مانا ‹‹ ھاينى ھۇي ، توپاقنى ئۇي ›› دەپ بولغىچە، 2010 – يىلىمۇ ئۆتۈپ كېتەيلا دەپ قالدى. بۈگۈن ئۆتۈپ كەتسە 2010 – يىلىمۇ مەڭگۈلۈك تارىخقا ئايلىنىپ كېتىدۇ. بىز بولساق داۋاملىق يىللارنى قېرىتىشنىڭ كويىغا چۈشىمىز. ئەجەبكى، يىللارنى قېرىتقاچ بىز ئۆزىمىزمۇ تۇيۇپ – تۇيماي قېرىپ كېتىمىز، بۆشۈكتىن تېخى تۈنۈگۈنلا چۈشكەندەك قىلىۋېدۇق ، بۈگۈن مانا چوپ – چوڭ ئەر بولۇپ، ئوغۇز ( ئوغلۇم ) نىڭ ئاتىسى بولۇپ قالدۇق، يەنە 4 كۈندە ‹‹ تۆشۈك ›› مىزگە كىرىپ كېتىمىز. دەرھەقىقەت، ‹‹ ئۆمۈر نېمە، ئۆمۈر ئەسلىدە بىر يۇمىلاق تۈگمىچە يول، بۈشۈكىمنىڭ ئالدىدىن قەبرىم ئالدىغىچە يول ››، ھاياتتا ئەسلىگۈدەك ئىش ، يولدا ئىلغا قىلغۇدەك ئىز قالدۇرۇپ ياشاش يۈكسەلنىڭ شېرىن ئارمانلىرى، ئەلۋەتتە!
خوش ، 2010 – يىلىدا يۈكسەل بلوگى ئۈچۈن قايسى ئەستىلىكلەر قالدىكىن ؟!
يۈكسەل بلوگ ئۈچۈن 2010 – يىلىدىكى 10 چوڭ ئىش
1. 5 – ئاينىڭ 14 – كۈنى ، شىنجاڭ ئۇيغۇر ئاپتونوم رايونىدا تور تولۇق ئەسلىگە كەلدى. پەقەت شۇندىلا يۈكسەل بلوگ قايتا تورداشلار بىلەن يۈز كۆرۈشىشنىڭ پەيتى يېتىپ كەلدى، دەپ قاراپ، 5 – ئاينىڭ 21 – كۈنى ‹‹ سالام تورداش، سالام ئەل – يۇرت ›› دەپ، قايتىدىن نەشىر قىلىندى. قايتا نەشىر قىلىنغاندىن تاكى ھازىرغىچە، يۈكسەل بلوگىنىڭ ئومۇمىي زىيارەت مىقدارى 280 مىڭدىن ئاشتى. نۆۋەتتە كۈنلۈك زىيارەت ئېقىمى ئوتتۇرا ھېساب بىلەن 800 – 600 IP بولىۋاتىدۇ.
2. 6 – ئاينىڭ 30 – كۈنى، يۈكسەل بلوگى ئىلگىرىكى يالغۇز كىشىلىك بلوگ بولۇش تارىخىغا خاتىمە بېرىپ ، بىرلىشىش = يۈكسىلىش ( Unite = Victory ) دەپ قاراپ، بوھران بلوگى بىلەن بىرلەشتى. شۇنىڭ بىلەن يۈكسەل بلوگى ئىلگىرىكى پەقەت 1 كىشى ( مەن، يۈكسەل ) باشقۇرىدىغان، يازىدىغان ھالەتتىن، ھازىرقى بوھران ۋە يۈكسەل 2 كىشى باشقۇرىدىغان، يازىدىغان بلوگقا ئايلاندى.
3. 7 – ئايدا، ‹‹ كۈنسېرى سارغىيىۋاتقان ئۇيغۇر تورلىرى ›› ۋە ‹‹ ئۇيغۇر ئۇلىنىش تورلىرىغا ئوچۇق خەت ›› … قاتارلىق يازمىلار ئېلان قىلىنىپ ئۇيغۇر تورچىلىقىدا بەلگىلىك غولىغۇلا قوزغالدى ۋە كۆپچىلىكنىڭ دىققىتى ئۇيغۇر تورچىلىقىنىڭ ساغلام تەرەققىي قىلىشىغا ئالاقىدار مەسىلىلەرگە بۇرالدى.
