شىنخۇا تورى 19- مارت خەۋىرى: باغداش تورىدىن: ئابلىمىت تەرجىمىسى

19- مارت سەئۇدى ئەرەبىستاندا تاۋاپ قىلغۇچىلار چىققان بىر ئاپتوبۇس ئۆرۈلۈپ چۈشۈپ، 19 ئادەم قازا قىلغان، ئۇنىڭدىن باشقا يەنە 22 ئادەم ئوخشاش بولمىغان دەرىجىدە يارىلانغان.

سەئۇدى ئەرەبسىتان مەككە شەھەرلىك ساقچى ئىدارىسىنىڭ باياناتچىسى مۇنداق دېگەن: شۇ جاي ۋاقتى 19- مارت سەھەر سائەت 4 تىن 51 مىنۇت ئۆتكەندە، قاتناش باشقۇرۇش تارماقلىرى ۋەقە يۈز بەرگەنلىكى توغرىسىدىكى دېلو مەلۇماتىنى تاپشۇرۇۋالدى، ئەينى ۋاقىتتا بۇ ئاپتوبۇس ئىسلام دىنىنىڭ بىرىنچى مۇقەددەس جاي مەككىدىن ئىككىنچى مۇقەددەس جاي مەدىنىگە قاراپ ماڭغان ئىكەن، ئاپتوبۇستىكى يولۇچىلارنىڭ ھەممىسى ئەرەب دۆلەتلىرىدىن كەلگەن تاۋاپچىلار.

بۇ باياناتچى يەنە مۇنۇلارنى بىلدۈردى: دەسلەپكى قەدەمدىكى تەكشۈرۈش نەتىجىسىدە كۆرسىتىلىشىچە، بۇ قېتىمقى ۋەقەنى شوپۇرنىڭ ماشىنا ھەيدەۋېتىپ ئۇخلاپ قېلىشى كەلتۈرۈپ چىقارغان. نۆۋەتتە ۋەقەنىڭ كونكرېت سەۋەبى يەنىمۇ ئىچكىرىلەپ تەكشۈرۈلمەكتە.

ۋەقە يۈز بەرگەندىن كېيىن، سەئۇدى ئەرەبسىتان قۇتقۇزۇش تارماقلىرى ۋەقە يۈز بەرگەن نەق مەيدانغا 18 قۇتقۇزۇش ئاپتوموبىلى، 1 دانە جىددىي قۇتقۇزۇش تىك ئۇچار ئايروپىلانى ۋە زور بىر تۈركۈم دوختۇر سېستىرالارنى ئەۋەتكەن.