ئارىمىزدا بىر تام بار


ساداقەتجان ھاجى


ئارىمىزدا بىر تام بار. تىكەندۇر-تىكەن؟
كۆڭلىمىزدە بىر غەم بار. ئۆلۈمدۇر-ئۆلۈم؟
تېخى بىزنىڭ روھىمىز بىر زۇلمەت ئىكەن،
نۇر ئىچىدە ياشاشنى ئۆگەنگىن گۈلۈم.

ئارىمىزدا بىر تام بار. سېپىلدۇر-سېپىل؟
كۆڭلىمىزدە بىر چوغ بار. كۆيمەكتە يالجىپ.
ئۆزىمىزنىڭ بەختىگە ئۆزىمىز كېپىل؟
سەن مۇھەببەت يولىدا قالمىغىن ئالجىپ.

ئارىمىزدا بىر تام بار. داۋاندۇر-داۋان؟
كۆڭلىمىزدە بىر ئارمان ياسايدۇ تاشقىن.
سۆيگۈ دىگەن ئۆلۈمنى يېڭىدۇ ھامان؟
سۆيسەڭ مېنى سەنمۇ بۇ داۋاندىن ئاشقىن.

٭٭٭٭٭٭٭٭٭٭٭٭٭٭٭٭٭٭٭٭٭٭٭
2003-يىل 3-فىۋرال. قەشقەر
«قەشقەر ئەدەبىياتى» 2003-يىل 3-سان
٭٭٭٭٭٭٭٭٭٭٭٭٭٭٭٭٭٭٭٭٭٭٭