا كونترول قىلىش] مائۇس ئارقىلىق ئۇچار تەخسىنى كونترول قىلىمىز، سۈمۈرمەكچى بولغان جىسىمنىڭ ئۈستىگە كەلگەندە مائۇس سول كۇنۇپكىسىنى بېسىپ تۇرساقلا بولىدۇ.
[كۇنۇپكا تاختىسى ئارقىلىق كونترول قىلىش] كۇنۇپكا تاختىسىدىكى WSAD كۇنۇپكىلىرى ياكى يۆنىلىش كۇنۇپكىلىرى ئارقىلىق ئۇچار تەخسىنى كونترول قىلىمىز، بوشلۇق(Space) كۇنۇپكىسى ئارقىلىق جىسىمنى سۈمۈرىمىز.