شىنخۇا تورىنىڭ 11 – سېنتەبىر باڭكوكتىن بەرگەن تېلېگراممىسى، تايلاند تاراتقۇلىرىنىڭ خەۋەر قىلىشىچە، تايلاندنىڭ جەنۇبىدىكى پاتتانى ۋىلايىتىدە 11 – چىسلا قوراللىق ئوق چىقىرىش ۋە پارتلىتىپ ھۇجۇم قىلىش ۋەقەسى يۈز بېرىپ، بەش ئادەم ئۆلۈپ، بەش ئادەم يارىلانغان. ئۆلگەن، يارىلانغانلارنىڭ ئىچىدە شۇ يەرلىك ھۆكۈمەتنىڭ خىزمەتچىلىرى ۋە ئاددىي پۇقرالىرى بار ئىكەن.
«باڭكوك پوچتا گېزىتى» نىڭ شۇ يەرلىك ساقچى تەرەپ تەكشۈرۈش خادىمى سۇلىننىڭ سۆزىنى نەقىل كەلتۈرۈپ خەۋەر قىلىشىچە، ھۇجۇم قىلىش ۋەقەسى پاتتانى خۇسلوپ رايونىدىكى بىر يەرلىك ھۆكۈمەت بىناسىدا يۈز بەرگەن. شۇ كۈنى چۈشتە، سالاھىيىتى ئېنىق بولمىغان بىر نەچچە قوراللىق ئۇنسۇر ماشىنا ۋە موتسىكلىت ھەيدەپ بۇ بىنانىڭ ئالدىغا كەلگەن، ھەمدە بىنا ئىچىنى ئوققا تۇتقان، بىنادىكى خىزمەتچىلەر پاتپاراق بولۇشۇپ قېچىشقان، ھەمدە بەزىلىرىگە ئوق تېگىپ يارىلانغان.
سۇلىن مۇنداق دېدى، قوراللىق ئۇنسۇرلار دېلو يۈز بەرگەن جايدىن ئايرىلىشتىن بۇرۇن شۇ ئىشخانا بىناسى ئەتراپىغا ئىككى پارتلىتىش قۇرۇلمىسى ئورۇنلاشتۇرۇپ، خىزمەتچىلەر، داۋالاش خادىملىرى ۋە ئامما شۇ ئىشخانا بىناسى ئەتراپىغا توپلاشقان ۋاقىتتا بومبىنى پارتلاتقان. ساقچى تەرەپنىڭ كېيىن بايقىشىچە، قوراللىق ئوق چىقىرىش ۋە پارتلاشتا بىر ئاددىي پۇقرانى ئۆز ئىچىگە ئالغان ھالدا بەش ئادەم ئۆلۈپ، يەنە بەش كىشى يارىلانغان. ئىشخانا بىناسى ئېغىر دەرىجىدە ۋەيران بولۇپ كەتكەن.
شۇ كۈنى، پاتتانى يالىندىكى يەرلىك ھۆكۈمەت بىناسىمۇ ئوخشاشلا ھۇجۇمغا ئۇچرىغان، بىراق بۇ يەردە ئۆلۈم يېتىم بولمىغان.
2004 – يىلدىن بۇيان، تايلاندنىڭ جەنۇبىدا بۆلگۈنچى تەشكىلاتلارنىڭ پائالىيىتى جانلىنىپ كەتتى. ئىستاتىستىكىلارغا قارىغاندا، پارتلىتىش، ئوق چىقىرىش، تۇتقۇن قىلىش ۋەقەلىرىدە ھازىرغىچە 5900 دىن ئارتۇق ئادەم ئۆلۈپ، ئونمىڭدىن ئارتۇق ئادەم يارىلانغان.
تايلاند يىڭلۇك ھۆكۈمىتى 2013 – يىلنىڭ باشلىرىىدن باشلاپ جەنۇبتىكى بۆلگۈچى تەشكىلاتلار بىلەن تىنچلىق سۆھبىتى ئۆتكۈزۈپ، زوراۋانلىق ھۇجۇم قىلىش ۋەقەلىرىنى توسۇشنى ئۈمىد قىلغان، بىراق بۇنىڭ ئانچە نەتىجىسى بولمىغان. تېنچلىق سۆھبىتىمۇ بۇلتۇر يىل ئاخىرىدا ۋاقتىنچە توختاپ قالغان. يېقىندا، يېڭىدىن ۋەزىپىگە تەيىنلەنگەن زۇڭلى بايۇ تايلاندنىڭ جەنۇبىدىكى بۆلگۈنچى كۈچلەر بىلەن قايتىدىن تىنچلىق سۆھبىتى ئۆتكۈزىدىغانلىقىنى بىلدۈرگەن.
