ئاپتونوم رايوننىڭ پارتىيە، ھۆكۈمەت ۋە ئارمىيە چاغاننى كۈتۈۋېلىش سۆھبەت يىغىنى 16 – فېۋرال چۈشتىن كېيىن شىنجاڭ ‹‹مەرھابا›› مېھمانسارىيىدا ئۆتكۈزۈلدى، قىسىمدىكىلەر بىلەن يەرلىكتىكىلەر بىر يەرگە جەم بولۇپ، چاي ئىچكەچ، ئاددىي ئۇسۇل ئارقىلىق، قىسىم بىلەن ھۆكۈمەت، ھەربىي بىلەن خەلقنىڭ چوڭقۇر مۇھەببىتىنى نامايان قىلىپ، ئاپتونوم رايونىمىزنىڭ ئىسلاھات، تەرەققىيات ۋە مۇقىملىق ئۇلۇغۋار پىلانى ھەققىدە ئورتاق پىكىرلەشتى. ج ك پ مەركىزىي كومىتېتى سىياسىي بىيۇروسىنىڭ ئەزاسى، ئاپتونوم رايونلۇق پارتكومنىڭ شۇجىسى، شىنجاڭ ھەربىي رايونى پارتكومىنىڭ بىرىنچى شۇجىسى جاڭ چۈنشيەن ئاپتونوم رايونلۇق پارتكوم، خەلق قۇرۇلتىيى، خەلق ھۆكۈمىتى، سىياسىي كېڭەش، شىنجاڭ ئىشلەپچىقىرىش – قۇرۇلۇش بىڭتۈەنى ۋە ئاپتونوم رايونىمىزدىكى ھەر مىللەت خەلققە ۋاكالىتەن، ئاپتونوم رايونىمىزدا تۇرۇشلۇق خەلق ئازادلىق ئارمىيەسى ۋە قوراللىق ساقچى قىسىمىدىكى ئوفىتسېر – ئەسكەرلەر، قىسىمدىكى دەم ئېلىشقا، پېنسىيەگە چىققان كادىرلار، ئىنقىلابىي قۇربانلارنىڭ ئائىلە – تاۋابىئاتلىرى، مېيىپ ھەربىيلەر، كەسىپ ئالماشتۇرغان، ھەربىيدىن قايتقان، ھەربىيدىن چېكىنگەنلەر، خەلق ئەسكەرلىرى، زاپاس ھەربىيلەرگە چاغانلىق سالام بەردى ۋە ياخشى تىلەك تىلىدى!