4. 7 – ئاينىڭ 29 – كۈنى، شىنجاڭ يېزا ئىگىلىك ئۇنىۋېرسىتېتى 2006 – يىللىق ئوقۇغۇچىسى ئىلھامجان ئەلىنى داۋالىتىش ئۈچۈن ‹‹ ساخاۋەتلىك دىللارغا ئىلتىجا … ›› ئەيلىنىپ، مەكتەپ تەرەپنىڭ ئىلھامجانغا ئىلگىرى – كېيىن بولۇپ، جەمئىي 265 مىڭ يۈەن داۋالىنىش ياردەم پۇلى بېرىشى قولغا كەلتۈرۈلدى ھەمدە كەڭ جەمئىيەتتىن 60 مىڭ يۈەن ئەتراپىدا ياردەم پۇلى يىغىلدى ( بۇ پۇللارنى ساخاۋەت ئىگىلىرى بىۋاسىتە ئىلھامجاننىڭ كارتىسىغا ئۇرغان ياكى قولىغا تۇتقازغان ) . شۇ تاپتا ئىلھامجان كۇچادىكى ئائىلىسىدە داۋالىنىۋاتقان ( دوختۇرلار ئائىلىسىگە بېرىپ داۋالاۋاتىدۇ ) بولۇپ، ئىلھامجاننىڭ خاتىرىسى تولۇق ئەسلىگە كەلدى، تاماقلارنى نورمال چايناپ يېيەلەيدىغان، بېشىنى قاشلىيالايدىغان، خەت ئوقۇيالايدىغان … ھالەتكە يەتكەن. ئاللاھقا شۈكۈرىلەر بولسۇنكى ، تېلىگەنلىرىمىزنى تېپىلىپ، سەۋەبلىرىمىزگە چۇشلۇق سېۋەتلىرىمىزدە سۇ توختاۋاتاتتى، دىللار ‹‹ ئەل قوينى ئالتۇن بۈشۈك ›› ئىكەنلىكىگە تەكرار چىن پۈتمەكتە.
5. 7 – ئايدا، يۈكسەل بلوگى يەنە بىر قېتىم نەشىرىنى يېڭىلاپ ، كۈچلۈك ھەمكارچىمىز تەدبىركار ئەپەندىنىڭ تېخنىكىلىق يېتەكچىلىكىدە WordPress نەشىرىنى ئېلان قىلدى.
6. 8 – ئايدا، يۈكسەل بلوگى ئۆزىنىڭ نەشىر قىلىنىش تارىخىدا تۇنجى قېتىم ھەقلىق ئېلان مۇلازىمىتىنى يولغا قويدى. ھازىرغىچە، شىنجاڭ ئەلدوست بىئو – تېخنىكا تەرەققىيات چەكلىك شىركىتى ، شىنجاڭ تىلسىم ئېلېكترون پەن – تېخنىكا چەكلىك شىركىتى ، شىنجاڭ بېئەس خەلقئارا سودا چەكلىك شىركىتى، ئۈرۈمچى سالامەت بىئو پەن-تېخنىكا چەكلىك شىركىتى قاتارلىق ئورۇنلار بىلەن ئېلان ھەمكارلىق مۇناسىۋىتى ئورناتتى. نۆۋەتتە يۈكسەل بلوگىنىڭ ھەقلىق ئېلان مۇلازىمىتىدىن قىلىدىغان ئايلىق كىرىمى 600 يۈەنگە يەتتى. Google AdSense دىن تور ئېچىلغان يېرىم يىلدىن بۇيان قىلغان كىرىم $100 دىن ئاشتى.
7. بۇ يىل ئىچىدە ، ‹‹ گەنسۇدىكى لاتقا – شېغىل ئاپىتى ›› ، ‹‹ پاكىستاندا ئېقىۋاتقىنى سەلمۇ ياكى كۆز ياش؟! ›› ، ‹‹ ئاپەتتىكى مەدەنىيەت ۋە مەدەنىيەتتىكى ئاپەت ›› … قاتارلىق يازمىلارنى ئېلان قىلىش ئارقىلىق ئەتراپىمىزدا يۈز بېرىۋاتقان تەبىئىي ئاپەتلەرگە ۋە ئۇنىڭ بىز ئىنسانلارغا ئېلىپ كېلىۋاتقان ئېچنىشلىق ئاقىۋېتىگە نەزەر تاشلاشقا ۋە كۆپچىلىكنى ئىنسان ۋە تەبىئەت مۇناسىۋىتى ھەققىدە ئوي سۈرۈگۈزۈشكە تىرىشتۇق.
