چېن چياڭۋېينىڭ ئاخبارات ئېلان قىلىش يىغىنىدىن ئۇقۇشىچە، 2015 – يىللىق ئاسىيا – ياۋروپا تاۋارلار يەرمەنكىسى 12 – ئاۋغۇستتىن 16 – ئاۋغۇستقىچە ئۈرۈمچىدە ئۆتكۈزۈلىدىكەن.
بۇ يەرمەنكىنى جۇڭگو ئاسىيا – ياۋروپا كۆرگەزمىسى كاتىبات باشقارمىسى بىلەن سودا ئىشلىرى مىنىستىرلىقى تاشقى سودا تەرەققىيات ئىشلىرى ئىدارىسى بىرلىكتە ئۇيۇشتۇرىدىكەن. 2015 – يىللىق ئاسىيا – ياۋروپا تاۋارلار يەرمەنكىسىدە ‹‹يىپەك يولى سودا سۇپىسى بەرپا قىلىپ، ئاسىيا – ياۋروپانىڭ كەسىپلەر بويىچە ئۆزئارا مەنپەئەت يەتكۈزۈش ھەمكارلىقىنى ئىلگىرى سۈرۈش›› باش تېما قىلىنىپ، ئاز، ساز، كەسپىي بولۇش پىرىنسىپى بويىچە، توقۇلما كىيىم – كېچەك يەرمەنكىسى، يېزا ئىگىلىك مەھسۇلاتلىرى ۋە يېمەكلىك يەرمەنكىسى، ئۈنچە – مەرۋايىت، قاشتاش ھۈنەر – سەنئەت بۇيۇملىرى يەرمەنكىسى ۋە چېگرا سىرتىدىكى ئېسىل مەھسۇلاتلار يەرمەنكىسىدىن ئىبارەت تۆت چوڭ يەرمەنكە رايونى تەسىس قىلىنىدىكەن، يەرمەنكە كۆلىمى جەمئىي 42 مىڭ كىۋادرات مېتىرغا يېتىدىكەن.
ئاپتونوم رايونلۇق خەلق ھۆكۈمىتىنىڭ مۇئاۋىن باش كاتىپى يۈ خۇەن ئاخبارات ئېلان قىلىش يىغىنىدا مۇنداق دېدى: 2014 – يىلى 24 – ئاۋغۇست ئېچىلغان ئاپتونوم رايونلۇق پارتكومنىڭ 58 – قېتىملىق دائىمىي كومىتېت (كېڭەيتىلگەن) يىغىنىدا 2014 – يىلىدىن باشلاپ جۇڭگو ئاسىيا – ياۋروپا كۆرگەزمىسىنى ‹‹بىر يەرمەنكە، بىر كۆرگەزمە›› ئەندىزىسى بويىچە ئۆتكۈزۈش، قوش يىلدا يەرمەنكە، تاق يىلدا سودا خاراكتېرلىك كەسپىي كۆرگەزمە ئۆتكۈزۈش ئېنىق ئوتتۇرىغا قويۇلدى. شۇڭا، بۇ يىل ئۆتكۈزۈلىدىغان 2015 – يىللىق ئاسىيا – ياۋروپا تاۋارلار يەرمەنكىسى جۇڭگو ئاسىيا – ياۋروپا كۆرگەزمىسىنى ۋاسىتە قىلىپ، يەرمەنكە – كۆرگەزمە ئىقتىسادىنىڭ شىنجاڭنىڭ زامانىۋى كەسىپ سىستېمىسى قۇرۇلۇشى ۋە سودا ھەمكارلىقىدىكى تۈرتكىلىك رولىنى جارى قىلدۇرۇپ، جۇڭگو ئاسىيا – ياۋروپا كۆرگەزمىسى بىلەن ماسلاشتۇرۇلىدۇ.