دۆلەت رەئىسى شى جىنپىڭ 18-سېنتەبىر ھىندىستان دۇنيا ئىشلىرى كومىتېتىدا ‹‹قول تۇتۇشۇپ مىللىي گۈللىنىش ئارزۇسى ئۈستىدە ئىزدىنەيلى!›› دېگەن تېمىدا مۇھىم نۇتۇق سۆزلىدى. شى جىنپىڭ جۇڭگو-ھىندىستاننىڭ دوستانە ھەمكارلىقىنى شەرھىيەلىدى، جۇڭگو-ھىندىستان ئىككى دۆلەتنىڭ تېخىمۇ يېقىن تەرەققىيات شېرىكلىرى، ئېشىشقا باشلامچى بولۇشتىكى ھەمكارلىق شېرىكلىرى، ئىستراتېگىيەلىك ھەمكارلىقتىكى دۇنياۋى شېرىكلەردىن بولۇشنى تەكىتلىدى      

 شىنخۇا تورى، يېڭى دېھلى، 18-سېنتەبىر تېلېگراممىسى: دۆلەت رەئىسى شى جىنپىڭ 18-سېنتەبىر ھىندىستان دۇنيا ئىشلىرى كومىتېتىدا ‹‹قول تۇتۇشۇپ مىللىي گۈللىنىش ئارزۇسى ئۈستىدە ئىزدىنەيلى!›› دېگەن تېمىدا مۇھىم نۇتۇق سۆزلىدى. شى جىنپىڭ جۇڭگو-ھىندىستاننىڭ دوستانە ھەمكارلىقىنى شەرھىيەلىدى، جۇڭگو-ھىندىستان ئىككى دۆلەتنىڭ تېخىمۇ يېقىن تەرەققىيات شېرىكلىرى، ئېشىشقا باشلامچى بولۇشتىكى ھەمكارلىق شېرىكلىرى، ئىستراتېگىيەلىك ھەمكارلىقتىكى دۇنياۋى شېرىكلەردىن بولۇشنى تەكىتلىدى. شى جىنپىڭ جۇڭگونىڭ تەرەققىيات نىشانىنى تونۇشتۇرۇپ، جۇڭگونىڭ تىنچ تەرەققىيات يولىنى شەرھىيەلىدى، جۇڭگونىڭ جەنۇبىي ئاسىيا ئەللىرى بىلەن بولغان ھەمكارلىقىنىڭ ئىستىقبالىغا نەزەر سالدى، جۇڭگونىڭ جەنۇبىي ئاسىيادىكى ھەرقايسى دۆلەتلەر بىلەن ئىناق ئۆتۈپ، جەنۇبىي ئاسىيا رايونىنىڭ تەرەققىياتى ئۈچۈن تېخىمۇ زور تۆھپىلەرنى قوشۇشنى خالايدىغانلىقىنى بىلدۈردى.    

شى جىنپىڭ مۇنۇلارنى تەكىتلىدى: جۇڭگو بىلەن ھىندىستان تېخىمۇ يېقىن تەرەققىيات شېرىكى، ئىقتىسادنى ئاشۇرۇشقا يېتەكلەيدىغان ھەمكارلىق شېرىكى، ئىستراتېگىيەلىك ھەمكارلىقتىكى دۇنياۋى شېرىكلەردىن بولۇشى كېرەك. شى جىنپىڭ مۇنداق دەپ كۆرسەتتى: جۇڭگو-ھىندىستان خەلقى بىر-بىرىگە قوشنا، قەدىمدە قويۇق ئالاقە قىلغان، يېقىنقى دەۋردە جاپا-مۇشەققەتتە بىللە بولغان، ھازىر بولسا بىرلىكتە گۈللىنىۋاتىدۇ. ئۇ ئىككى تەرەپنىڭ دىققىتىنى تەرەققىياتقا مەركەزلەشتۈرۈشىنى تەشەببۇس قىلىپ مۇنداق دېدى: جۇڭگونىڭ «دۇنيا زاۋۇتى»، ھىندىستاننىڭ «دۇنيا ئىشخانىسى» دېگەن نامى بار، ئىككى تەرەپ ھەمكارلىقنى كۈچەيتىپ، دۇنيادا ئەڭ رىقابەت كۈچىگە ئىگە ئىشلەپچىقىرىش بازىسى، ئەڭ جەلپكارلىققا ئىگە ئىستېمال بازىرىنى بەرپا قىلىشى لازىم.   

