نورۇز قوشىقى

ئەسسالامۇ ئەلەيكۇم ،
سىزگە بولسۇن قۇتلۇق كۇن .
پەسلى جاھان ھۇت كەلدى ،
جۇتلار ئۆتۈپ قۇت كەلدى.

نورۇز كەلدى نۇر بولدى ،
ھەممە جانلىق ھۆر بولدى .
ھەي خالايىق شادلىنىڭ ،
كەسپ - كارغا ئاتلىنىڭ .
ھەمەل دە بىلىپ ھەپتىنى ،
تۇتۇپ نورۇز پەيتىنى .
ئەمىلىڭ بولسۇن ساۋاب ،
ئەجدادلارنى قىل تاۋاپ.
دېھقان دەرھال كەتمەن ئال،
يەرگە ساپان ، سۆرەم سال.
چەش دۆۋىلەنسۇن خامانغا ،
بۇغداي تولسۇن باداڭغا .

باغۋەن بولساڭ باغ - باغ قىل ،
باغدىن  رىزقىڭنى  تاغ قىل .
مالچى كۆپلەپ تۆل ئالغىن ،
سۇت - قايماقنى مول ئالغىن .
باپكار بولساڭ يىپ ئولغا ،
بۆز- چەكمەننى خوپ تولغا .
تومۇرچى تاۋلا كەتمەننى ،
تاپ ھۈنەرگە زوقمەننى .
ئاشپەز بولساڭ تەملىك قول ،
غەللىدە بولۇر كۆپ پۇل .
زەرگە كۆرسەت ھۈنەرنى ،
قېتىش قىلما مىس - زەرنى .
تىجارەتچى سەپەر قىل ،
ھارام مالدىن ھەزەر قىل .

ھاكىم دادىخاھ دادخاھ،
ئەلگە دائىم خەيرخاھ.
ئۆم بولايلى خالايىق ،
قىلمايلى ئىش نالايىق .
يۇرتىمىز بولغاي ئاۋات،
مەئىشەت توق، كۆڭۈل شات.

دەرسلىك كىتابتىن ئېلىنغان.

ئىزاھات : ھوت - شەمسىيە يىل ھېسابىغا خاس ئاتالغۇ . مىلادىيە ھېسابىدا 2- ئاينىڭ 22- كۈنىدىن 3- ئاينىڭ 21- كۈنىگىچە قەدەر بولغان ۋاقىتنى كۆرسىتىدۇ.

ھەمەل - شەمسىيە يىل ھېسابىغا خاس ئاتالغۇ . مىلادىيە ھېسابىدا 3- ئاينىڭ 22- كۈنىدىن 4- ئاينىڭ 12- كۈنىگىچە قەدەر بولغان ۋاقىتنى كۆرسىتىدۇ.

دادخاھ - توغرا تەلەپپۇز قىلىنىشى دادخاھ . (1) ئەرز - داد ئىشىتكۈچى (2) ئەرز - داد ئېيتقۇچى (3) ئەرز - شىكايەت ئېيتىلىدىغان ئورۇن .