سادىر پالۋاننىڭ يېڭى قوشاقلىرى                                                                                                  

  تىزلامچىنى كىيمەيمەن،
  ئارقام ئوچۇق قالىدۇ .
  گەپلىرىمگە گۈل مومام ،
  كۈلۈپ كۆكسى تالىدۇ.

موماممۇ بەك ئازلايدۇ،
  ئاپاممۇ بەك ئازلايدۇ.
 پاتقاققا پېتىپ كىرسەم،
   مومام ئاۋۋال تازلايدۇ.  

  مومام ئىدى تەقۋادان ،
 ئۈگەتتى جىق قوشاقنى،
  نامە- ھەقنى بىلگۈچە،
  قورۇپ باردى پۇرچاقنى.

 بىر پۇرچاققا بىر قوشاق،
 توقۇپ بەردىم ئاخشىمى.

  ئىزدەپمۇ تاپالمىدىم ،
 گۈل مومامدەك ياخشىنى.
 مومام توقىغان بۆزدە،
 ماڭا پوسماق تىكىپ بەرگەن. 

چوڭ دادام پوپۇش تىكتى،
مەن ئۇنى ئاياپ كىيگەن .
دادام تايغا ئاتماققا،
يەردىن بىرتال تاش ئالدى. 

بىر قوشاق ئېيتىپ بەرسەم ،
كۆزىگە لىق ياش ئالدى.
داۋۇتكام تۆمۈرچىگە،
ياساتتىم بىر نەيزىنى

شېرىپ دىگەن تاغام بار،
ئالدىم نەيزەپەيزىنى.
قىلىچقىمۇ يېتىشتىم ،
ئالدىم تىكەن بېشىنى .

   چېرىك قىلىپ چانىدىم ،
   ساينىڭ قورام تېشىنى .
ھارسام دۆڭدە ئولتاردىم ،
  نەچچە قىلىچ سۇندۇردىم .

  ئۇستاز بول دەپ تاغامنى،
   ئۆيدە نەچچە قوندۇردىم .

(2) ئەللەر تېرىيدۇ ئاشلىق،
 ئاشلىققا مانجۇ باشلىق.
 ئاشلىق تەرگەن ئەللەرنىڭ ،
   قىشى-يازى كۆزى ياشلىق.  

بىنەم تەرسەك ھوسۇلغا -
مانجۇلار ئىگە، دەيدۇ.
ھوسۇلنى  بۇلاپ تۇرسا ،
دىخانلار نىمە يەيدۇ.

مانجۇلارغا ھاي-ھايچى،
 ھەر مەلىدە بىر دوغا.
 پۇخرانى قاخشاتقۇچە،
 بەگلەر يەپ ئۆلسۇن ئوغا.

 بىر پۇت تۇز-بىر دادەن ئاش ،
 مانجۇلاردا بارمۇ باش .

  مانجۇلارنىڭ دەستىدە،
  دىخان قالدى يالىڭاچ.
  رازىلىق ئالدىم ئەلدىن ،
  پوتا باغلىدىم بەلدىن.

   ئەل -پەريات چېكىپ تۇرسا،
  ئاش -نان ئۆتەمدۇ گالدىن.
  تاغنىڭ بېشى ئالاڭغۇ،
   قارىغاي ئىچى قاراڭغۇ.

  ئەلنىڭ دەردىنى ئويلاپ،
   سادىر بولدى ياداڭغۇ.
كىمگە ئېيتاي دەرتلەرنى،
  ئاڭلار بارمۇ گەپلەرنى؟

  سادىر ناخشىغا قاتتى،
  يىغىپ قويغان «خەپ»لەرنى.
قاغا-قۇزغۇن گۆش يەيدۇ،
 بۆرە ئىتمۇ گۆش يەيدۇ.

   مانجۇلار چاغان قىلسا،
  چەنتۇ،سولان مۇش يەيدۇ.
نوغايتونىڭ يولىدا،
 مانجۇلار يېتىۋاپتۇ.

