ئۈرۈمچى شەھىرى بۇلاقتاغ رايونى قاتناش ساقچى چوڭ ئەترىتى 17-مارت ۋەقە ئۇقتۇرۇش يىغىنى ئېچىپ، قاتناش ساقچى تارماقلىرىنىڭ يېقىندا شىخۇڭ شەرقىي يولىدا بىر ئاپتوموبىل پىيادىلەر يولىدىن ئۆتكەندە سۈرئەتنى ئاستىلاتماي تۆت ئادەمنى سوقۇۋەتكەنلىكىنى، ۋەقەگە چېتىشلىق بۇ شوپۇرنىڭ پۈتۈن مەسئۇلىيەتنى ئۈستىگە ئالىدىغانلىقىنى ئۇقتۇرغان.
17-مارت مۇخبىرنىڭ قاتناش ساقچىلىرى سۈرەتكە ئېلىۋالغان نازارەت قىلىش ۋىدېئو چاستوتىدىن كۆرۈشىچە، 10-مارت سائەت 12:30 ئەتراپىدا، ئۈرۈمچى شەھىرى شىخۇڭ شەرقىي يولى بىلەن خېشۈن 5-كوچىسى يول ئېغىزىدا، بىر نەچچە پىيادىلەر جەنۇبتىن شىمالغا ئۆتىدىغان پىيادىلەر يولىدا ئۆتۈپ كېتىۋاتقاندا، شەرقتىن غەربكە قاراپ ماڭغان قارا رەڭلىك بىر پىكاپ توختاپ تۇرۇشىغا ئۇنىڭ كەينىدىن كەلگەن قىزىل رەڭلىك بىر پىكاپ ئالدىدىكى پىكاپقا سوقۇلۇپ كېتىشتىن ساقلىنىش ئۈچۈن رولنى دەرھال سولغا بۇراپ پىيادىلەر يولىغا كىرىپ تۆت ئادەمنى سوقۇۋەتكەن.
مۇخبىرنىڭ ئىگىلىشىچە، ۋەقە يۈز بەرگەن يول ئېغىزىدا پىيادىلەر يول چىقىرىقى يوق ئىكەن. بەختسىزلىككە ئۇچرىغان تۆت ئادەمنىڭ يارىسى ئانچە ئېغىر ئەمەس بولۇپ، نۆۋەتتە ئىككىيلەن دوختۇرخانىدا داۋالىنىۋېتىپتۇ. ۋەقەگە چېتىشلىق شوپۇر شۆ XX نىڭ ئىقرار قىلىشىچە، ۋەقە يۈز بەرگەندە ئۇ ئالدىدىكى ئاپتوموبىلغا بەك يېقىن ئەگىشىۋالغان، ئالدىدىكى ئاپتوموبىل تۇيۇقسىز تورمۇز قىلىپ توختىتىغان، شۇنىڭ بىلەن ئۇ ئالدىدىكى ئاپتوموبىلنى سوقۇۋېتىشتىن ساقلىنىش ئۈچۈن دەرھال رولنى بۇرىغان، ئويلىمىغان يەردىن پىيادىلەرنى سوقۇپ قويغان.
بۇلاقتاغ رايونلۇق قاتناش ساقچى چوڭ ئەترىتىنىڭ باشلىقى سۈن شىڭجۈننىڭ تونۇشتۇرۇشىچە، بۇ ۋەقەنىڭ كېلىپ چىقىشىدىكى ئاساسلىق سەۋەب، ۋەقەگە چېتىشلىق ئاپتوموبىل بەلگىلىمە بويىچە پىيادىلەر يولىغا يېقىنلىغاندا سۈرئەتنى ئاستىلىتىپ جىددىي تەدبىر قوللانمىغان، شۇڭا شوپۇر شۆ XX بارلىق مەسئۇلىيەتنى ئۈستىگە ئالىدىكەن ھەمدە يارىدارلارنىڭ ھەممىسىنىڭ داۋالىنىش ھەققىنى تۆلەيدىكەن.
ئىگىلىنىشىچە، ۋەقە يۈز بەرگەن شىخۇڭ شەرقىي يولىدا قوش يۆنىلىشتە سەككىز ئاپتوموبىل قاتنايدىغان، سايباغ رايونى، بۇلاقتاغ رايونى، ساي يولى يۇقىرى سۈرئەتلىك تاشيولىغا تۇتىشىدىغان مۇھىم يول ئىكەن، يول ئەھۋالى ياخشى بولۇپ، ئاپتوموبىل كۆپ، ئاپتوموبىللارنىڭ سۈرئىتىمۇ بىر قەدەر تېز ئىكەن . قاتناش ساقچى تارماق ئەترىتى ئاپتوموبىللارنىڭ بەلگىلىمە بويىچە تەرتىپلىك يول يۈرۈشى ئۈچۈن 2013-يىلى بۇ يول بۆلىكىدىكى پىيادىلەر يولىغا پىيادىلەر يولى بەلگىسى ۋە يول چىرىغى ئورناتقان. گەرچە شىخۇڭ شەرقىي يولىنىڭ پۈتۈن لىنىيەسىدە قاتناش ئەسلىھەلىرى تولۇق بولسىمۇ، لېكىن يېقىنقى يىللاردىن بۇيان قاتناش ۋەقەسى كۆپ يۈز بېرىدىغان بولۇپ قالغان، بۇلتۇر موشۇ يول بۆلىكىدە بىر قېتىملىق قاتناش ۋەقەسى يۈز بېرىپ، ئادەم قازا قىلىش ئەھۋالى كۆرۈلگەن.
ئۈرۈمچى شەھەرلىك ج خ ئىدارىسى قاتناش ساقچى تارماق ئەترىتى ۋەقە بۆلۈمىنىڭ ئىستاتىستىكىسىغا قارىغاندا، 2014-يىلى ئۈرۈمچىدە يۈز بەرگەن قاتناش ۋەقەلىرى ئىچىدە، بەلگىلىمە بويىچە پىيادىلەرگە يول بەرمىگەنلىكتىن كېلىپ چىققان قاتناش ۋەقەسى 190 قېتىم بولۇپ، 50 ئادەم قازا قىلغان، 192 ئادەم يارىلانغان.