8. بۇ يىل يەنە، ‹‹ ھەمجىنىسۋازلىق ۋە ئۇيغۇر جەمئىيىتى ›› ، ‹‹ ئانا ›› دەمدۇ ، ‹‹ ئاپا ›› دەمدۇ ؟ … ، ‹‹ مەن ›› نىڭ قولىدىن نېمە كېلىدۇ ؟ ، ‹‹ ئوغرى ئادەم ئەمەسما؟! … ›› ، ‹‹ ياشلار ۋە جىنسىيەت : جىنسىي تەربىيە ھەققىدىكى مۇنازىرە ›› ، ‹‹ سالامنىڭ كۈچى ›› ، ‹‹ ئارزۇ قىرغاقلىرىنى بويلاپ… ›› … قاتارلىق ئۆز ئىجتىمائىيىتىمىزگە ئالاقىدار يازمىلارنى ئېلان قىلىپ ، ئوقۇرمەنلىرىمىزدە بەلگىلىك ئەكس تەسىر قوزغىدۇق.
9. 23 – نۆۋەتلىك ‹‹ دۇنيا ئەيدىز كۈنى ( World AIDS Day ) ›› كۈنىنىڭ ئالدى – كەينىدە، پۈتۈن زېھنىمىزنى مەركەزلەشتۈرۈپ ‹‹ ئىنساننى ئەزىزلەپ، ھاياتنى قەدىرلەيلى ! ›› باش تېمىىسىدىكى ئەيدىزگە ئالاقىدار بىلىم – ساۋاتلار، خەۋەر ئۇچۇرلار، ئەيدىز بىمارلىرىنىڭ كەچۈرمىش – تەسىراتلىرىغا ئالاقىدار يازمىلارنى ئېلان قىلدۇق. بۇ ھەقتىكى يازمىلىرىمىز باشقا ئۇلۇغ – ئۇششاق ئۇيغۇر تور بېكەتلىرىدىمۇ كەڭ يەر ئالدى. 12 – ئاينىڭ 1 – كۈنى ، تور ساھەسىدە ئىسمى جىسمىغا لايىق بولغان ‹‹ دۇنيا ئەيدىز كۈنى ( World AIDS Day ) ›› كەيپىياتى بارلىققا كەلدى.
10 . بۇ يىل ، يۈكسەل بلوگى كەڭ بلوگگىر دوستلار، تورداشلارنىڭ قىزغىن قوللاپ قۇۋۋەتلىشى بىلەن ‹‹ ئۇيغۇرلاردىكى 2010 – يىللىق 10 چوڭ بلوگ ›› نى باھالاش پائالىيىتىنى مۇۋاپپەقىيەتلىك تەشكىللىدى. بۇ يىل مەزكۇر پائالىيەت ، شىنجاڭ ئەلدوست بىئو تېخنىكا تەرەققىيات چەكلىك شىركىتى ، «ئىزچى» خۇرۇم ئاياقلىرى باش شىركىتى ، ئۈرۈمچى ئەقلىم خەلقئارا سودا چەكلىك شىركىتى ، XJCFAN شىنجاڭ كومپيۇتېر ھەۋەسكارلىرى گۇرۇپپىسى ، قەشقەر 80 خالتا ئۇيغۇر تېبابەت چاي ، ھەسەل دۇكىنى ، 890 ئېلان بىرلەشمىسى قاتارلىق ئورۇنلارنىڭ ماددىي جەھەتتىن كۈچلۈك قوللىشىغا ئېرىشتى.
يۇقىرىقىلار ، << يۈكسەل بلوگى >> نىڭ 2010 – يىلىدا قالدۇرغان ئەستىلىكلىرى بولۇپ، بىز بۇ بىر يىل جەريانىدىكى تەجرىبە – ساۋاقلارنى ئەستايىدىل يەكۈنلەپ، 2011 – يىلىدا تېخىمۇ ياخشى بولغان نەتىجىلەرنى قولغا كەلتۈرۈش ئۈچۈن داۋاملىق تىرىشچانلىق كۆرسىتىمىز ( خۇدا خالىسا ! ) .
