جۇڭگو ئاخبارات تورى خەۋىرى، نۇر تورى تەرجىمىسى:

ياپونىيە تاراتقۇلىرىنىڭ خەۋىرىگە قارىغاندا، تېرورلۇققا قارشى تۇرۇشنى كۈچەيتىش، كىچىك تىپتىكى ئۇچقۇچىسىز ئايروپىلانلارنىڭ مۇھىم ئەسلىھەلەرنىڭ ئاسمىنىدا ئۇچۇشىنى چەكلەشنى مەقسەت قىلغان ئۇچقۇچىسىز ئايروپىلاننى تىزگىنلەش قانۇنى شۇ يەر ۋاقتى مۇشۇ ئاينىڭ 17-كۈنى چۈشتىن كېيىن ياپونىيە ئاۋام پالاتاسىنىڭ ئومۇمىي يىغىنىدا ئەڭ ئاخىرىدا ماقۇللۇقتىن ئۆتكەن.

ياپونىيە تاراتقۇلىرىنىڭ كۆرسىتىشىچە، بۇ قانۇن يەتتە دۆلەت گۇرۇھى (G7) باشلىقلىرى يىغىنىنىڭ تۇنجى مەيدان مىنىستىرلار (دىپلوماتىيە مىنىستىرلىرى) يىغىنى 4-ئاينىڭ 10-كۈنى خىروسىما شەھىرىدە ئېچىلىشتىن بۇرۇن يۈرگۈزۈلۈشى مۇمكىن ئىكەن.

يەتتە دۆلەت گۇرۇھى مىنىستىرلار يىغىنىنى يېقىنلىشىشىغا ئەگىشىپ، ياپونىيەنىڭ ھاكىمىيەتتىكى پارتىيەسى ئۇچقۇچىسىز ئايروپىلانلارنى تىزگىنلەش قانۇنىنى ماقۇللۇقتىن ئۆتكۈزۈشكە ئالدىرىغان. بۇ قانۇندا ئۇچقۇچىسىز ئايروپىلانلارنىڭ باش ۋەزىر مەھكىمىسى، پادىشاھ سارىيى، چەتئەللىك مۇھىم ئەربابلار چۈشكەن ئورۇنلار قاتارلىقلارنىڭ ئاسمىنىدا ئۇچۇشى چەكلەنگەن ھەمدە ساقچىلارنىڭ زۆرۈر تېپىلغاندا، گۇمانلىق ئۇچقۇچىسىز ئايروپىلانلارنى ۋەيران قىلىشىغا يول قويغان.

ئۇچقۇچىسىز ئايروپىلانلارنى باشقۇرۇش جەھەتتە، 2015-يىلى 9-ئايدا ياپونىيە گەرچە يېڭىدىن ئۆزگەرتىلگەن «ئاۋىياتسىيە قانۇنى»نى ماقۇللىغان بولسىمۇ، ئەمما بۇ قانۇندا ئۇچقۇچىسىز ئايروپىلانلارنى مەجبۇرىي ھالدا ھەيدىۋېتىش بەلگىلەنمىگەن. شۇڭلاشقا بۇ قانۇن تېررورلۇققا قارشى تۇرۇش جەھەتتە مۇكەممەل ئەمەس دەپ قارالغان.