گېرمانىيە ئاپتوموبىل ياساش سودىگىرى ئاممىباب ئاپتوموبىل گۇرۇھى بايرىقى ئاستىدىكى ئاساسلىق تارماق ماركا بولۇش سۈپىتى بىلەن، سىئات (Seat) بۇ يىللىق جەنۋە ئاپتوموبىل كۆرگەزمىسىدە پۈتۈنلەي يېڭى Vision S ئۇقۇم ئاپتوموبىلىنى ئېلان قىلىپ، بۇ ماركىدىكى SUV ئاپتوموبىللىرىنى داۋاملىق كۈچەيتىش ئىرادىسىنى بىلدۈرگەن. يېقىندا ئەنگلىيە تاراتقۇسى Autoexpress دىن ئىگىلىنىشىچە، سكودا Kodiaq ئىخچام تىپلىق SUV ئاساسىدا يېڭىدىن بىر پاسىل ھالقىغان SUV ياسايدىغان بولۇپ، ھەر يۈز 100 كىلومېتىردىكى ماي سەرپىياتى ئاران 4.7 لىتىر بولىدىكەن.

سكودانىڭ پۈتۈنلەي يېڭى پاسىل ھالقىغان SUV ئاپتوموبىلى تاشقى كۆرۈنۈش ئۇسلۇبىغا تېخىمۇ ئەھمىيەت بېرىدىغان بولۇپ، ئالدى يۈزى سكودا Superb تىن ئۆرنەك ئالىدىكەن ھەمدە ئاقما شەكىلدىكى ئاپتوموبىل ئۈستى لايىھەسى قوللىنىلىدىكەن. ئاپتوموبىل تەگلىكى نىسبەتەن ئېگىز بولۇپ، چوڭ دىيۇملۇق چاق كۇدىسى سەپلىنىپ، قۇيرۇق قىسىمىغا كۈمۈش رەڭلىك سۈرۈلۈشتىن ساقلاش تاختىسى ئورۇنلاشتۇرۇلىدىكەن. يېڭى ئاپتوموبىل بەش كىشىلىك لايىھەلىنىدىغان بولۇپ، يۈك-تاق ساندۇقىنىڭ ھەجىمى 500 لىتىردىن ئېشىپ كېتىشى، ئارقا ئورۇندۇقنى ياتقۇزغاندىكى ھەجىمى 1400 لىتىردىن ئېشىپ كېتىشى مۇمكىن ئىكەن.

ھەرىكەت كۈچى جەھەتتىن، يېڭى ئاپتوموبىلغا ئاممىباب گۇرۇھىنىڭ ئوخشىمىغان گاز چىقىرىش مىقدارىدىكى بىر يۈرۈش بېنزىن ۋە دىزېل ماتورلىرى سەپلىنىدىغان بولۇپ، قول خوتلۇق ۋە DSG ئاپتوماتىك خوتلۇق سۈرئەت ئۆزگەرتكۈچ سەپلىنىدىكەن. يېڭى ئاپتوموبىلنىڭ يەنە تېخىمۇ مۇھىت ئاسرايدىغان GreenLine نۇسخىسى بولۇپ، ھەر كىلومېتىردا قويۇپ بېرىدىغان كاربون تۆت ئوكسىد مىقدارى 110 گىرامدىن تۆۋەن، ھەر 100 كىلومېتىردىكى ماي سەرپىياتى ئاران 4.7 لىتىر بولىدىكەن. 

سكودا يېڭى پاسىل ھالقىغان SUV ئاپتوموبىلىنىڭ ئىچكى قىسىمى نىسبەتەن ھەرىكەت تىپلىق ئۇسلۇبتا لايىھەلىنىدىغان بولۇپ، چوڭ ئېكران ۋە كۆپ خىل بىخەتەرلىك تېخنىكىلىرى سەپلىنىدىكەن. يېڭى ئاپتوموبىل بازارغا سېلىنغاندىن كېيىن تۇلپار X4 ۋە لەندروۋېر Evoque قاتارلىق ئاپتوموبىللار بىلەن رىقابەتلىشىدىكەن. سكودا كەلگۈسىدە يەنە نىسسان Juke بىلەن رىقابەتلىشىدىغان ئاپتوموبىل تىپىنى ئىشلەپچىقىرىدىكەن ھەمدە مەھسۇلاتلىرىنى تەڭشەپ، 2020-يىلىدىن بۇرۇن سېتىش مىقدارىنى 1.5 مىليونلۇق نىشانغا يەتكۈزىدىكەن.