شاھ ئۇيغۇر بلوگى ۋوردپرەسكە كۆچتى

ئەسسالامۇ ئەلەيكۇم قەدىرلىك شاھ ئۇيغۇر بلوگىنىڭ قىزغىن كۆرۈرمەنلىرى ھەم بارلىق تورداشلار

بلوگوم (شاھ ئۇيغۇر بلوگى) بۈگۈندىن باشلاپ بلوگباس سۇپىسى بىلەن ھەقىقى خوشلىشىپ ۋوردپرەس مۇلازىمىتىگە تۇلۇق كۆچتى، گەرچە شاھ ئۇيغۇر بلوگى قۇرۇلغاندىن بۇيان بلوگباس مۇلازىمىتىنى ئىشلىتىپ كېلىۋاتقان بولسىمۇ، ھەمدە مۇشۇ بلوگباس مۇلازىمىتىدە ئىككى يىل مابەينىدە تەرەققى قىلىپ مۇئەييەن نەتىجىلەرگە ئېرىشكەن بولسىمۇ لېكىن رايونىمىزدا تور ئەسلىگە كەلگەندىن كېيىن بلوگباس سۇپىسنىڭ ئۈزلۈكسىز بلوگگېرلارغا ئېلىپ بارغان ھەرخىل چەكلەشلىرى مېنى ئۆز ئىچىگە ئالغان نۇرغۇرن بلوگگېرلاردا بلوگباستىن زېرىكىش كەيپىياتى شەكىللەندۈرۈپ قويغانىدى، ئۆزۈمنىڭمۇ بۇ يىل كىرگەندىن باشلاپلا مۇستەقىل نام ئېلىپ بلوگ قۇرۇش ئۇيۇممۇ بار ئىدى. ئەمما شۇ خىزمەت ھەم تۇرمۇش ھەلەكچىلىكىدە، كومپىيۇتېر ئالدىغان كەلگەندە بولسا تەرجىمە خەتلىك فىلىم ئىشلىرى بىلەنلا بولۇپ كېتىپ بۇ ئىشلارغا پەقەتلا ۋاقىت ئاجرىتالمىغانىدىم. لېكىن بۇ قېتىملىق، يەنى 2010-يىلى 11-ئاينىڭ ئاخىرىدا يۈز بەرگەن بلوگباستا تۇيۇقسىز ھۈججەتلەرنىڭ نورمال كۆرۈنمەسلىك ئەھۋالى مېنىڭ ۋوردپرەسنى ئۆگىنىشىمگە يېتەرلىك ۋاقىت ھەم باھانە ئاجرىتىپ بەرگەن بولدى. خۇددى كيۇكيۇ بىلەن 360 نىڭ جىدىلى نۇرغۇنلىغان تورداشلارنى MSN دىن ئىبارەت ئۇيغۇرچە يېزىق تۇنۇيالايدىغان ياخشى بىر پاراڭلىشىشى دىتالى بىلەن تۇنۇشۇش پۇرسىتىگە ئىگە قىلغىنىغا ئوخشاش ( گەرچە ئىشلىتىۋاتقانلار يەنىلا ئاز ساندا بولسىمۇ )، بۇ قېتىملىق بلوگباسنىڭ كاشىلىسى ئۇيغۇر بلوگ ھەۋەسكارلىرىغا مۇستەقىل بلوگ سۇپىسى ئېلىشنىڭ زۆرۈرلىكىنى ھېس قىلدۇرغانىدى، شۇنداقلا ۋوردپرەسنى قايتىدىن كەڭ بلوگگېرلارغا تۇنۇتقانىدى، كەمىنە ش ئە ئۇيغۇرىمۇ گەرچە تور بەت توغۇرلۇق ھېچقانداق تەجرىبەم بولمىغان بىر كود قارىغۇسى بولساممۇ ئەمما ئۇيغۇرچە، خەنچە تور بەتلەردىن ئاقتۇرۇپ، سىنلىق ئۆگىنىش دەرسلىكلىرى ھەم ھەرخىل ئۆگىنىش ماتىرىياللىرىنى كۆرۈپ يۈرۈپ ئاز-تولا بولسىمۇ بۇ توغۇرلۇق چۈشەنچىلەرگە ئىگە بولدۇم، ھەم ئۆگەنگەنلىرىم بۇيىچە ۋوردپرەسنى كومپىيۇتېرىمدا قوزغىتىپ سىناق قىلىپ يۈرۈپ ۋوردپرەستىن ئىبارەت بۇ ئاداشنىڭ ھەقىقى بلوگ قۇرۇشتا ئالدىنقى تاللاش بولالايدىغانلىقىنى ھېس قىلدىم، ئەلۋەتتە بۇ جەرياندا ۋوردپرەسنىڭ ئۇيغۇرچىلاشتۇرۇلغان نەشىرى ھەم ئۇيغۇربەگ بلوگىنىڭ ئۇيغۇرچىلاشتۇرغان بلوگ ئۇسلۇبلىرى مەن ئۈچۈن ئەڭ چوڭ بايلىق بولدى، ھەم نۇرغۇنلىغان يوللارنى قىسقارتىشىمقا ياردەم بەردى، بۇنىڭ ئۈچۈن بارلىق ۋوردپرەسكە ئەجىر سىڭدۈرگەن دوستلارغا ۋە ئۇيغۇربەگ بلوگىغا ئالاھىدە رەھمىتىمنى بىلدۈرىمەن، كۆڭلۈمدە بۇنداق ياخشى نەرسە بىلەن بالدۇرراق تۇنۇشالمىغىنىمغا ئازىراق پۇشايمانمۇ قىلغان بولدۇم، ئەلۋەتتە تەرجىمە خەتلىك فىلىم ئىشلىرى بىلەن ھەپىلىشىپ يۈرگەچكە بۇ ئىشلارغا ۋاقىت چىقماسلىقىمۇ تەبىئىي ئىدى، ئەمدىكى گەپ مەخسۇس تور نامى ھەم بوشلۇق ئېلىپ توردا سىناق ئېلىپ بېرىش ئىدى، مەندەك بىر تەييار بلوگباسنىڭ ئىككىنچى دەرىجىلىك نامىنى ئىشلىتىپ كۈنۈپ كەتكەنلەرگە نىسپەتەن بۇمۇ بىر يېڭى ئىش ھېسابلىناتتى، ئەمما ئۇيغۇربەگ تۇرايىدىكى پرېستان ئەپەندى ۋە شىنجاڭ كومپىيۇتېر ھەۋەسكارلىرى تور بېكىتى قارمىقىدىكى www.uydata.com تورىنىڭ ياردىمىدە بۇ قىيىنچىلىقلىرىممۇ ھەل بولدى، بولۇپمۇ پرېستان ئەپەندىنىڭ زېرىكمەي – تېرىكمەي چۈشەندۈرىشى بىلەن مەزكۈر بلوگنى كۆرۈۋاتقىنىڭلاردەك تېخىمۇ كۆركەم، تېخىمۇ مۇكەممەل ھالدا ئوڭۇشلۇق ھالدا يۆتكەپ كەلدىم، بۇ مۇناسىۋەت بىلەن بۇ ئىككى ئورۇن ۋە شەخىسكە ئالاھىدە رەھمىتىمنى بىلدۈرىمەن. ئەپسۇسلىنارلىقى بلوگنى يۆتكەش جەريانىدا بارلىق تېمىلارنى يۆتكىمەستىن مەزمۇنلارنى تاللاپ يۆتكىگەنلىك سەۋەبىدىن تورداشلارنىڭ بۇرۇنقى بلوگقا يوللانغان ئىنكاسلىرىنى يۆتكەپ كېلىشكە مۇمكىن بولماي قالدى، بۇنىسىنى تورداشلار توغرا چۈشىنىدۇ دەپ ئويلايمەن.

 خوش، شۇنىڭ بىلەن ئۇيغۇر تور دۇنياسىغا يېڭىدىن كۆز ئاچقىنىغا ئەمدىلا ئىككى يىل بولغان شاھ ئۇيغۇر بلوگى تېخىمۇ مەزمۇت قەدەم بىلەن مۇستەقىل بلوگ بولۇش يولىغا قەدەم تاشلىدى.  ئەمدىكى گەپ داۋاملىق راۋاجلىنىشتا، بۇنىڭ ئۈچۈن تورداشلارنىڭ داۋاملىق قوللىشى ئىنتايىن مۇھىمدۇر ئەلۋەتتە، خۇدايىم بۇيرىسا بۇنىڭدىن كېيىن مۇشۇ ئادىرىستا تېخىمۇ كۆپ نادىر فىلىملەرنىڭ ئۇيغۇرچە خەتلىكىنى داۋاملىق تەمىن ئېتىشكە تىرىشىمىز. نەزىرىڭىز داۋاملىق بلوگومدا بولسۇن

شاھ ئۇيغۇر بلوگىنىڭ مەڭگۈلۈك ئادىرىسى :   WWW.SHAHBLOG.NET