سىياسىي كېڭەش شىنجاڭ ئۇيغۇر ئاپتونوم رايونلۇق 11 – نۆۋەتلىك كومىتېتى 3 – يىغىنى كاتىبات باشقارمىسىدىن ئىگىلىشىمچە، ج ك پ مەركىزىي كومىتېتى سىياسىي بىيۇروسىنىڭ ئەزاسى، ئاپتونوم رايونلۇق پارتكومنىڭ شۇجىسى جاڭ چۈنشيەن 17 – يانۋار ئاپتونوم رايونلۇق سىياسىي كېڭەش جەمئىيەت ۋە قانۇنچىلىق كومىتېتى بۇ قېتىمقى يىغىنغا سۇنغان تەكلىپكە مۇھىم تەستىق سېلىپ، ئەزالارنىڭ كەنت ئاھالىلەر كومىتېتىنىڭ قانۇن بويىچە تۈزەش ئىقتىدار قۇرۇلۇشىغا كۆڭۈل بۆلگەنلىكىنى مۇئەييەنلەشتۈرگەن.
جاڭ چۈنشيەن تەستىقتا مۇنداق دەپ كۆرسەتكەن: شىنجاڭنى قانۇن بويىچە ئىدارە قىلىش شىنجاڭنىڭ ئىجتىمائىي مۇقىملىقى ۋە ئەبەدىي ئەمىنلىكىنى ئىشقا ئاشۇرۇشنىڭ ئۇل تېشى. شىنجاڭنى قانۇن بويىچە ئىدارە قىلىش قەدىمىنى ئومۇميۈزلۈك تېزلىتىشنىڭ ئاساسىمۇ، خىزمەتنىڭ مۇھىم نۇقتىسىمۇ ئاساسىي قاتلامدا. ئاپتونوم رايونلۇق سىياسىي كېڭەش جەمئىيەت ۋە قانۇنچىلىق كومىتېتىنىڭ بۇ تەكلىپىدە مەسىلىلەر ئەتراپلىق تەھلىل قىلىنغان بولۇپ، بۇ تەكلىپنىڭ قاراتمىلىقى ۋە ئەمەلىي قوللىنىشچانلىقى ناھايىتى كۈچلۈك. شۇڭا، مۇناسىۋەتلىك ئورۇنلار ئەستايىدىل تەتقىق قىلىپ، كەنت ئاھالىلەر كومىتېتى قۇرۇلۇشىدا ساقلىنىۋاتقان مەسىلىلەرنى تۈپتىن ھەل قىلىشى لازىم. ئاپتونوم رايونىمىزدىكى ھەر قايسى جايلار ئاساسىي قاتلام خىزمىتىنى ئەڭ مۇھىم خىزمەت قاتارىدا چىڭ تۇتۇپ، ئاساسىي قاتلام پارتىيە تەشكىلاتلىرىنىڭ قورغانلىق رولىنى تولۇق جارى قىلدۇرۇپ، ئاساسىي قاتلام پارتىيە ئەزالىرى ۋە كادىرلىرىنىڭ قانۇن – تۈزۈم قارىشى ۋە قانۇن ئېڭىنى كۈچەيتىپ، يېزىلاردىكى قانۇن – تۈزۈم تەشۋىقاتىنىڭ سالمىقىنى ئاشۇرۇشى، بۇ ئارقىلىق شىنجاڭنى قانۇن بويىچە ئىدارە قىلىشنى ھەقىقىي ئىشقا ئاشۇرۇپ، ھەر مىللەت ئاممىسىغا نەپ يەتكۈزۈشى كېرەك.

 ‹‹ئاپتونوم رايونىمىزدىكى كەنت ئاھالىلەر كومىتېتلىرىنىڭ قانۇن بويىچە تۈزەش ئىقتىدار قۇرۇلۇشىنى كۈچەيتىش توغرىسىدىكى تەكلىپ››تە يېزىلاردا جەمئىيەت باشقۇرۇشنى كۈچەيتىپ، يېزىلارنىڭ ئىجتىمائىي مۇقىملىقنى قوغداش خىزمىتىدە بىرىكمە كۈچ ھاسىل قىلىش؛ ئاساسىي قاتلام ھاكىمىيەت قۇرۇلۇشىنى كۈچەيتىپ، يېزىلارنىڭ قانۇن بويىچە تۈزەش ئىقتىدارىنى يەنىمۇ ئاشۇرۇش؛ ئاساسىي قاتلامنىڭ قانۇن بويىچە تۈزەش تەرتىپىنى قېلىپلاشتۇرۇپ، يېزىلارنىڭ ئۆز – ئۆزىنى ئىدارە قىلىش ئىقتىدارىنى جارى قىلدۇرۇش؛ يېزىلاردا قانۇنچىلىق تەشۋىق – تەربىيە خىزمىتى مېخانىزمى بەرپا قىلىش؛ يېزا پارتىيە قۇرۇلۇشى خىزمىتىنىڭ بىر تۇتاش رەھبەرلىك قىلىش ئورنىنى مۇستەھكەملەپ، ئاممىۋى تەشكىلاتلارنىڭ قانۇن بويىچە تۈزەشتىكى رولىنى جارى قىلدۇرۇش؛ يېزا ھاكىمىيىتى تەشكىلىي خىزمەت راسخوتىغا مۇناسىۋەتلىك سىياسەتلەرنى ئەمەلىيلەشتۈرۈش قاتارلىق مەزمۇنلار نۇقتىلىق ئوتتۇرىغا قويۇلغان.

ئاپتونوم رايونلۇق پارتكوم ئەزەلدىن سىياسىي كېڭەش خىزمىتىگە يۈكسەك ئەھمىيەت بېرىپ كەلگەن. جاڭ چۈنشيەن 2011 – يىلى 1 – ئايدىن ھازىرغىچە سىياسىي كېڭەش ئەزالىرى سۇنغان يەتتە پارچە تەكلىپكە تەستىق سالغان. بۇ تەكلىپلەر ئوتتۇرا، باشلانغۇچ مەكتەپ ئوقۇغۇچىلىرىنىڭ چۈشلۈك تامىقىنى ھەل قىلىش، يېزا يولۇچىلار تىرانسپورتىنىڭ تەرەققىياتىنى تېزلىتىش، مەركىزىي شەھەرنىڭ قاتناش قىستاڭچىلىقىنى تۈزەش، شىنجاڭنىڭ ئالاھىدە كەسپىي مائارىپىنى گۈللەندۈرۈش، شىنجاڭدىكى قىز ئىستۇدېنتلارنىڭ ئىشقا ئورۇنلىشىشىنى تېزلىتىش قاتارلىق ئاممىنىڭ جانىجان مەنپەئىتىگە مۇناسىۋەتلىك مەسىلىلەرگە چېتىلىدىكەن. ئاپتونوم رايونىمىزىكى مۇناسىۋەتلىك ئورۇنلارمۇ ئەزالارنىڭ پىكىر – تەكلىپلىرىگە يۈكسەك ئېتىبار بىلەن قاراپ، تەكلىپلەردە ئوتتۇرىغا قويۇلغان مەسىلىلەرنىڭ ھەممىسىنى دېگۈدەك ھەل قىلغان.

لەگلەك تورى ئۈندىدار سالونىنى قۇشىۋېلىڭ ئىزدەش نومۇرى :LEGLEK