ئاخىرىدا ، << يۈكسەل بلوگى >> نى باشتىن – ئاخىرى قىزغىن قوللاپ – قۇۋۋەتلەپ كېلىۋاتقان كەڭ تورداشلارغا ، بلوگىر قېرىنداشلارغا كۆپتىن كۆپ تەشەككۈر ئېيتىمىز . سىلەرنىڭ قوللىشىڭىلار بولمىغان بولسا ، << يۈكسەل بلوگى >> نىڭ بۈگۈنى بولمىغان بولاتتى …
يۈكسەل بلوگى
2010 – يىلى 12- ئاينىڭ 31 – كۈنى
مەنبە: يۈكسەل بلوگى ، يازما : خەيرى – خوش، يۈكسەلنىڭ 2010 – يىلى !
يۈكسەلنىڭ كۆرپىسىدە 2010-يىلى ئاخىرقى قېتىم بىر ئېغىنىۋالاي، قالغىنىنى كېلەر يىلىدىن ئالدىرىماي دېيىشەرمىز
خەيىر،2010-يىلىدا كۆپ كېلىۋالغان ئىدۇق بۇ جايغا،بۇ قېتىم ئەڭ ئاخىرقى قېتىم يەنە بىر كېلىۋالاي…
يۈكسەل بىلوگىنىڭ ئىش-ئىزلىرىدىن خەۋەردار بولدۇق،يېڭى يىلدا يېڭى نەتىجىلەرنى قولغا كەلتۈرۈشىگە تىلەكداشمەن..
يۈكسەلدە 2010-يىلى كۆپ ئەھمىيەتلىك ئىشلار بولدى زادى. بۇلارنى ساناپ ئۆتكەنلىرى بىزنى يەنە بىر قىتىم سەگىتىپ قويدى. توغرىسى تور مەدىنىيتىنىڭ موھىم بىر قىسمى بولغان بلوگچىلىقنى ئەل-ئاۋامغا نەپ بەرگۈدەك، ئەھمىيەتلىك يېزىش ھەم ئىلىپ بىرىشنىڭ ئۈلگىسىنى تىكلەپ بەردى. يۈكسەلنىڭ كەلگۈسى تېخىمۇ پارلاپ ياشنىغاي، يۈكسەلگەي!!!
ئالدى بىلەن يۈكسەل ئەپەندىنىڭ 2010-يىلىدىن ئىبارەت بىر يىلدا پۈتكۈل ئۇيغۇر جەمئىيىتىدە ئەيدىز، تەگئات، خەيىر-ساخاۋەت، بىلوگچىلىق قاتارلىق تېمىلارنى چۆرىدەپ، ئەل-ئاۋامغا پايدىلىق يازما-ئۇچۇرلارنى يەتكۈزۈپ، ئۇيغۇر جەمئىيىتىنىڭ ساغلام پىكىر يۈنىلىشىدە تەرەققىي قىلىشىغا ئۆزىنىڭ بىر كىشىلىك تۆھپىسىنى قۇشۇپ، نۇرغۇن تورمەنلەر، ھاجەتمەنلەرگە توغرا يول، ئېنىق نىشان كۆرسىتىپ،ئۇيغۇر ئېنتىرنىت دۇنياسىدا ئۆزىنىڭ بىر كىشىلىك ئوبرازىنى ياراتتى. مېنىڭچە، تورمەنلەرنىڭ كۆپىنچىسى « يۈكسەل» دېگەن بۇ ئىسىمگە ناتۇنۇش ئەمەس بوپكەتتى.
