پايدىلىنىش خەۋەرلىرى تورى 23-مارت خەۋىرى، نۇر تورى تەرجىمىسى: شياڭگاڭ تاراتقۇرلىرىنىڭ ئېيتىشىچە، شاڭخەي شەھىرى يېقىندا توردا تىزىملىتىپ ئالدىن كېلىشىپ ئاندىن ئاجرىشىشنى يولغا قويۇشنى ئويلىشىۋاتقان، سەۋەبى ھازىر ئىشلىتىلىۋاتقان سېستىما يېتىشەلمەي قالغان. شياڭگاڭ «نەنخۇا گېزىتى» تورى 21-مارت «يېڭى دىموكراتىيە كەچلىك گېزىتى» دىن نەقىل كەلتۈرۈپ بەرگەن خەۋىرىگە ئاساسلانغاندا، دۆلەتنىڭ مۇناسىۋەتلىك تارماقلىرى ئالدىنقى ئاينىڭ بېشىدا ئېلان قىلغان خىزمەت نىزامىدا ئاجراشقۇچىلار ئاجرىشىشقا رۇخسەت قىلىنىشتىن بۇرۇن چوقۇم مەسلىھەت سوراشنى قوبۇل قىلىشى كېرەك دەپ بەلگىلەنگەن بولۇپ، بۇنداق بولغاندا ئاجرىشىش رەسمىيىتىنى بېجىرىش ئۈچۈن تېخىمۇ كۆپ بولغان ۋاقىت ۋە بايلىق سەرپ قىلىش زۆرۈر بولىدىكەن.خەۋەردە ئېيتىلىشىچە، مەسلىھەت سوراش باسقۇچىنىڭ مەقسىتى بولسا ئاجرىشىدىغان ئىككى تەرەپ ئاجرىشىشنىڭ ئاقىۋىتىگە قارىتا تولۇق ئويلانغان بولۇشىغا كاپالەتلىك قىلىش ۋە كۈنسېرى ئېشىپ بېرىۋاتقان ئاجرىشىش نىسبىتىنى تۆۋەنلىتىش ئىكەن. ماقالىدە مۇنداق تونۇشتۇرۇلغان، نىكاھ تىزىملىغۇچى خادىملار ئاجراشقۇچىلاردىن ئاجرىشىش سەۋەبى ھەمدە ئۇلارنىڭ مال-مۈلۈكنى بىرتەرەپ قىلىش ۋە پەرزەنتلەرنى بېقىش قاتارلىق مەسىلىلەرگە قارىتا مەسلىھەتلىشىش ئەھۋالىنى سۈرۈشتە قىلىش لازىم. كەسپىي مەسلىھەت بەرگۈچى خادىملارمۇ نىكاھ تىزىملىغۇچى خادىملار بىلەن بىرلىكتە ئاجراشقۇچىلارنى ياردەم بىلەن تەمىنلەيدۇ.

 ئەگەر ئاجراشقۇچىلار ئۆزىنىڭ ئاجرىشىش ئىلتىماسى ئېھتىياتچانلىق بىلەن ئويلىشىشتىن ئۆتمىگەن دەپ ھېس قىلسا، ئۇنداقتا ئىجتىمائىي خىزمەتچىلەرنى تەكلىپ قىلسا ياكى ئادۋوكات ئوتتۇرغا چىقسا بولىدىكەن. خەۋەردە ئېيتىلىشىچە، نىكاھ تىزىملاش خادىملىرى يېڭىدىن كۆپەيگەن خىزمەت مىقدارى ۋە ئاجرىشىش ئەنزىلىرىنىڭ سانىغا يېتىشىپ بولالمىغان.شاڭخەي شەھەرلىك خەلق ئىشلار ئىدارىسى نىكاھ ئىشلىرىنى باشقۇرۇش باشقارمىسىنىڭ مۇئاۋىن باشلىقى سۈن شياۋخوڭ مۇنداق دېگەن: مۇناسىۋەتلىك تارماقلار توردا تىزىملىتىپ ئالدىن كېلىشىش تۈزۈمىنى يولغا قويۇش ئارقىلىق ئاجرىشىش رەسمىيىتىنى بېجىرىش جەريانىنى تېخىمۇ تىز، تېخىمۇ يۇقىرى ئۈنۈملۈك قىلىشنى ئۆمىد قىلىشىۋاتىدۇ. نىكاھ ئىشلىرىنى باشقۇرۇش باشقارمىسىنىڭ يەنە بىر رەھبىرى بولسا، يېڭى خىزمەت بەلگىلىمىسى تېخى ئالدىنقى ئايدىن باشلاپ يولغا قويۇلغانلىقىنى، تېخنىكىلىك باغلىنىش ۋە ئېچىشقا بەلگىلىك ۋاقىت كېتىدىغانلىقىنى بىلدۈرگەن.

 شىنخۇا ئاگېنتلىقىنىڭ خەۋىرىگە ئاساسلانغاندا، 2014-يىلى جۇڭگودا تەخمىنەن 3 مىلىيون 600 مىڭ جۈپ ئەر-ئايال ئاجراشقان بولۇپ، ئون يىلنىڭ ئالدىدىكى سان بىلەن سېلىشتۇرغاندا بىر ھەسسىگە يېقىن كۆپەيگەن. خەۋەردە ئېيتىلىشىچە، ئىلگىرى ئەر-ئاياللار ئاجراشماقچى بولسا خىزمەت ئورنى ياكى ئاھالىلەر كومېتىتىنىڭ ئىسپاتى لازىم بولغاچقا، نورغۇن كىشىلەر كۆپچىلىك ئالدىدا سەتلىشىپ قېلىشتىن ساقلىنىش ئۈچۈن چىداپ ئۆتۈپ كەتكەن. 2003-يىلى ئېلان قىلىنغان «نىكاھ تىزىملاش بەلگىلىمىسى» ئاجرىشىش رەسمىيىتىنى ئاددىيلاشتۇرغان بولۇپ، ئەر-ئايال بىر كۈن ئىچىدە ئون يۈەن خەجلەپلا ئاجرىشىش كېنىشكىسىنى ئالالايدىغان بولغان.