تۆت چەنتۇنى بىر مانجۇ ،
  ساپانغا قېتىۋاپتۇ.
 ئاتلىنىپ بەل ياقىلاپ،
  دوغىدەك بولۇپ كەلدىم.  

  بىر كالتەك ئۇرۇپ باشقا،
  مانجۇغا ئەجەل بەردىم.

(3)چوڭ ئاكامنىڭبالىلىرى،
   مېنى كىچىك دادام دەيدۇ.
  ۋاخ يېتىپ دىدارلاشماق ،
   بىز ئۈچۈن تائام دەيدۇ.

  ھەر ئاخشىمى ئۆت دەيدۇ،
  مەلىمىزدىن ئاي بولۇپ.
يۈگرەپ چىقىپ كۆرەيلى،
ئويناقشىغان تاي بولۇپ.

 تايچاق دىگەن تايچاقتە،
 ئات بولۇشنى بىلمەيدۇ.
ئۈستىگە ئىگەر ئارتىپ،
يات بولۇشنى بىلمەيدۇ.

ئاق لەيلىنىڭ بېشىدا،
سېرىق قۇشقاچ سايرايدۇ.
شەرۋانە جۈمە كۈنى،
سۇمبۇلىنى تارايدۇ.

تونۇر بېشىغا كېلىپ ،
توقاچ يۈزلۈك ئاي كۆردۈم.
شەرۋانە بىلەن بىللە،
بەك ئوبدان ئۆمۈ ر سۈردۈم .

(4) قارىغاي ئارىلاپ ئۆتسەم،
   ھۈركىمىدى كىيىكلەر.
   سادىرنى تۇتۇش ئۈچۈن،
  ئىزدەپ كەلدى چېرىكلەر.

   كەلسەڭ كېلىۋەر چېرىك،
   قالمايسەن بىرىڭ تىرىك.
  سادىرغا تاغ -تاش ياراق،
  مېنى ئىزدىمەي سېلىك.

  سادىرنىڭ مىلتىقى يوق،
 تاش -سالمىنى قىلدى ئوق.
  بىر چېرىكنى يۇمۇلاتتىم ،
  يۈز چېرىكتىن بىرىمۇ يوق.

   سادىر ھىلىگەر دەيدۇ،
   ھىلەم راس يامان مېنىڭ.
   يارانلارغا ھەيدەتكەن ،
   سەركەممۇ پالۋان مېنىڭ.

   ئۈزمەي ئاتتۇق بەش كىشى،
   ئۈركۈپ قاچتى مىڭ كىشى.
   جان تاتلىق چىرىكلەرگە،
   سادىردا نىمە ئىشى.

كىمكى تۇتسا سادىرنى،
جاڭجۈن بېرەر مىڭ تەڭگە.
چامىڭ يەتسە تۇتمامسەن،
 قوشۇپ بېرەي مىڭ تەڭگە.

ناخشىنى كۈچەپ ئېتسام،
سادىرنىڭ ئۈنى ،دەيدۇ.
يايىلار كۆرەڭلىشىپ،
تۇتۇڭلار بۇنى،دەيدۇ.

تاغلارنىڭ ياغاچلىرى،
تاغنى تالىشىپ ئۆسكەن.
سادىرنىڭ ئېتى ئۇلۇق،
يۇرتنى تالىشىپ ئۆسكەن.

(5) قۇمۇل يامۇلى دەيدۇ،
 كەينىدە سېپىلى يوق.
تالاغا چىقاي دىسم،
 سادىرنىڭ كېپىلى يوق.

ئىلقا ئۇيرىسى نەدە،
ئۇيلار پادىسى نەدە؟
سادىرنى يالغۇز دىمەڭ ،
يۈرەك پارىسى شەدە.

بالام باققان كاككۇكنىڭ،
 بوينىدا تۇمارى بار.
كاككۇكلار مۇرات تاپسۇن،
 سادىرنىڭ خۇمارى بار.