جاڭ چۈنشيەن مۇنداق دېدى: ئەمدىلا ئاخىرلاشقان 2014 – يىلى پەۋقۇلئاددە، مۇرەككەپ، قالتىس بىر يىل، شۇنداقلا قىسىم قۇرۇلۇشى تېز تەرەققىي قىلىپ، فۇنكسىيەنى ئادا قىلىپ، كۆرۈنەرلىك تۆھپە قوشقان بىر يىل بولدى. قىسىم بىلەن يەرلىك قول تۇتۇشۇپ، ئىتتىپاقلىشىپ، ئۆزئارا ياردەملىشىپ، ئاپتونوم رايونىمىزدا ھەربىيلەر خەلقنى سۆيىدىغان، خەلق ئارمىيەنى ھىمايە قىلىدىغان، ھەر مىللەت ھەربىي ۋە خەلق قەلبداش بولۇشتەك تەسىرلىك ۋەزىيەت بارلىققا كەلدى. ئەمەلىيەت شۇنى ئىسپاتلىدىكى، ئاپتونوم رايونىمىزدا تۇرۇشلۇق قىسىم ۋە قوراللىق ساقچى قىسىم ئوفىتسېر – ئەسكەرلىرى ھالقىلىق پەيتتە ھەمدەم بولالايدىغان، ئالدىنقى سەپكە ئاتلىنالايدىغان، جەڭدە غەلىبە قىلالايدىغان، پارتىيەگە سادىق، تۈرلۈك سىناقلارغا بەرداشلىق بېرەلەيدىغان، جەڭگىۋارلىققا ئىگە كۈچلۈك قوشۇن، شۇنداقلا ھەر مىللەت خەلق تولۇق ئىشىنىدىغان، مەدەنىي، غەلىبە قىلىدىغان قوشۇن. ئاپتونوم رايونىمىزدىكى ھەر مىللەت ئامما پەرزەنت ئەسكەرلەرگە چىن قەلبىدىن رەھمەت ئېيتىدۇ!
جاڭ چۈنشيەن مۇنداق دېدى: 2015 – يىلى ئىسلاھات ئومۇميۈزلۈك چوڭقۇرلاشتۇرۇلىدىغان، دۆلەتنى قانۇن بويىچە ئىدارە قىلىش ئومۇميۈزلۈك ئىلگىرى سۈرۈلىدىغان، 12 – بەش يىللىق يىرىك پىلان ئومۇميۈزلۈك ئورۇندىلىنىدىغان ئاخىرقى يىل، شۇنداقلا ئاپتونوم رايونىمىز قۇرۇلغانلىقىنىڭ 60 يىللىقى بولۇپ، تۈرلۈك خىزمەتلەرنى ياخشى ئىشلەش زور ئەھمىيەتكە ئىگە. بىز يولداش شى جىنپىڭ باش شۇجىلىقىدىكى پارتىيە مەركىزىي كومىتېتىنىڭ دۆلەتنى ئىدارە قىلىپ، مەمۇرىيەت يۈرگۈزۈشتىكى ‹‹تۆت ئومۇميۈزلۈك›› ئىستراتېگىيەلىك ئورۇنلاشتۇرمىسىنى چوڭقۇر ئۆزلەشتۈرۈپ، ئىدىيە ۋە ھەرىكىتىمىزنى پارتىيە مەركىزىي كومىتېتى ۋە ئاپتونوم رايونلۇق پارتكومنىڭ تەدبىر، ئورۇنلاشتۇرمىلىرى ئاساسىدا ھەقىقىي بىرلىككە كەلتۈرۈپ، ئىجتىمائىي مۇقىملىق ۋە ئەبەدىي ئەمىنلىكتىن ئىبارەت كۆزلەش نۇقتىسى ۋە كۈچەش نۇقتىسىنى زىچ چۆرىدەپ، ۋەتەننىڭ بىرلىكى، مىللەتلەر ئىتتىپاقلىقى، ئىجتىمائىي مۇقىملىقنى ساقلاشتەك مۇقەددەس بۇرچىمىزنى ئاڭلىق زىممىمىزگە ئېلىپ، ‹‹ئۈچتە قەتئىي بولۇش›› نىشانىغا يېتىشكە كاپالەتلىك قىلىشىمىز كېرەك. ئاپتونوم رايونىمىزدا تۇرۇشلۇق قىسىملار ۋە قوراللىق ساقچى قىسىم ئوفىتسېر – ئەسكەرلىرىنىڭ پارتىيە، ئارمىيەنىڭ شەرەپلىك ئەنئەنىسىنى ئىزچىل جارى قىلدۇرۇپ، يەرلىكنىڭ خىزمىتىگە ئىلگىرىكىدەكلا كۆڭۈل بۆلۈپ ۋە ياردەم قىلىپ، ئەسەبىيلىكنى تۈگىتىش، ئەلرايىنى بىلىش، ئەلگە نەپ يەتكۈزۈش، ئەلنى مايىل قىلىش ۋە ئاساسىي قاتلام ئۇل قۇرۇلۇشى قاتارلىق خىزمەتلەرگە ئاكتىپ قاتنىشىپ، ئىقتىسادىي تەرەققىيات، خەلق تۇرمۇشىنى ياخشىلاش ۋە مىللەتلەر ئىتتىپاقلىقىنى ئىلگىرى سۈرۈش، بولۇپمۇ جىددىي، قىيىن، خەتەرلىك، ئېغىر ۋەزىپىلەرنى ئورۇنداشقا ئەقىل كۆرسىتىپ ۋە كۈچ چىقىرىپ، كۆپرەك تۆھپە قوشۇشىنى ئۈمىد قىلىمەن.

