22-دېكابىر، ئۈرۈمچى شەھىرى مېترو 1-لىنىيەسىنىڭ تەنتەربىيە مەركىزى بېكىتىدىن ئۆسۈملۈكلەر باغچىسى بېكىتىگىچە بولغان ئارىلىق قوش لىنىيەدە تۇتاشتۇرۇلدى. بۇ بۆلەك مېترو 1-لىنىيەسىنىڭ 12-بۆلىكى بولۇپ، ئومۇمىي ئۇزۇنلۇقى 1043 مېتىر كېلىدۇ، جۇڭگو تۆمۈريول 20-ئىدارىسى گۇرۇھى چەكلىك شىركىتى قۇرۇلۇشنى ھۆددىگە ئالغان. بۇ قېتىم قوش يۆنىلىشتە تونېلنىڭ تۇتاشتۇرۇلۇشى مۆلچەردىن 18 كۈن بۇرۇن تاماملانغان.    جۇڭگو تۆمۈريول 20-ئىدارىسى گۇرۇھى چەكلىك شىركىتى ئۈرۈمچى رېلىسلىق قاتناش 1-لىنىيەسى 12-بۆلىكى تۈرىنىڭ باش ئىنژېنېرى جاۋ سۈيخۇڭنىڭ تونۇشتۇرۇشىچە، بۇ بۆلەك 2014- يىلى 8- ئايدىن باشلاپ قېزىلىشقا باشلىغان بولۇپ، كان قېزىش ئۇسۇلى قوللىنىلغان، بىر يىل تۆت ئاي قۇرۇلۇش قىلىش ئارقىلىق، ئاخىرى قوش يۆنىلىشتە تونېلنى تۇتاشتۇرۇش ئەمەلگە ئاشۇرۇلغان. نۆۋەتتە، تونېل ئىچىگە تىرەك قويۇش خىزمىتى ئاياغلاشقان بولۇپ، كېلەر يىلى باھاردىن كېيىن 2- قېتىملىق قوپۇرۇش خىزمىتى باشلىنىدىكەن.

   مۇخبىر تونېلنىڭ ئىچى نەم بولۇپ، ئىشچىلارنىڭ تونېلدا مۇناسىپ ئاسراش خىزمىتى ئېلىپ بېرىۋاتقانلىقىنى كۆردى. ئىگىلىنىشىچە، مېترو 1-لىنىيەسىنىڭ شىمالىي بۆلىكى ئاساسلىقى بېيجىڭ يولىغا جايلاشقان بولۇپ، ئارىلىقى تەخمىنەن 10 مېتىر كېلىدىغان قوش يۆنىلىشلىك تونېلنىڭ كۆپ قىسمى كۆكەرتىش بەلبېغى ئاستىغا جايلاشقان بولۇپ، يېشىللاشتۇرۇشتا ئىشىلتىدىغان سۇنىڭ ئاستىغا سىڭىشىپ كېتىش ئەھۋالى بىر قەدەر ئېغىر ئىكەن.

   بۇ بۆلەكنىڭ رايون ئارىلىقى دائىرىسى ئىچىدىكى گېئولوگىيەلىك قۇرۇلما مۇرەككەپ بولۇپ، يەر ئاستىدا قۇم- شېغىل يەر قاتلىمى كۆپرەك بولۇپلا قالماي يەنە، يەر تەۋرەش ئۈزۈلمە بەلبېغىدىن ئۆتكەچكە، تونېل قۇرۇلۇشىغا قىيىنچىلىق ئېلىپ كەلگەن. جاڭ سۈيخۇڭ مۇنداق دېدى: بىز قۇرۇلۇشنىڭ بىخەتەلىكىگە كاپالەتلىك قىلىش ئۈچۈن، يېشىللاشتۇرۇش بەلبېغىنىڭ سۇغىرىش ئەھۋالىنى ھەر ۋاقىت كۈزىتىپ، سۇنىڭ سىڭىپ كىرىشى ئېغىر بولغان جاينى بېتون بىلەن قوپۇرۇپ چىقىپ، سۇنىڭ ئۆتۈپ كېتىشىنىڭ ئالدىنى ئالدۇق ھەمدە تونېل تېمىنى قوپۇرۇش ماتېرىيالىنىڭ قېلىنىلىقىنى 70 سانتىمېتىرغا كۆتۈردۇق.

   بۇ بۆلەكتە جەمئىي بىر بېكەت بىر رايون ئارىلىقى بار، يەنى تەنتەربىيە مەركىزى بېكىتى ۋە تەنتەربىيە مەركىزى بېكىتىدىن ئۆسۈملۈكلەر باغچىسى بېكىتىگىچە بولغان رايون ئارىلىقى. نۆۋەتتە، رايون ئارىلىقى تونېلى قوش يۆنىلىشتە تۇتاشتۇرۇلدى، بېيجىڭ شىمالىي يولى بىلەن خېبىي يولىنىڭ كېسىشكەن يول ئېغىزىغا جايلاشقان تەنتەربىيە مەركىزى بېكىتىنىڭ ئۆگزىسىمۇ 10- ئاينىڭ ئاخىرى يېپىلىپ بولغان.