ۋاڭيى تورى خەۋىرى، نۇر تورى تەرجىمىسى:

كانادا ۋانكوۋېردا ئۆتكۈزۈلگەن  Pwn2Own دۇنيا خاككېرلار مۇسابىقىسىدا، 360Vulcan كوماندىسى 11 سىكۇنىتتىلا بۇ نۆۋەتلىك مۇسابىقىدىكى قىيىنلىق دەرىجىسى ئەڭ چوڭ بولغان گۇگېل تور كۆرگۈچىنى بۇزىۋەتتى ھەمدە سىستېمىنىڭ ئەڭ يۇقىرى ھوقۇق چېكىگە ئېرىشتى. بۇ جۇڭگو بىخەتەرلىك ئۆمىكىنىڭ Pwn2Own تارىخىدا تۇنجى قېتىم Chrome نى بۇزۇشى ھېسابلىنىدۇ.

بۇنىڭدىن سىرت، 360Vulcan كوماندىسى يەنە مىكروسوفىت Edge تور كۆرگۈچى ئاساسىدىكى Adobe Flash Player نىمۇ بۇزۇپ، ئوخشاشلا سىستېمىنىڭ ئەڭ يۇقىرى ھوقۇق چېكىگە ئېرىشتى. ئىككى تۈرنى تاماملاپ كوماندا 132500 دوللار مۇكاپات ۋە 25 نومۇرغا ئېرىشتى.

Chrome گۇگېلنىڭ بىخەتەرلىك مۇداپىئە تېخنىكىسىنىڭ ئەڭ يۇقىرى سەۋىيەسىگە ۋەكىللىك قىلىدۇ. دۇنياغا داڭلىق «خاككېرلار ئۆمىكى» Google Project Zero دىن سىرت، گۇگېل يەنە نەچچە مىڭلىغان مۇلازىمىتېر ۋە چوڭقۇرلاپ ئېچىش تېخنىكىسى ئارقىلىق Chrome قاتارلىق مەھسۇلاتلارنىڭ يوچۇقلىرىنى تەكشۈرۈپ سىنايدۇ. بۇ تەدبىر Chrome نىڭ يوچۇقىنى سىرتقى ساھەنىڭ بايقاپ قېلىش ئېھتىماللىقىنى زور نىسبەتتە تۆۋەنلىتىدۇ.

ئوخشاشلا، Chrome يەنە يەرشارىدىكى ۋىندوۋس ئىچكى يادروسىغا ھۇجۇم قىلىش يۈزىنى ئېتىۋېتىدىغان بىردىنبىر قۇم ساندۇقى سىستېمىسىغا ئىگە. قۇم ساندۇقىنى ئېتىۋەتكەندە، ھۇجۇم قىلىش كودى سىرتقى قىسىمدىكى بايلىققا قارىتا قايتا زىيارەت قىلىش ھوقۇق چېكى ھازىرلىمايدۇ. Chrome مۇ شۇ سەۋەبتىن تارىختىكى Pwn2Own مۇسابىقىسىنىڭ ھەممىسىدە خاككېرلار دۇچ كەلگەن ئاخىرقى خىرىسقا ئايلانغان، ئەڭ يېڭى نۇسخا Chrome نىڭ بىخەتەرلىك سىستېمىسى ئىلگىرىكى يىللاردىكىدىن تېز سۈرئەتتە يۇقىرى كۆتۈرۈلگەن، Chrome نى بۇزۇش ۋە سىستېمىنى كونترول قىلىش ھوقۇقىغا ئېرىشىش «ئورۇنلاش مۇمكىن بولمايدىغان ۋەزىپە» دەپ قارالغان.

بۇ قېتىم 360Vulcan كوماندىسى 360 يانفون مۇھاپىزەتچىسى بىلەن بىرلىشىپ مۇسابىقىگە قاتنىشىپ، تۆت يوچۇققا ھەمكارلىشىپ ھۇجۇم قىلدى، پەقەت 11 سېكۇنىتتىلا يوچۇقنى تېپىپ تاپشۇردى. باھالاش كومېتىتىدىكى مۇتەخەسىسلەر بۇنى ئىناۋەتلىك دەپ قارىدى.

2015-يىلى، 360 بىخەتەرلىك ئۆمىكى گۇگېل، مىكروسوفىت، ئالما ۋە Adobe ئۈچۈن نەچچە يۈزلىگەن يوچۇقنى تېپىپ، ئاشكارا مىننەتدارلىق بىلدۈرۈشكە ئېرىشكەن، سانلىق مىقدار تەرتىپىدە دۇنيادا 2-ئورۇندا تۇرىدۇ، «شەرقتىكى ئەڭ كۈچلۈك بۆكلۈك قوشۇن» شەرىپىگە ئېرىشكەن. بۇ يوچۇقنى ناۋادا تور «قورال-ياراق شىركىتى» گە سېتىپ بەرسە، بىر يوچۇقنىڭ قىممىتى نەچچە ئون مىڭ دوللارغا يېتىدىكەن.