جۇڭگو مالىيە ئىقتىساد تورى 17-مارت خەۋىرى، نۇر تورى تەرجىمىسى:

رۇسىيە ئەركىن دېموكراتلار پارتىيەسى 15-مارت رۇسىيە فېدېراتسىيە ھۆكۈمىتىدىن سابىق سوۋېت ئىتتىپاقىنى ئەڭ ئاخىرقى رەھبىرى گورباچېف ۋە رۇسىيەنىڭ تۇنجى نۆۋەتلىك زۇڭتۇڭى يىلىتسىن ھوقۇق يۈرگۈزگەن مەزگىلدە يۈرگۈزگەن سىياسەتلىرىنىڭ جىنايەت ئىكەنلىكىنى دۆلەت قاتلىمى جەھەتتىن بېكىتىشنى تەلەپ قىلغان. گورباچېف شۇ كۈنى بۇنىڭغا ئىنكاس قايتۇرۇپ: ئەركىن دېموكراتلار پارتىيەسىنىڭ مەقسىتى جەمئىيەتتە جىددىي كەيپىيات پەيدا قىلىش، بۇنداق پارتىيەنى تارقىتىۋېتىش كېرەك، دېگەن.

رۇسىيە تاراتقۇلىرىنىڭ خەۋىرىدە دېيىلىشچە، ئىلىنوف باشچىلىقىدىكى رۇسىيە ئەركىن دېموكراتلار پارتىيەسى رۇسىيە فېدېراتسىيە ھۆكۈمىتىگە مەكتۇپ يوللاپ: تارىخىي ئادىللىق پىرىنسىپىنى چىقىش نۇقتىسى قىلىپ، رۇسىيە ھۆكۈمىتى چوقۇم دۆلەت قاتلىمى جەھەتتىن گورباچېف بىلەن يىلىتسىننىڭ ۋەزىپە ئۆتىگەن مەزگىلدىكى سىياسىي ھەرىكەتلىرىنى باھالاپ چىقىش كېرەك، دېگەن.

بۇ مەكتۇپتا مۇنداق دېيىلگەن: گورباچېف بىلەن يىلىتسىن ئەينى مەزگىلدىكى دۆلەتنىڭ ئەڭ ئالىي رەھبىرى بولۇش سۈپىتى بىلەن چىقارغان قارار ۋە سىياسەتلىرى سوۋېت ئىتتىپاقىنىڭ پارچىلىنىپ كېتىشى ۋە مىللەت توقۇنۇشىنى كەلتۈرۈپ چىقىرىپ، خەلق ئارىسىدا يۇقۇملۇق كېسەللىكلەرنىڭ تىز سۈرئەتتە يامراپ كېتىشى ۋە ئۆلۈپ كېتىش نىسبىتىنى ئۆرلىتىۋەتكەن، ھەمدە بۇنىڭ بىلەن دۆلەتنىڭ تارىختىن بۇيانقى ئەڭ ئېغىر كىرزىسغا دۇچ كېلىشىگە سەۋەبچى بولغان: مەسىلەن، سانائەت ئىشلەپچىقىرىش ئومۇمىي قىممىتى يېرىمدىن كۆپرەك تۆۋەنلەپ كەتكەن، يېزا ئىگىلىك ئىشلەپچىقىرىش ئومۇمىي قىممىتىنىڭ ئۈچتىن بىرى كېمىيىپ كەتكەن، يېرىمدىن كۆپرەك خەلق نامراتلىق تۇرمۇشىغا چۈشۈپ قالغان، ئۇنىڭدىن باشقا، خەلق ئاممىسىنىڭ پەن-تېخنىكا، مەدەنىيەت، مائارىپ سەۋىيەسى تۆۋەنلەپ كېتىپ، دۆلەت مۇداپىئە سىستېمىسى ۋەيران بولغان. زور مىقداردىكى دۆلەت مال مۈلكى شەخسىلەرنىڭ قولىغا چۈشۈپ كەتكەن ھەمدە زور كۆلەملىك مەبلەغ سىرتقا ئېقىپ كەتكەن. بۇ مەكتۇپتا يەنە رۇسىيەنىڭ تارىخى ساۋاقنى ئىسىدىن چىقارماي، ھەممە ئىشلاردا ئېھتىياتچان بولۇپ سىياسەت چىقىرىشىنى، يۇقىرىقىغا ئوخشاش خاتالىقلارنىڭ قايتا سادىر بولۇشىنىڭ ئالدىنى ئېلىشنى تەلەپ قىلغان.

ئەركىن دېموكراتلار پارتىيەسىنىڭ پارتىيە تەشكىلات ئەزاسى نىلوف مۇنداق دېدى: ئەركىن دېموكراتلار پارتىيەسىنىڭ مەيدانى بولسا بۇنداق ئېغىر خاتالىق سادىر قىلغان رەھبەرلەرنى چوقۇم جازالاش كېرەك، گورباچېفنىڭ ئاسىيلىق قىلمىشى ۋە يۇمشاقباشلىق مەيدانى قورقۇنچلۇق ئاقىۋەت يەنى سوۋېت ئىتتىپاقىنىڭ پارچىلىنىشىنى كەلتۈرۈپ چىقاردى. يىلىتسىن بولسا ئۇ ھاكىمىيەت يۈرگۈزگەن چاغلاردا ئۆز دۆلىتىنىڭ كارخانىلىرىنى ۋەيران قىلىپ، زور مىقداردا ئامېرىكا مەھسۇلاتلىرىنى ئىمپورت قىلدى.