ئۇ مۇنداق دېدى: جۇڭگونىڭ تەيجى گۇمپىسى بىلەن ھىندىستاننىڭ يوگا گۇمپىسى، جۇڭگو تېبابىتى بىلەن ھىندىستاننىڭ ئايۇرۋېداسى كىشىنى ھەيران قالدۇرىدىغان دەرىجىدە ئوخشىشىپ كېتىدۇ، ئىككى دۆلەت خەلقىنىڭ نەچچە مىڭ يىل ئەمەل قىلىپ كەلگەن كىشىلىك تۇرمۇش پەلسەپىسىمۇ بەك ئوخشاش كېتىدۇ. ئىككى تەرەپ ئىككى دۆلەتنىڭ قەدىمكى دەۋردىكى ئادىمىيەت روھىنى نۇرلاندۇرۇپ، بۇ ئىككى چوڭ مەدەنىيەتنى ئالماشتۇرۇش، ئۆزئارا ئەينەك قىلىشقا ئەھمىيەت بېرىشى لازىم. ئىككى تەرەپ ياشلار، مەدەنىيەت، مائارىپ، ساياھەت، دىن، تاراتقۇلار ۋە رادىيو-كىنو-تېلېۋىزىيە، يەرلىك ئۆلكە، شەھەرلەر قاتارلىق ساھەلەردىكى ئالماشتۇرۇش، ھەمكارلىقنى كېڭەيتىشكە قوشۇلدى. جۇڭگو ھىندىستان تاۋاپچىلىرىنىڭ جۇڭگو شىزاڭدىكى مۇقەددەس جايلارنى تاۋاپ قىلىشىغا قولايلىق يارىتىش ئۈچۈن، نىدۇلا تاغ ئېغىزىدىن ئۆتىدىغان تاۋاپ يولىنى كۆپەيتىپ ئېچىشنى قارار قىلدى.   

شى جىنپىڭ مۇنۇلارنى تەكىتلىدى: جۇڭخۇا مىللەتلىرى ئەزەلدىن تىنچلىقنى سۆيۈپ، دوستلۇق، ئىناق قوشنىدارچىلىققا ئەھمىيەت بېرىپ كەلگەن. جۇڭخۇا مىللەتلىرى تەشەببۇس قىلىدىغان «ئالەم بىزگە ئورتاق» دېگەن قاراش بىلەن ھىندىستان خەلقى ئىنتىلىدىغان «دۇنيا بىر ئائىلە» دېگەن قاراش، جۇڭخۇا مىللەتلىرى ئىخلاس قىلىدىغان «شەپقەتلىك بولۇش» بىلەن ھىندىستان خەلقى تەشەببۇس قىلىدىغان «زىيان سالماسلىق» قارىشى ئوخشاپ كېتىدۇ، مەن ئىككى چوڭ قەدىمكى مەدەنىيەتلىك ئەللەر بولغان جۇڭگو بىلەن ھىندىستاننىڭ قوشنا چوڭ دۆلەتلەر دوستانە بىللە ئۆتىدىغان يولدا مېڭىش ئىقتىدارى، پاراسىتىنىڭ بارلىقىغا ئىشىنىمەن.   

شى جىنپىڭ مۇنۇلارنى تەكىتلىدى: تىنچ، مۇقىم، تەرەققىي قىلىپ گۈللەنگەن جەنۇبىي ئاسىيا بۇ رايوندىكى دۆلەتلەر ۋە خەلقىنىڭ مەنپەئەتىگە ئۇيغۇن، جۇڭگو يىپەك يولى ئىقتىساد بەلبېغى ۋە 21-ئەسىر دېڭىز ئۈستى يىپەك يولى بەلبېغى ئارقىلىق، جەنۇبىي ئاسىيا دۆلەتلىرى بىلەن بىرلىكتە تېز تەرەققىي قىلىشنى ئۈمىد قىلىدۇ. جۇڭگو ھىندىستان بىلەن بىرلىكتە، بۇ رايوننىڭ تەرەققىياتىغا تېخىمۇ چوڭ تۆھپە قوشۇشنى، ھىمالايا تاغ تىزمىسىنىڭ ئىككى تەرىپىدىكى ئۈچ مىليارد خەلقنى تىنچلىق، دوستلۇق، مۇقىملىق، گۈللىنىشتىن ئورتاق بەھرىمەن قىلىشنى خالايدۇ.