جاڭ چۈنشيەن مۇنۇلارنى تەكىتلىدى: كۆپ خىل شەكىلدىكى ئارمىيە بىلەن خەلق ئورتاق بەرپا قىلىش پائالىيىتىنى پائال قانات يايدۇرۇپ، ھەربىي بىلەن خەلقنىڭ ھەمكارلىقى، ئارمىيە بىلەن يەرلىكنىڭ ماسلىشىشىنى يەنىمۇ كۈچەيتىپ، ھەربىي بىلەن خەلقنىڭ بىرلەشمە تەرەققىياتىنى تېخىمۇ كەڭ ساھە ۋە تېخىمۇ چوڭقۇر قاتلامغا كېڭەيتىپ، يېڭى دەۋرنىڭ ئارمىيەنى ھىمايە قىلىش، ئائىلە تاۋابىئاتلىرىغا ئېتىبار بېرىش، ھۆكۈمەتنى ھىمايە قىلىش، خەلقنى سۆيۈشتەك تەسىرلىك سەھىپىسىنى ئېچىشىمىز كېرەك. ئاپتونوم رايونىمىزدىكى ھەر دەرىجىلىك پارتكوم، خەلق ھۆكۈمەتلىرى ئاپتونوم رايونىمىزدا تۇرۇشلۇق ھەربىي قىسىملارنى قوللاش سالمىقىنى يەنىمۇ ئاشۇرۇپ، ئەمەلىي مەسىلىلەرنى مۇۋاپىق ھەل قىلىپ، ئەمەلىي ۋە ياخشى ئىشلارنى كۆپرەك قىلىپ، قىسىملارنىڭ ئەندىشىسىنى تۈگىتىشى كېرەك.

شىنجاڭ ھەربىي رايونىنىڭ سىياسىي كومىسسارى لى ۋېي سۆھبەت يىغىنىدا مۇنداق دېدى: بىر يىلدىن بۇيان، شىنجاڭنىڭ تۈرلۈك قۇرۇلۇشلىرىدا غايەت زور نەتىجىلەر قولغا كەلتۈرۈلۈپ، قىسىمدىكى ئوفىتسېر – ئەسكەرلەر چوڭقۇر تەسىراتقا ئىگە بولدى، شىنجاڭدا تۇرۇشلۇق خەلقنىڭ پەرزەنت ئەسكەرلىرى بولۇش سۈپىتىمىز بىلەن چوڭقۇر پەخىرلىنىمىز، غەيرىتىمىز ھەسسىلەپ ئاشتى. يېڭى بىر يىلدا، كۈچلۈك سىياسىي مەسئۇلىيەتنى زىممىمىزگە ئېلىپ، شىنجاڭنىڭ مۇقىملىقىنى ساقلايدىغان ‹‹بالانىست تاش›› بولۇپ، ئەمەلىي ھەرىكىتىمىز بىلەن ئاپتونوم رايونلۇق پارتكوم، خەلق ھۆكۈمىتى، ئىشلەپچىقىرىش – قۇرۇلۇش بىڭتۈەنى ۋە ھەر مىللەت ئاممىنىڭ غەمخورلۇقى ۋە قوللىشىغا مىننەتدارلىق بىلدۈرىمىز.

ئاپتونوم رايونلۇق پارتكومنىڭ مۇئاۋىن شۇجىسى، ئاپتونوم رايوننىڭ رەئىسى شۆھرەت زاكىر سۆھبەت يىغىنىغا رىياسەتچىلىك قىلدى.

ئاپتونوم رايوننىڭ پارتىيە، ھۆكۈمەت ۋە ئارمىيە رەھبەرلىرىدىن نەيىم ياسىن، نۇرلان ئابىلمەجىن، چې جۈن، خەن يۇڭ، پېڭ يۇڭ، شەۋكەت ئىمىن، جۇ خەيلۈن، بەي جىجيې، شيۇڭ شۈەنگو، لى شۆجۈن، ليۇ شىنچى، جۇ چاڭجيې، جارۇللا ھېسامىدىن؛ شىنجاڭ ھەربىي رايونىنىڭ مۇئاۋىن سىياسىي كومىسسارى سېلىمجان سەيدۇللا، قوراللىق ساقچى قىسىم شىنجاڭ باش ئەترىتىنىڭ قوماندانى گو لوتەي قاتارلىق ئاپتونوم رايونىمىزدا تۇرۇشلۇق قىسىملارنىڭ رەھبەرلىرى سۆھبەت يىغىنىغا قاتناشتى.