تەۋارىخى مۇسىقىيۇن
موللا ئىسمەتۇللا بىننى موللا نېمەتۇللا مۆجىزى
مۇزىكا ئىلمىنىڭ ئون ئىككىنچى پىرى شەيخ سەفايى سەمەرقەندى

ئون ئىككىنچى پىرى شەيخ سەفايى سەمەرقەندى* ھەزرەتلىرىدۇر. بۇ ئەزىز بىلمەيدىغان مۇقام ئاھاڭلىرى، بۇ ئەزىز چالالمايدىغان چالغۇ ئەسۋاپلىرى يوق دىسىمۇ بولىدۇ. بۇ پەن بويىچە ئىككى يۈزدىن ئارتۇق شاگىرتنى ماھىر قىلىپ چىقاردى. <نەشائەتى مۇسىقى> [مۇزىكىنىڭ ئۈنۈمى] ناملىق بىر رىسالە يازدى، بىر قانچە تۈرلۈك ناخشا-غەزەللەرنى ئىجات قىلدى. ھىجرىيە 869-يىلى [مىلادى 1464-1465-يىلى] ئەللىك ئالتە يېشىدا پالەچ كېسىلى بىلەن ۋاپات بولدى.

_________________
شەيخ سەفايى سەمەرقەندى-ناسىر بىننى مۇھەممەت بىننى ئىبراھىم شەيخ سەفايى سەمەرقەندى. مىلادى 1408-يىلى سەمەرقەندتە دۇنياغا كېلىپ، 1469-يىلى ۋاپات بولغان. لېكىن <تەۋارىخى مۇسىقىيۇن>دا ھىجرى 869-يىلى (مىلادى 1464-1465-يىلى) ۋاپات بولدى دەپ يېزىلغان. ئۇ مەشھۇر دىنىي پەيلاسوپ ۋە ئەدىپ بولۇپ، <ئەلبوستان> قاتارلىق ئەسەرلەرنى يازغان.