مېنىڭ نەزىرىمدىكى يۈكسەل – مەسئۇلىيەتچان، خەلقپەرۋەر، تەپەككۈر چوڭقۇر،ساخاۋەتپەرۋەر، كېچىك پېئىل، نەزەر دائىرىسى ۋە ئىجتىمائىيەت ساھەسىدىكى بىلىمى چوڭقۇر، ھۆرمەتكە سازاۋەر زىيالىرىمىزنىڭ تىپىك ئوبرازى. جۈملىدىن، يۈكسەل بىلوگىدىكى يازمىلار، ئىنتىلىشلار، دالالەتلەر يۈكسەل ئەپەندىنىڭ روھىي دۇنياسىنىڭ يەنە بىر شەكىلدىكى ئىپادىلىنىشى. ھازىر نۇرغۇن قېرىنداشلىرىمىز ئۆزىنىڭ تۇرمۇش ھەلەكچىلىكى، خىزمەت بېسىمى،تۈگىمەس ئۇرۇق-تۇققاندارچىلىق، ئادىمىگەرچىلىك ئىشلىرىنىڭ ئالدىراشچىلىقىدا ئۆزىنىڭ تۇرمۇش رامكىسىدا پىرقىراپ، باشقىلارغا ياردەم بېرىدىغان ئىشلارنى قىلىشقا چولىسى، زېھنى يەتمەيۋاتىدۇ.
ئۆز تۇرمۇش ئالۋاڭلىرىدىن چىقىپ، باشقىلارنى، ئەل-ۋەتەننى، مىللەتنىڭ تەقدىرى ئۈچۈن ئىزدىنىش، ئەنسىرەش، ئامال-چارە ئىزدەش ۋە مۇشۇنداق بىر ئىزگۈ نىيەتنى قەلبىگە پۈكۈش ھەقىقەتەنمۇ ئەزىزلەشكە تېگىشلىك ئىش.
بىز ئالدى بىلەن «يۈكسەل بىلوگى» نىڭ 2010-يىللىق ئەجىر-مېھنەتلىرىگە، ئىزدىنىش-ئىنتىلىشلىرىغا، تۆھپە-مۇۋەپپەقىيەتلىرىگە ئالقىش ياڭرىتىش بىلەن بىرگە، بۇنىڭدىن كىيىنكى بىلوگ تەرەققىياتىغا تېخىمۇ زور ئۇتۇق تىلەيمەن!
جۈملىدىن، تۆۋەندىكىدەك تەكلىپ-پىكىرلەرنى بېرىشنى لايىق كۆردۈم:
1. يۈكسەل بىلوگىنىڭ نۆۋەتتىكى ئۇيغۇر تور ساھەسىدىكى رولى ۋە تەرەققىيات ئەھۋالىدىن قارىغاندا، مېنىڭچە، بىلوگ شەكلىدىن مۇستەقىل تور بەت شەكلىگە ئۆزگەرتسە تېخىمۇ ياخشى بۇلۇشى مۇمكىن…
2. يۈكسەل بىلوگى پەقەت توردىلا پائالىيەت تەشكىللىمەي، ھەر خىل ئەھمىيەتلىك بىلوگگىرلار يىغىلىش پائالىيەتلىرىنى قىلىشى، ھەر خىل تېمىلاردا مۇنازىرە-مۇھاكىمە قىلىشنى ئويلىشىپ كۆرۈشى لازىم. مەسىلەن، ھۆكۈمەت ئورۇنلىرى بىلەن بىرلىشىپ، بىلوگ نامىدا ئەھمىيەتلىك ئەيدىز تەشۋىق-تەربىيە پائالىيىتى، يىللىق بىلوگگېرلار سالونى، تەگئات تېمىسىدا « مەدەنىىيەت بوستانى» پىروگگراممىسدا مېھمان بۇلۇشى قاتارلىقلار…
3. باشقا بىلوگگىرلار بىلەن بىرلىكتە يۈكسەلنى مەركەز قىلغان « تور مەدەنىيەت تارقىتىش شېركىتى» دىگەندەك شېركەت قۇرۇش يولىغا ماڭسا، قانداق بولار ؟؟؟
4. تەگئات، ئەيدىز، ئىسىمشۇناسلىق ساھەسىدە بىرەر پارچە كىتاپ نەشىر قىلىش خىيالى ئەمەلىيەتتىن يىراق ئەمەس… بىلوگتىكى نادىر يازمىلارنى رەتلەپ چىقسىمۇ بىر كىتاب بۇلۇپ چىقىدۇ….
5. بىلوگقا « ئىستۇدېنتلار كۆزنىكى» دىگەن سەھىپە قوشۇپ، كەلگۈسى زىيالىلىرىغا توغرا يول كۆرسىتىپ بېرىلسە…
ئاخىرىدا يۈكسەل ئەپەندىنىڭ ۋە يۈكسەل بىلوگىنىڭ تەرەققىياتىنىڭ تېخىمۇ زور بۇلىشىنى ئۈمىد قىلىمەن….
