ئامېرىكا بىرلەشمە ئاگېنتلىقىنىڭ خەۋىرىگە ئاساسلانغاندا، ئامېرىكا مونتانا  ئىشتاتىنىڭ جەنۇبىي قىسمىدىكى تاغلىق رايوندا، شۇ يەر ۋاقتى 19-چېسلا قار كۆچۈش يۈز بېرىپ، قارلىق جايدا ماشىنا ھەيدەۋاتقان ئۈچ ئادەم قارغا كۆمۈلۈپ قالغان، بۇنىڭ ئىچىدىكى ئىككى ئادەم قۇتۇلۇپ قالغان بولۇپ، يەنە بىر 38 ياشلىق ئەر بەختكە قارشى قازا قىلغان.  خەۋەرلەرگە ئاساسلانغاندا، شۇ يەرلىك ساقچى باشلىقىنىڭ ئېيتىشىچە، قارغا كۆمۈلۈپ قالغان ئۈچ ئادەم ئىچىدە، ئىككى ئادەم ئۆزى قار دۆۋىسىدىن قۇتۇلۇپ چىقالىغان بولۇپ، كېيىن ئۇلار يەنە يەنە بىر ھەمراھىنى ئىزدىگەن بولسىمۇ، بىراق ئۇنى تاپالمىغان.

     خەۋەردە ئېيتىلىشىچە، ۋەقە يۈز بېرىشتىن ئىلگىرى، جەمئىي بەش ئادەم قارلىق ماشىنىسى بىلەن بۇ يەردىن ئۆتكەن بولۇپ، ئۇلارنىڭ ئىچىدىكى بىر ئادەمنىڭ ماشىنىسى تۇيۇقسىز بۇزۇلۇپ قالغاچقا، يەنە ئىككى ئادەم ماشىنىنى توختىتىپ، ئۇنىڭغا ياردەملەشكەن، بىراق بۇ ۋاقىتتا تۇيۇقسىز قار كۆچۈپ، ئۇلار قارغا كۆمۈلۈپ قالغان.

     يەرلىك ھۆكۈمەتنىڭ ئېيتىشىچە، تەكشۈرۈش ئارقىلىق بۇ ئادەملەرنىڭ ھەممىسىنىڭ تەجرىبىلىك قارلىق ماشىنىسى ھەيدىگۈچىلەر ئىكەنلىكى ئېنىقلانغان، ئۇلارنىڭ يېنىدا ئېلىپ يۈرگەن بۇيۇملار ئىچىدە، گۈرجەك، بىخەتەرلىك ھاۋا خالتىسى ھەمدە قار كۆچۈشكە يولۇققان ۋاقىتتا، سىگنال بېرىدىغان بېئاكون (سىمسىز تېلېگراف يۆنىلىش كۆرسىتىش بەلگىسى) بار ئىكەن. بۇ ئىككى ئادەمنىڭ ئۆزىنى قۇتۇلدۇرالىشىدىكى سەۋەبمۇ شۇ ئىكەن.

     ۋەقە يۈز بەرگەندىن كېيىن، مونتانا ئىشتاتلىق دۆلەت ئورمان ۋە قار كۆچكۈنى مەركىزى ئاگاھلاندۇرۇش تارقىتىپ، يېقىندا، تاغلىق رايونلاردا قار ياغقانلىق ۋە بوران چىققانلىق سەۋەبىدىن قار دۆۋىسىنىڭ تۇراقسىز بولۇشىنى كەلتۈرۈپ چىقارغانلىقىنى، ئادەم ھەرىكەتلىرىنىڭ ئاسان قار كۆچۈشنى كەلتۈرۈپ چىقىرىدىغانلىقىنى، شۇنىڭ ئۈچۈن كىشىلەرنىڭ بۇ رايونلارغا خالىغانچە بارماسلىقنى ئەسكەرتتى.