بىرلىشىش = يۈكسىلىش ( Unite = Victory )

بىرلەشكەن ئۇزار، بىرلەشمىگەن توزار .
بىرلىك بولماي، تىرىكلىك بولماس.
– ئاتىلار سۆزى

ئاتىلار سۆزىنىڭ چىن ئىخلاسمەنلىرى ، ئاتىلار ئارزۇسىنىڭ چىن ۋارىسلىرى بولۇش سۈپىتىمىز بىلەن، بىر تەرەپتىن تور ئەھلىنى نەسىرىي ، نەزمىي، تارىخي، ئىلمىي ئەسەرلىرىمىز ئارقىلىق ئاقارتىش؛ يەنە بىر تەرەپتىن، ئەلگە ئەيدىز [AIDS] ھەققىدىكى ساۋاتلارنى كەڭ تەشۋىق قىلىش، ئاۋامغا زۆرۈر ساغلاملىق بىلىملىرىنى بېرىش، ئاجىزلارنى تېگىشلىك ساخاۋەت ئۇچۇرلىرى بىلەن تەمىنلەشتەك ئورتاق غايە، ئوخشاش مەنزىل ئۈچۈن بىز ( يۈكسەل بلوگى ۋە بوھران بلوگى ) بۈگۈن ئۆز ئارا بىرلىشىشكە باغلاشتۇق. بىر ياقىدىن باش، بىر يەڭدىن قول چىقارمىساقمۇ، بىر بلوگدا ئەلگە خىزمەت قىلىشقا ( چامىمىزنىڭ يېتىشىچە ) كېلىشتۇق.
قىزىل كىرسىت جەمئىيىتى ( Red Cross ) دە خىزمەت قىلىدىغان، سەھىيە، ئەيدىز [AIDS] ، ئاجىزلارنى يۆلەش قاتارلىق ساھەلەردە خېلى چوڭقۇر خىزمەت تەجرىبىسى ۋە ئەمەلىي تەسىراتقا ئىگە، مۇشۇ ساھەلەر بويىچە پىكىر بايان قىلىشتا كۈچلۈك نوپۇز ۋە سالاھىيەتكە ئىگە قېرىندىشىمىز __ بوھران بلوگىنىڭ قۇرغۇچىسى ياسىن ئابدۇللا ئەپەندى يۈكسەل بلوگىمىزغا بلوگ [Blog] مەسئۇللىرىدىن بىرى بولۇپ رەسمىي قوشۇلدى. شۇنىڭ بىلەن يۈكسەل بلوگى ئىلگىرىكى پەقەت 1 كىشى ( مەن، يۈكسەل ) باشقۇرىدىغان، يازىدىغان ھالەتتىن، ھازىرقى بوھران ۋە يۈكسەل 2 كىشى باشقۇرىدىغان، يازىدىغان بلوگقا ئايلاندى. بىز بىرلەشكەندىن كېيىن بلوگ [Blog] سەھىپىلىرىنى مەلۇم كۆلەمدە تەڭشىدۇق. بۇندىن كېيىن بلوگ [Blog] يازمىلىرى ئۇشبۇ سەھىپىلەر بويىچە ئۆز راۋاجىنى تاپىدۇ. شۇنىڭغا ئىشەنچىمىز كامىلكى، يۈكسەل بلوگى بۇندىن كېيىن تور ئەھلىگە تېخىمۇ ياخشى ، ئەتراپلىق خىزمەت قىلغۇسى، بىز ئېلان قىلغان ئۇچۇرلار تېخىمۇ كۈچلۈك نوپۇز ۋە كاپالەتكە ئىگە بولغۇسى!
بىز كۆپچىلىكنىڭ يۈكسەل بلوگىغا داۋاملىق دىققەت قىلىشىنى، ئۇنىڭدىكى ئۇچۇرلاردىن ياخشى پايدىلىنىشىنى ۋە ئەتراپىدىكى كىشىلەرنىمۇ بۇ ئۇچۇرلاردىن بەھرىمان قىلىشىنى، ئەيدىز ، سەھىيە ، ساخاۋەت ئىشلىرى ھەققىدە ئىزتىراپلىق سۇئال – مەسلىھەتلىرى بولسا، ئىككىلەنمەي بىزدىن سورىشىنى ئۈمىد قىلىمىز!
بىرلىشىش دېمەك، يۈكسىلىشتىن دېرەك. ( Unite = Victory )