جۈملىدىن خىزمەتدىشىم ۋە ئاغىنەم يۈكسەلنىڭ ھەممە ئىشلىرىنى پۈتۈن كۈچۈم بىلەن قوللاشقا ھەر قاچان تەييارمەن….
يۈكسەل بلوگلىق خاسلىقىنى يوقاتسا بولمايدۇ،توربېكەت ھالىتىدە مېڭىش،مېنىڭچە ئاقىلانە تاللاش ئەمەس.
ئاجايىپ زور مەدەت ۋە بېسىم بولدىغۇ بۇ ئىنكاسلىرى ؟!
يۈكسەل بلوگى ھەقىقەتەن كىشىگە نان تېگىدىغان پايدىلىق ئۇچۇرلارنى ۋە كۆپ ساۋابلىق ئىشلارنى قىپتۇ. يۈكسەلنىڭ ئۇيغۇر تور بەتچىلىكىدىكى رولىغا سەل قارىغىلى بولمايدىكەن. ئاۋۇ كىسەل قېرىندىشىمىزنىڭ بۇ بلوگ سەۋەبلىك ئېرىشكېنى بۇنىڭ بىر مىسالىكەن. بەلكى ئاشۇ بالىنىڭ ئاتا-ئانا، ئۇرۇق-تۇققانلىرى كۆپ دۇئالارنى قىلغاندۇ سىزگە. خۇدا خالىسا 2011 – يىل تېخىمۇ ئەھمىيەتلىك ئىشلارنى قىلىپ، كۆپچىلىككە تېخىمۇ نادىر بلوگ مەزمۇنلىرىنى سۇنالايدىغانلىقىڭىزغا ئىشىنىمەن!
يۈكسەلنىڭ يېڭى يىلدا تېخىمۇ يۈكسىلىشىنى ئۈمۈد قىلىمەن .
ھەممىڭلارنىڭ يىڭى يىلىغا مۇبارەك بولسۇن، يۈكسەلباينىڭ تېخىمۇ يۈكسىلىشىگە تىلەكداشمەن!!!
يېڭى يىلىڭىزغا مۇبارەك بولسۇن ،ئىشلىرىڭىزغا تېخىمۇ كۆپ ئۇتۇقلار تىلەيمەن !
يىڭى يىلىڭىزغا مۇبارەك بولسۇن يۈكسەل ئەپەندىم ،بۇنۇڭدىن كىيىنكى ئىشلىرىڭىزنىڭ تېخىمۇ يۈكسىلىشىگە تىلەتداشمەن!!
ھايات سىناقلىرى بىزگە ھەممە ئىشلارنى قىلغۇزۇدۇ ، لېكىن قىلغان ئىشىمىزدىن ئۆزىمىز ۋە خەلق مەمنۇن بولسا ، ئەلگە نەپ تەگسە مۇشۇنىڭ ئۆزى غەلبە ھەم بەخىت . يۈكسەل مۇشۇ يولنىڭ قىرغاقلىرىنى بويلاپ ئۆزلۈكسىز ئالغا ئىنتىلمەكتە … خۇدا خالىسا يۈكسەل بىلوگىدىن ئۆچمەس ئىز قالغۇسى !!!
تور بەتكە ئايلاندۇرۇش دىگەنىنى ئويلىنىپ بېقىشقا بۇلىدۇ ، لېكىن توردا شېركەت قۇرۇش دىگەننى ئانچە خالاپ كەتمىدىم .
راسىت دىگەندەك يۈكسەل بىلوگىدا بىر مۇنازىرە سالونى كەم بۇلۇپ تۇرىدۇ.
ئشقىلىپ ، مەن يۇكسەل بىلوگىغا چىققىنىمغا پۇشايمان قىلىپ باقمىدىم .
داۋاملىق قوللايمەن .
مەنمۇ سەپكە يىڭى قوشۇلدۇم.سىزنى دوستانە ئۇلىنىشقا قىتىۋالدىم.تەڭ ئىلگىرلەيلى.ئەرئوغۇز ئېنگىلىزتىلى بلوگى سىزنى قوللايدۇ.http://eroghuz.blogbus.com/