ئالدىنقى قېتىم تاشقى پلانېت كىشىلىرىگە ياردەملىشىپ يەرشارىدىن كالا ئوغرىلىغان ئىدۇق، ئەمما تاشقى پلانېت كىشىلىرى قايتقاندا قوتاننىڭ ئىشىگىنى ئېتىشنى ئۇنتۇپ قالدىمۇ بىلمىدۇق، ئۈچ قوزىچاق ئۆيىدىن چىقىپ ئېزىپ قېلىپ تا ھازىرغىچە قايتىپ كېلەلمەيۋېتىپتۇ. گەرچە قوزا ئىزدەش ئېلانى چىقىرىلغان بولسىمۇ، بىراق بۇ ئۈچ قوزىچاق تېخى يەسلى يېشىغا توشمىغان بولغاچ، تېخىچە ئۇلانبايدا ئېزىپ يۈرگەن ئوخشايدۇ، قېنى تورخۇمار دوستلار بىرلىكتە غەيرەتكە كېلىپ بۇ ئۈچ قوزىنى ئۆيىگە ئامان ئېسەن ياندۇرۇپ كەلمەمدۇق؟

ھا ھا ھا! ئۈستىدىكى چۈشەندۈرۈشلەرنى كۆرۈپ نېمە دەيدىغاندۇ دەپ قالماڭلار، بۇ پەقەت تەدبىركارنىڭ مەزكۇر ئويۇن ئۈچۈن تەييارلىغان ئازراق كىرىش نۇتىقى خالاس، ئەلۋەتتە تېخىمۇ نادىر مەزمۇنلار كەينىدە، قانالنى يۆتكىمەڭ، ئېلاندىن كېيىنكى مەزمۇنلار تېخىمۇ ئېسىل!

بۈگۈن ھەپتە ئاخىرى بولۇپ قالغاچ، كۆپچىلىكنىڭ بىر ھەپتىلىك خىزمەت ۋە ئوقۇش ھاردۇقىنى چىقىرىش مەقسىدىدە، بۇ كىچىك، توردىلا ئويناشقا بولىدىغان Flash ئويۇننى كۆپچىلىككە ئېلىپ كەلدىم. ئويۇننىڭ سىزىلىش ئۇسلۇبى ئىنتايىن ئۆزگىچە، ھەمدە ئەقلىي-ئىدىراك، فىزىكا ئىلمى، تەۋەككۈلچىلىك قاتارلىقلارنى تەلەپ قىلىدىغان ئېلىمېنتلارنى ئۆزىگە مۇجەسسەملىگەن، ئۇنىڭ ئۈستىگە مەشغۇلات ئۇسۇلى ئىنتايىن ئاددى!

ئويۇندىكى باش پېرسوناژىمىز بولسا، ئورۇق سېمىزلىكى، بەدەن سۈپىتى، ئالاھىدىلىكى ئوخشىمايدىغان ئۈچ دانە قوي بولۇپ، چوڭىنىڭ ئالاھىدىلىكى ئېغىر-بېسىق ۋە كۈچلۈك، بىر قاراشقىلا قارا ئەمگەككە يارايدىغانلىقىنى كۆرۈۋېلىش تەس ئەمەس، ئوتتۇرانجىسىنىڭ ئالاھىدىكى، ئەپچىل ۋە چەبدەس بولۇپ، سەل شوخراق، كىچىكى بولسا زېرەك ۋە ئەقىللىق، بولۇپمۇ يەر ئاستى يولدىن ئەپچىللىك بىلەن ئۆتۈپ ئاكىلىرىغا يول ئېچىپ بېرىشتە رولى ئالاھىدە چوڭ.

ئويۇن كۆپچىلىكتىن ئۈچ قوينىڭ ئالاھىدىلىكىگە ئاساسەن، ئەپچىللىك بىلەن كاللا ئىشلىتىپ ئۇلارنى ئامان – ئېسەن ئۆيگە قايتۇرۇپ كېلىشنى تەلەپ قىلىدۇ، بۇ جەرياندا سىز ئويۇنغا قاتتىق بېرىلىپ كېتىشىڭىز، ھەتتا تاماق ۋاقتىنىڭ بولۇپ قالغانلىقىنىمۇ ئەستىن چىقىرىپ قويۇشىڭىز مۇمكىن!

ئويناش ئۇسۇلى:

ئايرىم ئايرىم ھالدا 1، 2، 3 كۇنۇپكىسى ئارقىلىق ئۈچ دانە قوينى تاللايمىز، ئەلۋەتتە مائۇس ئارقىلىقمۇ تاللاشقا بولىدۇ. ↓→↑← قاتارلىق يۆنىلىش كۇنۇپكىلىرى ئارقىلىق قوينىڭ ھەرىكىتىنى كونترول قىلىمىز. بىرىنچى ئۆتكەلنىڭ ئويناش ئۇسۇلى ئاۋال تىك تۇرغان كۆتەكنى ياتقۇزۇپ كۆۋرۈك ياساڭ، ئاندىن ئۈچ قوزىچاقنى بىر بىرلەپ ئۆتكۈزۈڭ، بوشلۇق كۇنۇپكىسىنى باسسىڭىز سەكرەيدۇ.